«باياعى جارتاس - ءبىر جارتاس»: ەرلان قوشانوۆ ۇكىمەتتىڭ دەپۋتاتتىق ساۋالدارعا

  استانا. KAZINFORM - دەپۋتاتتىق ساۋالدارعا مەملەكەتتىك ورگاندار سىرعىتپا، ءۇستىرت جاۋاپ بەرەدى. بۇل تۋرالى پارلامەنتتىڭ 2-سەسسياسىنىڭ جابىلۋ راسىمىندە ءماجىلىس ءتوراعاسى ەرلان قوشانوۆ ايتتى.

«دەپۋتاتتىق ساۋالدارعا بەرىلەتىن جاۋاپتارعا دا ارنايى توقتالىپ وتكىم كەلىپ وتىر. مەملەكەتتىك ورگانداردىڭ دەپۋتاتتىق ساۋالدارعا بەرەتىن جاۋابى دەپۋتاتتاردىڭ كوڭىلىنەن شىعا بەرمەيدى. «باياعى جارتاس - ءبىر جارتاس». سىرعىتپا، ءۇستىرت جاۋاپ بەرىلەدى، ناقتىلىق جوق. ونىڭ ارتىندا قانشاما ازاماتتىڭ تاعدىرى، تالاپ- تىلەگى مەن مۇڭ- مۇقتاجى تۇرعانىن تۇسىنگەن ءجون»، - دەدى ەرلان قوشانوۆ.

ءماجىلىس ءتوراعاسى ۇكىمەت وسى ايتىلعان ماسەلەلەرگە باسا نازار اۋدارۋى كەرەكتىگىن باسا ايتتى.

«ءبىزدىڭ جۇمىسىمىزدا سايلاۋشىلارمەن تىعىز بايلانىس ورناتۋعا ەرەكشە كوڭىل بولىنەدى. وسى سەسسيادا پارلامەنت دەپۋتاتتارى 800 گە جۋىق ەلدى مەكەندى ارالاپ، 2000 عا جۋىق كەزدەسۋ وتكىزدى. دەپۋتتار سايلاۋشىلاردىڭ ماسەلەلەرىن ءوز دەپۋتاتتىق ساۋالدارى ارقىلى جەتكىزىپ وتىرادى. مىسالى، وسى سەسسيا بارىسىندا سەنات پەن ءماجىلىس دەپۋتاتتارى ۇكىمەت پەن باسقا دا مەملەكەتتىك ورگاندارعا 727 دەپۋتاتتىق ساۋال جولدادى. سونداي- اق ءماجىلىستىڭ قوعامدىق قابىلداۋ قىزمەتى دەپۋتاتتار مەن حالىق اراسىنداعى دانەكەرگە اينالدى. سەسسيا باستالعالى بەرى قوعامدىق قابىلداۋ قىزمەتىنە 2 مىڭنان استام ادام جۇگىندى. سونىمەن قاتار دەپۋتاتتارعا تۇراقتى تۇردە وتىنىشتەر دە كەلىپ تۇسەدى. وسى سەسسيادا 47 مىڭنان استام ازاماتتىڭ حاتى قارالدى»، - دەدى پالاتا سپيكەرى.

سونىمەن قاتار ول وزەكتى ماسەلەلەردى شەشۋ ءۇشىن وڭىرلەرگە شۇعىل ساپارمەن بارۋ دەپۋتاتتىق قىزمەتتىڭ ءتيىمدى ءتاسىلى رەتىندە ورنىققانىن ايتتى.

«ءبىر سوزبەن ايتقاندا، حالىقتى تولعاندىراتىن تۇيتكىلدەر ۇكىمەت پەن اكىمدەر الدىنا اشىق تۇردە قويىلىپ ءجۇر. سەسسيا باستالعالى بەرى ۇكىمەت مۇشەلەرى 2 رەت ارنايى شاقىرىلىپ، سايلاۋشىلاردىڭ تالاپ- تىلەگى وتىرىستا جان- جاقتى قارالدى. ناتيجەسىندە ازاماتتاردىڭ سۇرانىسى ەسكەرىلىپ، مەملەكەتتىك ورگانداردىڭ قىزمەتىن رەتتەيتىن تاعى ءبىر جۇمىس تەتىگى پايدا بولدى»، - دەدى ەرلان قوشانوۆ.