باياناۋىلدا تىكۇشاققا وق اتىلعان: اۋە كەمەسىنەن قانداي زاقىم انىقتالدى؟

پاۆلودار وبلىسىنداعى باياناۋىل ۇلتتىق پاركى ماڭىندا «قازاۆياورمانقورعاۋ» مەكەمەسىنە تيەسىلى تىكۇشاق زاقىمداندى. الدىن الا مالىمەت بويىنشا، اۋە كەمەسىنە وق تيگەن. بۇل وقيعاعا قاتىستى مەكەمە رەسمي تۇسىنىكتەمە بەردى، دەپ حابارلايدى BAQ.KZ ءتىلشىسى.

وقيعا 31-قازاندا باياناۋىل ۇلتتىق پاركى اۋماعىندا بولعان. بەلگىسىز جاعدايدا اتىلعان وقتىڭ ءبىرى تىكۇشاقتىڭ قۇيرىق بولىگىندەگى تىك تۇراقتاندىرعىشىنا ءتيىپ، ونى تەسىپ وتكەن.

ال پاۆلودار وبلىسىنداعى «قازاۆياورمانقورعاۋ» ر م ق ك باياناۋىل اۆياتسيالىق بولىمشەسى وقيعاعا قاتىستى رەسمي مالىمدەمە جاسادى.

مەكەمەنىڭ حابارلاۋىنشا، 2026 -جىلعى 1-قاراشادا ورماندى قورعاۋ ماقساتىندا اۆياتسيالىق جۇمىستاردى ورىنداۋعا تارتىلعان اۋە كەمەسىنەن زاقىمدانۋلار انىقتالعان.

اتالعان فاكتى بويىنشا ماتەريالدار قازىرگى ۋاقىتتا وقيعانىڭ ءمان-جايلارىن انىقتاۋ ماقساتىندا قۇقىق قورعاۋ ورگاندارىنىڭ قاراۋىندا، - دەلىنگەن رەسمي حابارلامادا.

سونداي-اق مەكەمە تەرگەۋگە قاتىستى وزگە دە ماسەلەلەر قۇقىق قورعاۋ ورگاندارىنىڭ قۇزىرەتىنە جاتاتىنىن اتاپ ءوتتى.

ازىرگە اۋە كەمەسىنىڭ ناقتى قانداي جاعدايدا زاقىمدانعانى، وق اتقان ادامنىڭ كىم ەكەنى جانە وقيعانىڭ وزگە دە ءمان-جايلارى بەلگىسىز. تەرگەۋ قورىتىندىسى بويىنشا قوسىمشا اقپارات بەرىلۋى مۇمكىن.