باياناۋىل تاۋلارىندا ەركىن جۇرگەن ارقارلار ۆيدەوعا ءتۇسىپ قالدى
پاۆلودار. KAZINFORM - ۇلتتىق پارك اۋماعىن مەكەندەيتىن تاۋ ارقارلارىنىڭ سانى بۇگىندە 800 گە تاياپ قالعان. جانۋارلار قازاقستاننىڭ قىزىل كىتابىنا ەنگىزىلگەن.
باياناۋىلدىڭ اسقاق تاۋلارىندا ەركىن جۇرگەن ارقارلار ۆيدەوعا ءتۇسىپ قالدى.
ادەتتە ادامدار كوزىنەن تاسا جەردە، بيىك تاۋ باسىندا جايىلاتىن سۇتقورەكتىلەر كادرعا سيرەك ىلىگەدى.
- سوڭعى ساناقتار بويىنشا، ۇلتتىق پاركتىڭ اۋماعىندا بۇل جانۋاردىڭ 781 ءى ءجۇر. ولار ۇنەمى تاۋلى ايماقتى مەكەندەپ، ۇشار باستارىندا جايىلادى. قاراشا-قازان ايلارىندا كۇيەككە تۇسەدى. سول كەزدە قۇلجاسى مەن ۇرعاشىسى بىرگە جايىلادى. ودان كەيىنگى ۋاقىتتا قۇلجالارى بولەك جۇرەدى،-دەپ حابارلادى ۇلتتىق پاركتەن.
كوبەيىپ كەلە جاتقان ارقاردىڭ نەگىزگى قورەگى - جۋسان، قياق، بيدايىق سياقتى شوپتەر. قىستا بۇتانى دا تالعاجاۋ ەتەدى. ارقارلار ادەتتە تاڭ اتا، سوسىن كەشكى ۋاقىتتا جايىلادى.
بۇگىندە باياناۋىل ۇلتتىق پاركىندە سۇتقورەكتىلەردىڭ 45 ءتۇرى بار. ولاردىڭ دەنى اقبەت، دالبا، قىزىلتاۋ، جەلتاۋ، سارىتاۋ ايماقتارىن مەكەندەيدى.
ەسكە سالا كەتەيىك، باياناۋىل ورماندارىندا ەمىن- ەركىن جايىلىپ جۇرگەن بۇلاندار بەينەتاسپاعا ءتۇستى.
