دۋبايدان تەل-اۆيۆكە ۇشقان رەيس اپاتتىق سيگنال بەردى، يزرايل جويعىش ۇشاقتاردى كوتەردى

Flydubai اۋە كومپانياسىنىڭ دۋبايدان تەل-اۆيۆكە باعىت العان ۇشاعى 30-قىركۇيەك كۇنى تاڭەرتەڭ اپاتتىق سيگنال بەرىپ، ساۋد ارابياسى اۋە كەڭىستىگىندە باعىتىن وزگەرتكەن.

The Times of israel باسىلىمى قاۋىپسىزدىك قىزمەتتەرىندەگى دەرەككوزدەرگە سىلتەمە جاساپ، يزرايل اۋە كەڭىستىگىنە جويعىش ۇشاقتارىن كوتەرگەنىن حابارلادى. ازىرگە جولاۋشىلار ۇشاعىن باسىپ الۋ تۋرالى اقپارات رەسمي تۇردە راستالعان جوق.

باسىلىمنىڭ مالىمەتىنشە، ۇشاق الدىمەن جالپى توتەنشە جاعدايدى بىلدىرەتىن 7700 كودىن، كەيىن ۇشاقتى باسىپ الۋ نەمەسە زاڭسىز ارالاسۋ جاعدايىندا قولدانىلاتىن 7500 كودىن جىبەرگەن. Flightradar24 سەرۆيسى 7700 كودىنىڭ بەرىلگەنىن راستادى. الايدا سيگنالدىڭ ناقتى سەبەبى ازىرگە بەلگىسىز.

يزرايلدىڭ «ۆەستي» باسىلىمى ۇشاق بورتىندا 174 جولاۋشى بارىن حابارلادى. يزرايل قاۋىپسىزدىك قىزمەتتەرىندەگى دەرەككوزدىڭ ايتۋىنشا، اپاتتىق سيگنالدىڭ بەرىلۋى ۇشاقتىڭ باسىپ الىنعانىن بىلدىرمەيدى.

- ۇشاقتىڭ باسىپ الىنعانى تۋرالى ناقتى اقپارات جوق. ازىرگە ۇشقىش اپاتتىق سيگنال بەرگەنى بەلگىلى. ۇشقىشپەن بايلانىس ورناتۋ مۇمكىن بولماي تۇر، بۇل الاڭداتىپ وتىر، - دەپ حابارلادى دەرەككوز.

FZ1073 رەيسى تەل- اۆيۆ ماڭىنداعى بەن-گۋريون اۋەجايىنا جەرگىلىكتى ۋاقىت ساعات 09:10 دا (استانا ۋاقىتىمەن 11:10) قونۋعا ءتيىس بولعان.

يزرايلدىك ب ا ق مالىمەتىنشە، ۇشاق بيىكتىگىن تومەندەتىپ، باعىتىن ساۋد ارابياسى جاعىنا وزگەرتكەن. ۇشاقتىڭ قونعانى تۋرالى ازىرگە اقپارات جوق.

يزرايل پرەمەر- ءمينيسترى بينيامين نەتانياحۋ مەن قورعانىس ءمينيسترى يسراەل كاتس قاۋىپسىزدىك ماسەلەسىنە قاتىستى شۇعىل كەڭەس وتكىزىپ جاتىر.

بۇعان دەيىن ساۋد ارابياسى يەمەنگە اۋەدەن ءبىر تاۋلىكتە 35 سوققى جاساعانى حابارلانعان بولاتىن.