دۋبايدان تەل-اۆيۆكە ۇشقان لاينەردە نە بولدى: جولاۋشىلار وقيعانى باياندادى

جولاۋشىلار اۋە كەمەسىنىڭ بورتىندا نە بولعانىن جانە ىقتيمال اپاتتىڭ قالاي الدىن العانىن باياندادى. بۇل تۋرالى DW حابارلادى.

جاريالانعان ۆيدەودا جولاۋشىلاردىڭ ءبىرى ۇشاقتاعى شابۋىل جاساعان ادامنىڭ ۇستالعانىن جانە اۋە كەمەسىنىڭ جاقىن ارادا قوناتىنىن ايتقان.

- قازىر ءبىز ۇشاقتىڭ بورتىندامىز. تەرروريستەردى زالالسىزداندىردىق. جاقىندا قونامىز. مەنى ەستىپ تۇرعانداردىڭ بارلىعىنان كومەك سۇرايمىز،-دەيدى جولاۋشى.

تاعى ءبىر جولاۋشىنىڭ ايتۋىنشا، ۇشاق كەنەتتەن كۇرت تومەندەپ، ارتىنشا قايتادان بيىكتىككە كوتەرىلگەن. سول ساتتە بورتتاعى ادامدار نە بولىپ جاتقانىن تۇسىنبەي قالعان.

ونىڭ سوزىنشە، جولاۋشىلار ابدىراپ، ۇرەيلەنگەن. ال بورتسەرىكتەر سالون ىشىندە ارى-بەرى جۇگىرىپ جۇرگەن. ۇشاق قاتتى شايقالعان. كەيىن جولاۋشىلار اراسىندا بولعان وقيعا تۋرالى ءتۇرلى اڭگىمە تاراي باستاعان. باستاپقىدا ولاردىڭ ەشقايسىسى مۇنى تەراكت بولۋى مۇمكىن دەپ ويلاماعان.

دۋبايدان تەل-اۆيۆكە باعىت العان اۋە كەمەسىن ومان مەن بىرىككەن اراب امىرلىكتەرىنەن شىققان ۇشقىشتار باسقارعان.

يزرايل پرەمەر- ءمينيسترى بينيامين نەتانياحۋدىڭ مالىمدەۋىنشە، بورتتاعى ەكى ۇشقىشتىڭ ءبىرى ەكىنشىسىن پىشاقتاپ، كەيىن ۇشاقتى تىك قۇلديلاۋعا باعىتتاپ، اپاتقا ۇشىراتپاق بولعان.

كابيناداعى قاقتىعىستى جولاۋشىلار مەن اۋە كەمەسىنىڭ بورتىندا بولعان قوسالقى ەكيپاج ۇشقىشتارىنىڭ كومەگىمەن توقتاتۋ مۇمكىن بولعان.

نەتانياحۋ ولاردىڭ ەرلىگىن اتاپ ءوتىپ، كوپتەگەن ادامنىڭ ءومىرىن ساقتاپ، ءىرى اپاتتىڭ الدىن العانىن مالىمدەدى.

ۇشاق ساۋد ارابياسىنداعى اۋەجايلاردىڭ بىرىنە ءساتتى قوندى. بورتتا بولعان 180 ادامنىڭ بارلىعى امان.

بۇعان دەيىن دۋبايدان تەل-اۆيۆكە باعىت العان ۇشاقتىڭ اپاتتىق سيگنال بەرگەنى جانە يزرايلدىڭ اۋەگە جويعىش ۇشاقتارىن كوتەرگەنى حابارلانعان ەدى. كەيىن وسى رەيستەگى ۇشقىشتاردىڭ كابينادا توبەلەسكەنى تۋرالى اقپارات تارادى.