دۋباي تۋريستەرگە ارنالعان العاشقى بىرەگەي باعدارلاماسىن ۇسىنادى
استانا. KAZINFORM - دۋبايدا تۋريستەرگە بەس جىلدىق كوپ مارتەلىك ۆيزا مەن ارنايى جەڭىلدىكتەر ۇسىناتىن Dubai Access Club باعدارلاماسى ىسكە قوسىلادى، دەپ حابارلايدى Kazinform اگەنتتىگى Time Out Dubai باسىلىمىنا سىلتەمە جاساپ.
باعدارلاما دۋبايعا تۇراقتى كەلەتىن تۋريستەر سانىن ارتتىرىپ، ولاردىڭ ساياحاتىن بارىنشا جايلى ەتۋگە ارنالعان.
وعان قاتىسۋ قۇنى - 4 مىڭ ديرحام (شامامەن 1100 دوللار). سونداي-اق ب ا ءا اۋماعىندا جۇرگەن ءوتىنىش بەرۋشىلەردەن قوسىمشا 650 ديرحام الىم الىنادى.
ىرىكتەۋدەن وتكەندەرگە بەس جىلدىق كوپ مارتەلىك ۆيزا بەرىلەدى. ونىڭ نەگىزىندە تۋريستەر ەلدە جىل سايىن ءار كەلگەن ساپارىندا 90 كۇنگە دەيىن جۇرە الادى. بۇعان قوسا، ولارعا 2 مىڭ ديرحام (شامامەن 545 دوللار) كولەمىندە كرەديت ۇسىنىلادى. ونى ارنايى تىزىمگە ەنگەن قوناقۇيلەردە تۇرۋ، كورىكتى جەرلەردى ارالاۋ جانە تاڭدالعان دۇكەندەردەن ساۋدا جاساۋ ءۇشىن پايدالانۋعا بولادى.
ءوتىنىم بەرۋ ءۇشىن فوتوسۋرەت، پاسپورت كوشىرمەسى، سوڭعى التى ايداعى بانك شوتىنان ءۇزىندى، مەديتسينالىق ساقتاندىرۋ ءپوليسى جانە ەكى باعىتقا دا اۋە بيلەتتەرى ۇسىنىلۋعا ءتيىس.
باعدارلاماعا Visit Dubai ۇيىمىنىڭ جەكەلەگەن كورپوراتيۆتىك سەرىكتەستەرى مەن تۇراقتى كليەنتتەرگە ارنالعان باعدارلامالارى ارقىلى قوسىلۋعا بولادى. جەكە تۇلعالار مەن كومپانيالار وتىنىمدەرىن ۇيىمنىڭ رەسمي سايتىندا تىركەي الادى. دەگەنمەن باعدارلاماعا قاتىسۋعا تۇپكىلىكتى رۇقسات دۋبايدىڭ رەزيدەنتتىك جانە شەتەلدىكتەر ىستەرى جونىندەگى باس باسقارماسى (GDRFA) ماقۇلداعاننان كەيىن بەرىلەدى.
بۇعان دەيىن تاياۋ شىعىستاعى قاقتىعىستىڭ دۋباي تۋريزمىنە قالاي اسەر ەتكەنىن جازعان ەدىك.
