باتىستا 34 ادام جالعان قۇرىلىسشىلاردىڭ ارەكەتىنەن زارداپ شەكتى
ورال. KAZINFORM - ورال قالالىق سوتىندا ءتورت جىل بويىنا ب ق و جانە اتىراۋ تۇرعىندارىنان جارتى ميلليارد تەڭگەگە جۋىق قارجى جيناپ الىپ، ءبىراق ءۇي سالۋ بويىنشا مىندەتتەمەلەرىن ورىنداماعان قۇرىلىس سالۋشىلارعا قاتىستى قىلمىستىق ءىس قارالدى.
ب ق و سوتىنىڭ باسپا ءسوز قىزمەتىنەن ءمالىم ەتكەنىندەي، جابىرلەنۋشىلەر بۇرىننان بار باسپانالارىن ساتىپ، جالدامالى پاتەرلەردە تۇرىپ جاتقاندىقتان، بۇل اقشانى تاۋنحاۋستار قۇرىلىسىنا سالعان. ءبىراق سوتتالۋشىلار اقشانى العاننان كەيىن ءارتۇرلى مەكەنجايلارداعى قۇرىلىس- مونتاج جۇمىستارى باستالماعان نەمەسە اياقتالماي قالعان.
سوتتان تۇسكەن مالىمەتكە قاراعاندا، سوتتالۋشىلار الەۋمەتتىك جەلىلەردە، سونداي- اق ءارتۇرلى ينتەرنەت-پلاتفورمالاردا تاۋنحاۋستار سالۋ تۋرالى حابارلاندىرۋ جاريالاعان. وزدەرىن تابىستى كاسىپكەرلەر رەتىندە كورسەتكەن الاياقتار ءىس جۇزىندە جەر تەلىمدەرى، رۇقساتتارى مەن ناقتى مۇمكىندىكتەرى بولماسا دا، جوبالاردى جۇزەگە اسىرۋ قىزمەتتەرىن ۇسىنعان. ولار كليەنتتەردەن اقشا الىپ، جاسالعان كەلىسىم- شارتتاردىڭ سەنىمدىلىگىنە ازاماتتاردى سەندىرگەن.
قۇرىلىس سالۋشىلار ۇلەسكەرلەردىڭ اقشاسىنا بارلىعى بىرنەشە تۇرعىن ءۇي كەشەنىن سالامىز دەپ ۋادە بەرىپ، 500 ميلليون تەڭگەگە جۋىق قاراجاتتى يەمدەنىپ، نىسانداردى سالماعان.
الاياقتىقتان زارداپ شەككەن ازاماتتار قۇرىلىس كەلىسىم-شارتتارىندا كورسەتىلگەن مەرزىمدە نەمەسە ودان كەيىن دە پاتەرلەرىن الا الماعان.
ەكى سوتتالۋشى جابىرلەنۋشىلەرمەن قارىم-قاتىناستارى ازاماتتىق سيپاتتا بولعانىن ايتىپ، ءوز كىنالارىن مويىندامادى.
«ءبىرىنشى ساتىداعى سوت قۇرىلىس سالۋشىلاردى الاياقتىق جاساعانى ءۇشىن كىنالى دەپ تانىپ، ۇزاق مەرزىمگە (سايكەسىنشە 7 جانە 6 -جىل) باس بوستاندىعىنان ايىرۋعا ۇكىم كەستى، سونداي-اق جابىرلەنۋشىلەرگە كەلتىرىلگەن شىعىندى وتەۋ تۋرالى قاۋلى شىعاردى. اپەللياتسيالىق ساتىداعى سوت ولاردىڭ كىناسى دالەلدەنگەن، ارەكەتتىڭ سارالانۋىن دۇرىس دەپ تانىدى. جابىرلەنۋشىلەردىڭ ازاماتتىق تالاپتارىن دۇرىس شەشىپ، سوتتالۋشىنىڭ ءبىرىنىڭ جازاسىن قىلمىستىق كودەكستىڭ 55-بابىنىڭ 2-بولىگى بويىنشا جازانى جەڭىلدەتەتىن ءمان-جايلاردىڭ بار ەكەنىن ەسكەرە وتىرىپ، 7 جىلدان 6 جىل 8 ايعا دەيىن قىسقارتتى. سوت ۇكىمى زاڭدى كۇشىنە ەندى»، دەپ حابارلادى ۆەدومستۆودان.
اۆتور
عايساعالي سەيتاق
