باتىس قازاقستاندا رەسپۋبليكالىق جول وپىرىلىپ كەتتى
ورال. KAZINFORM -باتىس قازاقستان وبلىسىندا رەسپۋبليكالىق ماڭىزى بار پودستەپنىي-تەرەكتى- ر ف شەكاراسى جولىنىڭ 35 شاقىرىمىندا جول وپىرىلىپ كەتتى.
«قازاۆتوجول» ۇ ك» ا ق ب ق و فيليالى ديرەكتورىنىڭ ورىنباسارى دامير تىلەۋبايەۆتىڭ ءمالىم ەتكەنىندەي، وقيعا 1-ءساۋىر كۇنى ساعات 18.32 دە بولدى.
ونىڭ ايتۋىنشا، سۋ وتكىزگىش قۇبىر مەن جول توسەمىن سۋ باسىپ، جولدىڭ قۇرىلىمدىق قاباتتارى شوگىپ كەتتى.
بۇلىنگەن اۋماق قالپىنا كەلتىرىلىپ، وپىرىلعان جەرگە ينەرتتى ماتەريال توسەلۋدە. قازىر وسى جەردە ەكسكاۆاتور، تيەگىش، جۇك كولىكتەرى سەكىلدى 14 ارنايى تەحنيكا، 20 مامان جۇمىس ىستەپ جاتىر. مەردىگەر - «كازكومسەرۆيس» ج ش س. جولدى قىسقا مەرزىم ىشىندە، بۇگىن كەشكە دەيىن قايتا پايدالانۋعا بەرۋ كوزدەلىپ وتىر.
«وسى اپاتتىڭ سالدارىنان اتالعان تاس جولدىڭ 35-شاقىرىمىندا كولىك قوزعالىسى شەكتەلدى. جولدىڭ وسى اۋماعى 2023 -جىلى سالىندى، ونى 2025 -جىلى تاپسىرۋ جوسپارلانعان. سوندىقتان قۇرىلىس جۇمىستارى تولىق بىتكەن جوق: جولدىڭ استىنداعى سۋ وتكىزگىش قۇبىردىڭ ىرگەسىن بەكىتۋ جۇمىستارى تولىق اياقتالمادى. سونىڭ سالدارىنان جولدىڭ قۇرىلىمدىق قاباتى شوگىپ، سۋ شايىپ كەتتى. قىس كەزىندە جۇمىس توقتاتىلعاندىقتان، جولاۋشىلاردىڭ جايلىلىعى ءۇشىن جولدىڭ وسى بولىگىندە قوزعالىس ۋاقىتشا اشىلعان بولاتىن. قۇرىلىس ماۋسىمى باستالعاندا، بۇل جەر قايتا جابىلىپ، كولىك قاتىناسى اينالما جول ارقىلى جۇرگىزىلەدى»، دەدى د. تىلەۋبايەۆ.
ونىڭ سوزىنە قاراعاندا، جول توسەمىن قالپىنا كەلتىرۋ ءۇشىن اسفالت قاباتى الىندى. تاۋلىك بويى كەزەكشىلىك ورناتىلىپ، جوندەۋ جۇمىستارى تۇنىمەن جۇرگىزىلدى، قازىر دە جالعاسىپ جاتىر. مەردىگەر قالپىنا كەلتىرۋ جۇمىستارىن ءوز ەسەبىنەن جۇرگىزۋدە.
وڭىردە 26-ناۋرىزدان بەرى بىرنەشە رەت وسىنداي وقيعا بولدى. اتاپ ايتقاندا، سامارا- شىمكەنت جولىنىڭ 479 جانە 428، سونىمەن قاتار پودستەپنىي-تەرەكتى جولىنىڭ 11، 13-شاقىرىمىن (پويما اۋىلى ماڭىندا) ەرىگەن قار سۋى باسىپ كەتتى. ءبىراق ءتيىستى شارالاردى جەدەل اتقارۋدىڭ ناتيجەسىندە جول بۇلىنگەن جوق.
ەسكە سالا كەتەيىك، بۇدان بۇرىن باتىس قازاقستان وبلىسىندا توتەنشە جاعداي جاريالانعانىن جازعان بولاتىنبىز.
سونداي-اق سۋ تاسقىنىنا بايلانىستى باتىس قازاقستان وبلىسىندا 10 ەلدى مەكەن قاتىناسسىز قالدى.
