باتىس قازاقستاندا ەلەكتروموبيلدەر كوبەيدى مە

ورال. KAZINFORM - باتىس قازاقستان وبلىسىندا ەلەكتروموبيلدەر سانى قانشا، بۇل كولىكتەر تۇرعىندار ءۇشىن قولجەتىمدى مە، مىنە، وسىنى Kazinform ءتىلشىسى انىقتاپ كوردى.

ورالدا ءبىر عانا ەلەكترمەن زاريادتاۋ ستانتسياسى بار

ب ق و ەنەرگەتيكا، تۇرعىن ءۇي- كوممۋنالدىق شارۋاشىلىق باسقارماسى باسشىسىنىڭ ورىنباسارى بەيىمبەت ءمۋسيننىڭ ءمالىم ەتكەنىندەي، ق ر پرەزيدەنتىنىڭ 2022 -جىلعى 26 - قاراشاداعى № 2 جارلىعىندا 2029 -جىلعا قاراي ەلىمىزدىڭ بارلىق ءىرى قالالارىندا ەلەكتروموبيلدەر ءۇشىن قاجەتتى ينفراقۇرىلىم قۇرۋ كوزدەلگەن. بۇل باستاما ەكولوگيالىق تازا كولىكتەر سانىنىڭ ارتۋىنا جانە قورشاعان ورتاعا زياندى شىعارىندىلاردى ازايتۋعا باعىتتالعان.

ونىڭ سوزىنە قاراعاندا، ستاتيستيكالىق دەرەكتەرگە سايكەس قازاقستاندا ەلەكتر قوزعالتقىشتارى بار 11706 اۆتوكولىك تىركەلگەن. بۇل ەلەكتر قوزعالتقىشتارى بار كولىك ءتۇرىنىڭ سانى ءوسىپ كەلە جاتقانىن كورسەتەدى. سونىمەن بىرگە ەلىمىزدە 425 ەلەكتر زاريادتاۋ ستانتسياسى (ە ز س) جۇمىس ىستەيدى. زاريادتاۋ ستانتسيالارىنىڭ ەڭ كوبى الماتىدا (314)، ودان كەيىن استانادا (21)، شىمكەنتتە (11).

— ە ز س- ءتىڭ تارالۋى ەلىمىزدىڭ ءار ايماعىندا تەڭدەي بولىنبەگەن، بۇل كورسەتكىش باسقا قالالاردا الدەقايدا از. بۇل جاعداي ەلەكتروموبيلدەردى كەڭىنەن پايدالانۋ ءۇشىن قاجەتتى ينفراقۇرىلىمدى جەتىلدىرۋ قاجەتتىگىن كورسەتەدى. قازىرگى تاڭدا جەرگىلىكتى اتقارۋشى ورگاندارمەن ەلەكتر زاريادتاۋ ستانتسيالارىنىڭ سانىن كوبەيتۋ جانە ولاردىڭ جۇمىسىن ءتيىمدى ۇيىمداستىرۋ ماقساتىندا تەحنيكالىق شارتتار الۋ جانە قوسىمشا 196 ە ز س ورناتۋ ماسەلەلەرى پىسىقتالۋدا. بۇدان، ارينە، باتىس قازاقستان وبلىسى دا تىس قالمايدى، - دەيدى ب. مۋسين.

ونىڭ ايتۋىنشا، ق ر پرەمەر- ءمينيسترىنىڭ ءبىرىنشى ورىنباسارى رومان سكلياردىڭ تاپسىرماسىمەن بەكىتىلگەن جول كارتاسى اياسىندا ەلەكتر زاريادتاۋ ستانتسياسى ورىندارى جول بويىندا جانە اۆتوۆوكزالدار اۋماعىندا ورنالاستىرىلىپ، ولاردىڭ ءتيىمدى قىزمەت كورسەتۋى قامتاماسىز ەتىلمەك. ەلەكتر قوزعالتقىشتارىنىڭ ءورت قاۋىپسىزدىگىن ساقتاۋ ءۇشىن ارنايى تالاپتار ەنگىزىلەدى. ە ز س- ءتىڭ دۇرىس جۇمىس ىستەۋىنە باعىتتالعان تەحنيكالىق ستاندارتتار مەن رەگلامەنتتەر ازىرلەنەدى. ەلەكتروموبيلدەردىڭ اككۋمۋلياتورلىق باتارەيالارىنىڭ ەكولوگيالىق قاۋىپسىزدىگىن قامتاماسىز ەتۋ ماسەلەسى دە قاراستىرىلادى.

باتىس قازاقستاندا ەلەكتر قوزعالتقىشى بار 66 كولىك تىركەلگەن

باتىس قازاقستان وبلىسى پوليتسيا دەپارتامەنتىنىڭ مالىمەتىنە سايكەس وڭىردە قازىرگى ۋاقىتتا ەلەكتر قوزعالتقىشى بار 66 كولىك تىركەلگەن.

— 2020-2024 - جىلدار ارالىعىندا قالادا ساتىپ الىنعان ەلەكتر كولىكتەرىنىڭ اراسىندا ەڭ كوپ تارالعان ماركالار

 تومەندەگىدەي: Zeekr - 21, Lixiang - 11, Tesla - 8, Volkswagen - 7, BYD - 5 دانا. قالعان ەلەكتر كولىكتەرى ءارتۇرلى ماركالار، بۇل ەلەكتروموبيلدەر نارىعىنىڭ ءارتۇرلى برەندتەرمەن تولىقتىرىلىپ، تۇتىنۋشىلاردىڭ تاڭداۋىنىڭ كەڭەيگەنىن كورسەتەدى، — دەيدى بەيىمبەت مۋسين.

ستاتيستيكالىق مالىمەت بويىنشا باتىس قازاقستان وبلىسىندا 2021 -جىلى 4 دانا، 2022 -جىلى 18, 2023 -جىلى 28, ال 2024 -جىلى تەك 12 دانا ەلەكتروكولىك ەسەپكە الىنعان.

— كۇنى بۇگىن ورال قالاسىندا ءبىر عانا ەلەكتر زاريادتاۋ ستانتسياسى م. شولوحوۆ كوشەسى 39 مەكەنجايىندا ورنالاسقان. بۇل ستانتسياداعى زاريادتاۋ قۇنى — 1 ك ۆ ت ءۇشىن 85 تەڭگە. ورتاشا ەسەپپەن العاندا، ەلەكتر كولىكتەرىنىڭ ەنەرگيا شىعىنى - 100 ك م جولعا 20 ك ۆ ت/ساع. دەمەك، ءبىر كيلومەتردى ءجۇرىپ ءوتۋ قۇنى — نەبارى 17 تەڭگە. الداعى ۋاقىتتا وبلىس ورتالىعىندا وسىنداي ستانتسيالاردى كوبەيتۋ ويلاستىرىلۋدا، — دەيدى باسقارما باسشىسىنىڭ ورىنباسارى.

كولىك يەسى نە دەيدى؟

ەلەكتروموبيلدى پايدالانىپ جۇرگەن تۇرعىنداردىڭ ءبىرى، «باتىس قازاقستان ايماقتىق ەلەكتر جەلىلىك كومپانياسى» ج ش س قىزمەتكەرى ميرجان نىسانوۆ بۇل كولىكتى قولدانۋ ءتيىمدى ەكەندىگىن جەتكىزدى. ول Lixiang كولىگىن قىتايدان تاپسىرىسپەن الدىرعان.

- مۇنداي كولىككە اركىم ءوز جاعدايىنا قاراي قول جەتكىزە الادى دەپ ويلايمىن. قالادا ءبىر ەلەكتر زاريادتاۋ ستانتسياسى بار دەيدى. مەن ءوزىمنىڭ قۋاتى از قۇرىلعىممەن زاريادتايمىن. تۇندە قويعاندا، تاڭعا دەيىن زاريادتالىپ تۇرادى. ەلەكتروموبيلدىڭ ارتىقشىلىعى، ونى قىزدىرىپ جاتپايسىڭ، وتىراسىڭ دا، جۇرە بەرەسىڭ. ەكىنشىدەن، قالانىڭ ىشىندە ىڭعايلى. قورشاعان ورتاعا زيانى جوق. ەندى الىس ساپارلارعا شىققاندا، مەنىڭ كولىگىم گيبريد، اككۋمۋلياتوردى زاريادتاپ الىپ، بەنزينمەن دە جۇرەمىن. بەنزينگە اۋىستىرعاندا، ءوزىن- ءوزى زاريادتايدى. سودان كەيىن قايتادان ەلەكترمەن جۇرۋگە بولادى، — دەيدى م. نىسانوۆ.

ەسكە سالا كەتەيىك، بۇدان بۇرىن ورالدا اۆتوگاز بىردە بار، بىردە جوق ەكەندىگىن جازعان بولاتىنبىز.

 

عايساعالي سەيتاق