باتىس قازاقستاندا 1300 دەن استام ادام قىزىلشامەن اۋىرعان

ورال. KAZINFORM - باتىس قازاقستان وبلىسىندا وتكەن جىلى 1302 ادامنىڭ قىزىلشامەن اۋىرعانى تىركەلدى.

Қарағанды облысында қызылша жұқтырғандар көбейді
Фото: pexels.com

ب ق و سانيتاريالىق- ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستايەۆتىڭ Kazinform تىلشىسىنە ءمالىم ەتكەنىندەي، بۇل كورسەتكىش 2023 -جىلمەن (477) سالىستىرعاندا، 2,7 ەسەگە وسكەن.

ونىڭ سوزىنە قاراعاندا، قازىرگى تاڭدا ەپيدەميولوگيالىق جاعداي تۇراقتالىپ كەلەدى.

- ناۋقاستاردىڭ 822 ءسى نەمەسە 63,1 پايىزى - 14 جاسقا دەيىنگى بالالار. ال 164 ءى نەمەسە 12,5 پايىزى - 1 جاسقا دەيىنگى سابيلەر. قىزىلشا وبلىستىڭ بارلىق اۋدانىندا تىركەلدى. ونىڭ باسىم بولىگى ورال قالاسىندا، مۇندا وبلىستىق كورسەتكىشتەن جوعارى، - دەيدى ن. مۇستايەۆ.

دەپارتامەنت باسشىسى ورىنباسارىنىڭ ايتۋىنشا، قىزىلشانىڭ ءوسۋى مەن تارالۋىنىڭ نەگىزگى سەبەبى - مەديتسينالىق قارسى كورسەتىلىمدەر مەن پروفيلاكتيكالىق ەگۋدەن باس تارتۋدىڭ سالدارىنان تۇرعىنداردىڭ يممۋندىق قابىلەتىنىڭ تومەندەۋى.

قىزىلشاعا كۇدىكتى جاعدايلاردىڭ ءبارى زەرتحانالىق تەكسەرىلىپ، بارلىعى سول جولمەن راستالدى.

ماماننىڭ مالىمدەۋىنشە، قىزىلشا - اۋا جولى ارقىلى وتە جىلدام تارالاتىن ۆيرۋستى جۇقپالى اۋرۋلاردىڭ ءبىرى. ۆيرۋس سىرتقى ورتاعا اۋىرعان ادام سويلەگەندە، جوتەلگەندە، تۇشكىرگەندە، تۇكىرىكپەن بولىنەدى. ينكۋباتسيالىق كەزەڭى جۇقتىرعاننان كەيىن ءبىرىنشى بەلگىلەرى پايدا بولعانعا دەيىن، ياعني 7 كۇننەن 14 كۇنگە دەيىن سوزىلادى. دەرت سۋىق تيۋ بەلگىلەرىمەن باستالادى. دەنە قىزۋى 38-40 گرادۋسقا كوتەرىلىپ، السىزدىك پايدا بولادى. ادامنىڭ تابەتى بولماي، جوتەلىپ، مۇرنى بىتەلەدى.

- قىزىلشانىڭ الدىن الۋدىڭ ەڭ ءتيىمدى، سەنىمدى جانە بالاماسىز جولى ۆاكتسيناتسيا ەكەنىن ەسكە سالامىز. قىزىلشاعا قارسى ەگۋ - ۆيرۋستى جاساندى جولمەن توقتاتۋ، ناتيجەسىندە اعزا ءوزىن قورعايتىن يممۋنيتەت قالىپتاستىرادى. ەڭ العاشقى ۆاكتسيناتسيا بالالارعا 12-15 ايلىعىندا، ەكىنشىسى 6 جاستا جاسالادى. ەگۋ تۇراقتى يممۋندىق قورعانىشتى قالىپتاستىرادى. ناۋقاسپەن قارىم- قاتىناستا بولعان 30 جاسقا دەيىنگىلەر قوسىمشا ەگىلەدى، - دەدى ن. مۇستايەۆ.

ەسكە سالا كەتەيىك، بۇدان بۇرىن باتىس قازاقستاندا 300 دەن استام ادامنىڭ تۋبەركۋلەزگە شالدىققانىن جازعان بولاتىنبىز.

 

سوڭعى جاڭالىقتار