باتىس قازاقستان وبلىسىندا 1 مىڭنان استام كيىك قىرىلىپ قالدى
ورال. KAZINFORM - باتىس قازاقستان وبلىسى بوكەي ورداسى اۋدانىندا 1 مىڭنان استام كيىك قىرىلىپ قالدى.
بوكەي ورداسى اۋدانىنىڭ اكىمى نۇرلىبەك داۋموۆتىڭ ايتۋىنشا، وقيعا 12-ءساۋىر كۇنى كەشكىسىن مۇراتساي اۋىلدىق وكرۋگىندە بولدى.
اۋىل ماڭىنداعى مۇراتساي سۋ قويماسىنان 1 مىڭنان استام كيىكتىڭ ولەكسەسى تابىلدى.
«ءساۋىر ايىندا وسى مۇراتساي اۋىلىنىڭ تۇسىمەن كيىكتەر جانىبەك اۋدانىنا قاراي تولدەۋ ءۇشىن وتەدى. ءالسىز بولدى ما، الدە ءبىرىن-ءبىرى تاپاپ ءولتىردى مە، سەبەبى بەلگىسىز. قازىرگى كەزدە «وحوتزووپروم» مەكەمەسى، «بوكەيورداسى» تابيعي رەزەرۆاتى، اۋدان جانە اۋىل اكىمدىگى قىزمەتكەرلەرى، ۆەتەرينار ماماندار سۋدان ولەكسەلەردى شىعارىپ، شۇڭقىرعا كومۋ جۇمىستارىن جۇرگىزبەكشى. جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنەن عالىمدار كەلمەكشى. اۋداندىق سانيتارلىق-ەپيدەميولوگيالىق باسقارما قىزمەتكەرلەرى سۋدان سىناما الدى. جاعداي باقىلاۋدا. وقيعانىڭ جاي-جاپسارى انىقتالۋ ۇستىندە»، دەدى Kazinform تىلشىسىنە ن. داۋموۆ.
