باستى ماقسات - قازاق بوكسشىلارىن وليمپيادانىڭ جەڭىس تۇعىرىنان كورسەتۋ - مىرزاعالي ايتجانوۆ

Басты мақсат – қазақ боксшыларын Олимпиаданың жеңіс тұғырынан көрсету – Мырзағали Айтжанов
فوتو: kfb.kz

قازاق بوكسشىلارىن الدا ماڭىزدى پاريج وليمپياداسىنىڭ جولداماسى ساراپقا سالىناتىن دودالار كۇتىپ تۇر، دەپ حابارلايدى Kazinform.

وسى ورايدا، بوكستان قازاقستان ۇلتتىق قۇراماسىنىڭ باس باپكەرى مىرزاعالي ايتجانوۆپەن الداعى جارىستارعا جوسپارلارى مەن وقۋ- جاتتىعۋ جيىندارىن قالاي وتكىزىپ جاتقانى جايىندا شاعىن سۇحبات العان ەدىك.

- مىرزاعالي قۇلان ۇلى، قازاق بوكسشىلارى جاڭا جىلدان كەيىن جاڭا ماۋسىمعا قالاي، قايدا دايىندالىپ جاتىر؟

- 5-قاڭتاردان بەرى قاراي تولىق قۇرامدا الماتى وبلىسىنداعى «اقبۇلاق» وليمپيادالىق ورتالىعىندا وقۋ-جاتتىعۋ جيىنىن وتكىزىپ جاتىرمىز. جالپى وقۋ-جاتتىعۋ جيىنىمىز ەكى كەزەڭنەن تۇرادى. ءبىرىنشىسى كەزەڭى - دەنە دايىندىعىمەن جۇمىس ىستەۋ، ەكىنشىسى ارنايى فيزيكالىق دايىندىق بولىپ سانالادى. جوسپارلانعان ەكى وقۋ- جاتتىعۋ جيىنىن دا وسىندا وتكىزەمىز. ەكىنشى كەزەڭدە يران، ازەربايجان بوكسشىلارىمەن بىرلەسكەن وقۋ-جاتتىعۋ وتكىزەمىز.

- الدا يتاليانىڭ ميلان قالاسىندا وتەتىن ليتسەنزيالىق تۋرنير جاقىنداپ قالدى. ۇلتتىق قۇرامادان اتالعان ەلگە كىمدەردى اپارۋدى جوسپارلاپ وتىرسىز؟

- وزدەرىڭىز بىلەسىزدەر، 13-19-قاراشا ارالىعىندا استانادا بوكستان قازاقستان سپارتاكياداسى وتكەن بولاتىن. ءبىز ليتسەنزيالىق تۋرنيرلەرگە وسى دودانىڭ جەڭىمپازدارى مەن جۇلدەگەرلەرىن نەگىزگە الا وتىرىپ اپارامىز. تەك التى بوكسشى عانا بارادى. بىزدە اسا اۋىر سالماقتا جالعىز قامشىبەك قوڭقابايەۆ قانا وليمپياداعا جولداما الىپ قويدى. قالعان التى سالماقتاعى بوكسشىلارىمىزعا ليتسەنزيا اۋاداي قاجەت ەكەنى ايتپاساق تا تۇسىنىكتى. ءبىراق وقۋ-جاتتىعۋ جيىندارىمىز اياقتالماي جاتىپ، يتالياعا كىمدەردىڭ باراتىنىن ناقتى ايتا المايمىز.

- الداعى ليتسەنزيالىق تۋرنيرلەرگە قوڭقابايەۆ قاتىسپايدى عوي...

- ارينە، قاتىسپايدى. ول وليمپياداعا دەيىن ارنايى جاتتىعادى. قايدا، قالاي جاتتىعاتىنىن جوسپارلاپ جاتىرمىز.

- ميلاندا قانشا جولداما جەڭىپ الۋدى كوزدەپ وتىرسىزدار؟

- بارلىعىن ۋاقىت، رينگ كورسەتەدى. بىردەن قالعان التى ليتسەنزيانىڭ ءبارىن جەڭىپ الامىز دەپ ۋادە بەرۋدەن اۋلاقپىز. ءبىز تالاساتىن سالماقتا جولداما الا الماي قالعان الەمنىڭ قانشاما مىقتى بوكسشىلارى بار. ولاردىڭ دا ارمانى بىزبەن بىردەي - قارسىلاسىن ۇتىپ، جولداماعا قول جەتكىزۋ. ءقازىر بوكستا باسەكەلەستىك اسا جوعارى. سول ءۇشىن ميلانعا اسا جوعارى دەڭگەيدەگى دايىندىقپەن بارۋدى كوزدەپ وتىرمىز.

- ميلاندا جولى بولماعان بوكسشىلار تاعى قانداي جارىستاردا وليمپيادا جولداماسىنا تالاسۋعا مۇمكىندىكتەرى بار؟

- وسى جىلى ءبىرىنشى ليتسەنزيا تاراتاتىن جارىس يتاليادا وتسە، ەكىنشىسى تايلاندتا وتەدى. بىرىنشىسىندە - 49، ال ەكىنشىسىندە 51 ليتسەنزيا ويناتىلادى دەپ جوسپارلانىپ وتىر. مەنىڭ قازىرگى باستى ماقساتىم - اتالعان قوس ليتسەنزيالىق تۋرنيرگە اسا جوعارى دەڭگەيدە دايىندالىپ، قالعان التى سالماقتاعى جولدامانى جەڭىپ الۋ. جولداما قولعا تۇسسە، پاريجدە توكيودا كەتكەن ەسەنى قايتارىپ، قازاق بوكسشىلارىن وليمپيادانىڭ جەڭىس تۇعىرىنان كورسەتۋ.

- اڭگىمەڭىزگە راقمەت!

 


اۆتور
كۇنسۇلتان وتارباي

سوڭعى جاڭالىقتار