باستاۋىش سىنىپتاردا بۇرىن باعالانباعان پاندەر بويىنشا دا باعالاۋ جۇرگىزىلەدى

بۇعان دەيىن جەكە باعالانباعان سيفرلىق ساۋاتتىلىق، ەڭبەككە باۋلۋ، بەينەلەۋ ونەرى، مۋزىكا جانە دەنە شىنىقتىرۋ پاندەرى بويىنشا دا فورماتيۆتىك باعالاۋ جۇرگىزىلىپ، ارالىق باعالاۋ توقسانىنا ءبىر رەت وتكىزىلەدى.
بۇل تۋرالى ق ر وقۋ-اعارتۋ ءبىرىنشى ۆيتسە-ءمينيسترى شىنار اقپاروۆا مالىمدەدى.
ونىڭ ايتۋىنشا، اتالعان پاندەردىڭ بارلىعى باستاۋىش ءبىلىم بەرۋدىڭ جالپى مازمۇنىنا كىرەدى جانە بالانىڭ بەلگىلى ءبىر ءبىلىمى مەن داعدىلارىن قالىپتاستىرۋعا باعىتتالعان. سوندىقتان وقۋ باعدارلاماسىندا بەلگىلەنگەن ناتيجەلەردىڭ بارلىق ءپان بويىنشا كورىنىس تابۋى ماڭىزدى.
بۇل قوسىمشا جازباشا باقىلاۋ جۇمىستارىن كوبەيتپەيدى. كەرىسىنشە، ءپاننىڭ ەرەكشەلىگىنە سايكەس ساباق بارىسىندا ورىندالاتىن پراكتيكالىق، شىعارماشىلىق، جوبالىق، زەرتتەۋ، سپورتتىق، جەكە جانە كوماندالىق جۇمىستاردىڭ ناتيجەسىنە نەگىزدەلەدى، - دەدى شىنار اقپاروۆا ورتالىق كوممۋنيكاتسيالار قىزمەتىنىڭ الاڭىندا.
ءبىرىنشى ۆيتسە-مينيستر سيفرلىق ساۋاتتىلىق جانە جاساندى ينتەللەكت پانىنە دە توقتالدى.
ونىڭ ايتۋىنشا، بيىل ءپاننىڭ مازمۇنى جاڭارتىلىپ، وقۋشىنىڭ سيفرلىق ورتادا قاۋىپسىز ارەكەت ەتۋى، اقپاراتپەن جۇمىس ىستەۋى، سيفرلىق قۇرالداردى جاۋاپتى پايدالانۋى جانە جاساندى ينتەللەكت مۇمكىندىكتەرىن سانالى قولدانۋى ەسكەرىلەدى.
ال ەڭبەككە باۋلۋ ءپانى ارقىلى وقۋشى جۇمىستى جوسپارلاۋ، ماتەريالدار مەن قۇرالداردى دۇرىس پايدالانۋ، باستاعان ءىسىن سوڭىنا دەيىن جەتكىزۋ، ۇقىپتىلىق تانىتۋ جانە ءوز ەڭبەگىنىڭ ناتيجەسىنە جاۋاپكەرشىلىكپەن قاراۋ داعدىلارىن قالىپتاستىرادى.
بەينەلەۋ ونەرى شىعارماشىلىق ويلاۋدى، ۆيزۋالدى قابىلداۋدى جانە ءوز يدەياسىن بەينەلەۋ قۇرالدارى ارقىلى جەتكىزۋدى دامىتۋعا باعىتتالعان.
مۋزىكا پانىندە ورىنداۋشىلىق جانە شىعارماشىلىق قابىلەتتەر، ەستۋ مەن ىرعاق سەزىمى، سونداي-اق ەموتسيونالدىق قابىلداۋ ەسكەرىلەدى.
ال دەنە شىنىقتىرۋ پانىندە وقۋشىنىڭ ناتيجەسى باسقا بالالارمەن سالىستىرىلمايدى. مۇندا ونىڭ قيمىل-قوزعالىس داعدىلارىن مەڭگەرۋى، قاۋىپسىزدىك تالاپتارىن ساقتاۋى، جەكە جانە كوماندالىق جۇمىستارعا قاتىسۋى باعالانادى.
- وسىلايشا، بارلىق ءپان بويىنشا باعالاۋ بالانىڭ تەك اكادەميالىق ءبىلىمىن ەمەس، ونىڭ سيفرلىق، پراكتيكالىق، شىعارماشىلىق، ورىنداۋشىلىق جانە قيمىل-قوزعالىس داعدىلارىنداعى ىلگەرىلەۋىن دە كورسەتۋگە مۇمكىندىك بەرەدى، - دەپ قورىتىندىلادى سپيكەر.
ايتا كەتەيىك، مەكتەپتەگى ارالىق باعالاۋ نە ءۇشىن كەرەك ەكەنىن جازعانبىز.