باستاۋىش سىنىپ وقۋشىلارىنا جاساندى ينتەللەكتىنى ۇيرەتۋدىڭ قاجەتى بار ما

بۇل تۋرالى ى. التىنسارين اتىنداعى ۇلتتىق ءبىلىم اكادەمياسى ورتا ءبىلىم ينستيتۋتى ديرەكتورىنىڭ ورىنباسارى پەرنەگۇل تاۋباي جۋرناليستەردىڭ سۇراعىنا جاۋاپ بەردى.

جۋرناليست ماماننان باستاۋىش سىنىپ وقۋشىلارىنا جاساندى ينتەللەكتتى وقىتۋدىڭ قانشالىقتى قاجەت ەكەنىن جانە جاڭا ءپان مازمۇنى قازىرگى سيفرلىق وزگەرىستەرگە قانشالىقتى بەيىمدەلگەنىن سۇرادى.

پەرنەگۇل تاۋبايدىڭ ايتۋىنشا، 1-4-سىنىپتاردا بۇرىن وقىتىلىپ كەلگەن «سيفرلىق ساۋاتتىلىق» ءپانى «سيفرلىق ساۋاتتىلىق جانە جاساندى ينتەللەكت» بولىپ وزگەرتىلەدى. بۇل رەتتە ءپاننىڭ اتاۋى عانا ەمەس، مازمۇنى دا جاڭارتىلادى.

- بۇگىندە بالالار جاساندى ينتەللەكتتى ءوز دەڭگەيىندە قولدانىپ ءجۇر. سوندىقتان پەداگوگتىڭ باسشىلىعىمەن ولارعا بىردەن كۇردەلى سيفرلىق قۇرالدارمەن جۇمىس ىستەۋ ەمەس، الدىمەن جاساندى ينتەللەكت تۋرالى قاراپايىم تۇسىنىكتەر مەن العاشقى ۇعىمدار بەرىلەدى، - دەدى ول.

ونىڭ ايتۋىنشا، جاساندى ينتەللەكتتى قاۋىپسىز قولدانۋدى ۇيرەتۋ باستاۋىش سىنىپتارداعى باستى باعىتتاردىڭ ءبىرى. جاڭا باعدارلامادا مەدياساۋاتتىلىق پەن جاساندى ينتەللەكتكە قاتىستى ارنايى ءبولىم ەنگىزىلىپ، وندا 13-14 وقۋ ماقساتى قامتىلعان. اتاپ ايتقاندا، وقۋشىلارعا جەكە دەرەكتەر مەن اقپاراتتى قورعاۋ، سيفرلىق قاۋىپسىزدىك، جاساندى ينتەللەكتتى جاۋاپكەرشىلىكپەن پايدالانۋ جانە ەتيكالىق تالاپتاردى ساقتاۋ تۇسىندىرىلەدى.

ال 5-9-سىنىپتاردا بۇل تاقىرىپتار «ينفورماتيكا» ءپانىنىڭ مازمۇنىنا كىرىكتىرىلەدى. اتاپ ايتقاندا، دەرەكتەردى وڭدەۋ، مەدياساۋاتتىلىق جانە كيبەرقاۋىپسىزدىك باعىتتارى قامتىلادى.

- ءار سىنىپتىڭ جاس ەرەكشەلىگىنە قاراي سيفرلىق ساۋاتتىلىقتىڭ باستاپقى دەڭگەيلەرى، جاساندى ينتەللەكتتى دۇرىس پايدالانۋ، اكادەميالىق ادالدىقتى ساقتاۋ، قاۋىپسىزدىك جانە سانالى قولدانۋ داعدىلارى وقۋ باعدارلامالارىنا ەنگىزىلەدى، - دەدى پەرنەگۇل تاۋباي.

سونىمەن قاتار پەداگوگتەر ءۇشىن جاڭا باعدارلامالاردى وقىتۋعا ارنالعان ادىستەمەلىك ۇسىنىمدار ازىرلەنگەن. وندا جاساندى ينتەللەكتكە قاتىستى تاقىرىپتاردى ساباقتا قولدانۋ تاسىلدەرى مەن ناقتى ۇلگىلەر ۇسىنىلادى. اكادەميا وكىلىنىڭ ايتۋىنشا، وقۋ جىلى بارىسىندا پەداگوگتەرگە ادىستەمەلىك جانە ءتۇسىندىرۋ جۇمىستارى دا جۇرگىزىلەدى.

ايتا كەتەيىك، ەلىمىزدە بيىل باستاۋىش سىنىپتاردا باعالاۋدىڭ جاڭا تاسىلدەرى ەنگىزىلەدى.