باسقارما مۇشەلەرىنە 30 ميلليون تەڭگەدەن سىياقى تولەنگەنى راس پا

ورال. KAZINFORM – ب ا ق بەتتەرىندە «Aqjaiyq» ا ك ك» باسقارماسىنىڭ بەس مۇشەسىنە 2025 -جىلدىڭ قورىتىندىسى بويىنشا سىياقى رەتىندە 30 ميلليون تەڭگەدەن تولەنگەن دەگەن مالىمەت جاريالاندى.

сыйақы
Фото: freepik.com

وسىعان بايلانىستى Kazinform ءتىلشىسى «Aqjaiyq» ا ك ك» ا ق-عا ارنايى ساۋال جولداعان ەدى.

مەكەمەدەن تۇسكەن مالىمەتكە قاراعاندا، ءىس جۇزىندە اتالعان سوما ءتيىستى كەزەڭدەگى ەسەپتەلگەن تولەمدەر مەن ولارعا بايلانىستى مىندەتتى سالىقتار جانە اۋدارىمداردىڭ جيىنتىق كولەمىن قۇرايدى. ونىڭ قۇرامىنا مىنالار كىرەدى:

جالاقى؛

سىيلىقاقى تولەمدەرى؛

ەڭبەك دەمالىسىنا تولەنەتىن تولەمدەر؛

ۋاقىتشا ەڭبەككە جارامسىزدىق كەزەڭىنە تولەنەتىن تولەمدەر؛

ءىسساپار شىعىستارى؛

الەۋمەتتىك پاكەت شەڭبەرىندەگى تولەمدەر؛

مەديتسينالىق ساقتاندىرۋ؛

سالىقتار مەن وزگە دە مىندەتتى تولەمدەر جانە اۋدارىمدار.

ال ب ا ق بەتتەرىندەگى اقپاراتتا تولەمدەردىڭ ءارتۇرلى تۇرلەرى مەن مىندەتتى تولەمدەر اجىراتىلماعان، سونىڭ سالدارىنان ولاردىڭ جالپى سوماسى باسقارما مۇشەلەرىنە تولەنگەن تەك سىياقى رەتىندە بۇرمالانىپ كورسەتىلگەن.

سونىمەن قاتار اتالعان سومالار ءبىرجولعى تولەمدەر نەمەسە باسقارما مۇشەلەرىنىڭ وزدەرى دەربەس بەلگىلەگەن قوسىمشا سىياقى ەمەس. ولار ەڭبەكاقى تولەۋگە، ەڭبەك مىندەتتەرىن ورىنداۋعا جانە كوزدەلگەن الەۋمەتتىك كەپىلدىكتەرگە بايلانىستى شىعىستاردىڭ جيىنتىق كولەمىن بىلدىرەدى.

- «Aqjaiyq» ا ك ك» ا ق جالاقىنى، سىيلىقاقىلاردى جانە وزگە دە كوزدەلگەن تولەمدەردى ەسەپتەۋ مەن تولەۋدى مەكەمەنىڭ قولدانىستاعى ىشكى نورماتيۆتىك قۇجاتتارىنا، ەڭبەك زاڭناماسىنىڭ تالاپتارىنا جانە باسقارۋ ورگاندارىنىڭ شەشىمدەرىنە سايكەس جۇزەگە اسىرادى. ءىس جۇزىندە بۇل سومالار اق باسشىلىعىنا تولەنگەن تەك سىيلىقاقى ەمەس، ەسەپتەلگەن تولەمدەردىڭ، جۇرگىزىلگەن تولەمدەردىڭ جانە ولارعا بايلانىستى مىندەتتى سالىقتار مەن اۋدارىمداردىڭ جيىنتىق كولەمى بولىپ تابىلادى، - دەلىنگەن رەسمي جاۋاپتا.