باسپاناعا مۇقتاجداردىڭ كەزەگىنە تۇرۋ قۇقىعىنا كىمدەر يە بولادى

استانا. KAZINFORM - «وتباسى بانك» بازاسىندا تۇرعىن ۇيمەن قامتاماسىز ەتۋدىڭ ءبىرىڭعاي ورتالىعى قۇرىلادى. بۇل تۋرالى ءماجىلىس دەپۋتاتتارىنىڭ ساۋالىنا پرەمەر-ءمينيستردىڭ ءبىرىنشى ورىنباسارى رومان سكلياردىڭ جاۋابىندا ايتىلعان.

«بيىل 30-قازاندا پارلامەنت «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي ساياساتىن رەفورمالاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ماقۇلدادى. ول ازاماتتاردى تۇرعىن ۇيمەن قامتاماسىز ەتۋ بويىنشا جاڭا تاسىلدەر مەن باعىتتاردى كوزدەيدى. زاڭ جوباسى اياسىندا «وتباسى بانك» ا ق بازاسىندا تۇرعىن ۇيمەن قامتاماسىز ەتۋدىڭ ءبىرىڭعاي ورتالىعىن قۇرۋ قاراستىرىلادى. بۇل تۇرعىن ۇيگە كەزەكتى اشىق قالىپتاستىرۋعا جانە ونى مۇقتاجدارعا ىسكە اسىرۋ ءۇشىن «ءبىر تەرەزە» ءادىل قاعيداتىن قولدانۋعا مۇمكىندىك بەرەدى. ەندى تۇرعىن ۇيگە مۇقتاجداردىڭ كەزەگىنە تۇرۋ قۇقىعىنا سوڭعى 5 جىل ىشىندە قانداي دا ءبىر ساناتقا جاتاتىنىنا قاراماستان، تۇرعىن ءۇيى جوق بارلىق ازامات يە بولادى. بۇل رەتتە، تۇرعىن ءۇي بەرۋ تەتىگىن تاڭداۋ ازاماتتىڭ تابىسى مەن مارتەبەسىنە سايكەس جۇزەگە اسىرىلادى»، - دەدى ءبىرىنشى ۆيتسە-پرەمەر.

ونىڭ اتاپ وتۋىنشە، بۇدان باسقا، زاڭ جوباسى اياسىندا ينتەرنەت- رەسۋرستا وزەكتەندىرىلگەن تىزىمدەردى جاريالاي وتىرىپ، كەزەكتە تۇرعانداردىڭ ءتىزىمىن تۇراقتى تۇگەندەۋ كوزدەلگەن. بۇل كەزەكتىڭ ءادىل جانە اشىق قالىپتاسۋىن قامتاماسىز ەتەدى.

«جالپى تۇرعىن ۇيگە مۇقتاج ازاماتتاردى قولداۋ قۇرالدارى رەتىندە كوممۋنالدىق جالعا بەرىلەتىن تۇرعىن ءۇي، كرەديتتىك تۇرعىن ءۇي سالۋ، جەڭىلدىكتى يپوتەكالىق نەسيەلەر (وتباسى بانكىنىڭ باعدارلامالارى، 7-20-25)، تۇرعىن ءۇي ءۇشىن باستاپقى جارنانى جابۋعا سەرتيفيكاتتار، كوممۋنالدىق قىزمەتتەردى وتەۋگە تۇرعىن ءۇي تولەمدەر جانە باسقا تەتىكتەر كوزدەلگەن»، - دەدى رومان سكليار.

بۇعان دەيىن پرەمەر-ءمينيستردىڭ ءبىرىنشى ورىنباسارى ءماجىلىس دەپۋتاتتارىنىڭ «ناۋرىز» يپوتەكالىق باعدارلاماسىنىڭ باستاپقى جارنا مولشەرىن تومەندەتۋگە قاتىستى ساۋالىنا جاۋاپ بەرگەنىن جازعان ەدىك.