باسپاناعا مۇقتاج جاندارعا قانداي مەملەكەتتىك كومەك كورسەتىلەدى
استانا. KAZINFORM - ەلىمىزدە 654 مىڭ ادام باسپانا كەزەگىندە تۇر. بۇل تۋرالى ونەركاسىپ جانە قۇرىلىس مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ ءتوراعاسى باقىتجان جۇنىسبەكوۆ ايتتى.
- ەلىمىز بويىنشا تۇرعىن ءۇي كەزەگىندە بارلىعى 654 مىڭنان استام ادام تۇر، - دەدى ول ورتالىق كوممۋنيكاتسيالار قىزمەتىندەگى بريفينگتە.
وسى ورايدا كوميتەت باسشىسى كەزەكتە تۇرعان مۇقتاج ازاماتتارعا كورسەتىلەتىن مەملەكەتتىك قولداۋ شارالارىنا توقتالدى.
ءبىرىنشى - جالعا ۇسىنىلاتىن تۇرعىن ءۇيدى ساتىپ الۋ قۇقىعىنسىز بەرۋ.
- تۇرعىن ءۇي- كوممۋنالدىق ينفراقۇرىلىمدى دامىتۋدىڭ 2023-2029-جىلدارعا ارنالعان تۇجىرىمداماسى ياسىندا الەۋمەتتىك وسال ساناتتاعى كەزەكتە تۇرعاندارعا ساتىپ الۋ قۇقىعىنسىز تۇرعىن ءۇي كەزەكتىلىك تارتىبىمەن جالعا بەرىلەدى. بۇل رەتتە، جالعا بەرىلەتىن تۇرعىن ءۇيدىڭ جالپى كولەمىنىڭ كەمىندە 20 پايىزى ساتىپ الۋ قۇقىعىنسىز جەتىم بالالار مەن كوپ بالالى وتباسىلارعا بەرىلەدى. وتكەن جىلى اتالعان مەملەكەتتىك قولداۋ شارالارى اياسىندا كەزەكتە تۇرعان 13 مىڭعا جۋىق ادام تۇرعىن ۇيمەن قامتاماسىز ەتىلدى. بيىل 1-توقساندا 3 مىڭنان استام وتباسى جالعا بەرىلەتىن پاتەرگە يە بولدى.
ەكىنشى - جالداۋ اقىسىن سۋبسيديالاۋ
2022 -جىلدان باستاپ ازاماتتاردىڭ مىنا ساناتتارىنا جەكە سەكتورداعى تۇرعىن ءۇيدى جالداۋ قۇنىنىڭ 50 پايىزى سۋبسيديالانادى:
- ءبىرىنشى جانە ەكىنشى توپتاعى مۇگەدەكتىگى بار ادامدار؛
- مۇگەدەك بالالارى بار نەمەسە ولاردى تاربيەلەپ وتىرعان وتباسىلار؛
- جەتىم جانە اتا- اناسىنىڭ قامقورلىعىنسىز قالعان بالالار.
- كوپ بالالى انالار، كوپ بالالى وتباسىلار.
- بۇگىنگى تاڭدا 11 مىڭنان استام وتباسى تۇرعىن ءۇيدى جالعا العانى ءۇشىن 50 پايىز تولەم بويىنشا مەملەكەتتىك قولداۋعا يە، - دەدى كوميتەت باسشىسى.
ءۇشىنشى - تۇرعىن ءۇي سەرتيفيكاتتارى. ونى اكىمدىكتەر يپوتەكالىق تۇرعىن ءۇي نەسيەلەرى بويىنشا باستاپقى جارنانىڭ ءبىر بولىگىن جابۋعا بەرەدى.
- وتكەن جىلدىڭ قورىتىندىسىندا 2,6 ميلليارد تەڭگە سوماسىنا 2,3 مىڭنان استام تۇرعىن ءۇي سەرتيفيكاتى، وسى جىلدىڭ 1-توقسانىندا جالپى سوماسى 580 ميلليون تەڭگەگە 522 سەرتيفيكات بەرىلدى، - دەدى باقىتجان جۇنىسبەكوۆ.
ءتورتىنشى - جەڭىلدىكتى كرەديت بەرۋ. ياعني، باسپانا كەزەگىندە تۇرعاندارعا 2 جانە 5 پايىزدىق مولشەرلەمەمەن جەڭىلدىكتى زايمدار ۇسىنىلادى. بۇل رەتتە 2 پايىزدىق مولشەرلەمەمەن زايمدى كەزەكتە تۇرعان ازاماتتاردىڭ مىنا ساناتتارى الادى:
ءبىرىنشى جانە ەكىنشى توپتاعى مۇگەدەكتىگى بار ادامدار؛
مۇگەدەك بالالاردى تاربيەلەپ وتىرعان وتباسىلار؛
كوپ بالالى وتباسىلار؛
جەتىم بالالار.
- 2024-جىلدىڭ قورىتىندىسىندا جىلدىق مولشەرلەمەسى 2 پايىز بولاتىن 3859 زايم بەرىلدى. ال ءتورت ايدا تۇرعىن ءۇي ساتىپ الۋعا 952 زايم ۇسىنىلدى. سونىمەن قاتار، وتكەن جىلى 5 پايىزدىق مولشەرلەمەمەن 5145 زايم بەرىلدى. جىل باسىنان بەرى 1249 ازامات جەڭىلدىكتى زايم الدى. اتالعان جەڭىلدىكتى قارىزدار حالىققا «وتباسى بانكى» تۇرعىن ءۇي قۇرىلىس بانكى ارقىلى ۇسىنىلادى، - دەدى كوميتەت باسشىسى.
وسىعان دەيىن بيىل 4 ايدا 45,1 مىڭ پاتەر پايدالانۋعا بەرىلگەنىن جازعان ەدىك.
