باسپانا باعاسى 23 جىلدا 21 ەسە وسكەن - باقىتجان بازاربەك
استانا. KAZINFORM - ءماجىلىس دەپۋتاتى باقىتجان بازاربەك سالىق كودەكسىنىڭ جاڭا رەداكسياسىنداعى قۇرىلىس كومپانيالارىنا ق ق س تاعايىنداۋ تۋرالى باپقا قارسى شىعىپ جۇرگەن كاسىپكەرلەرگە شۇيلىكتى.
- 23 جىل بويى قۇرىلىس كومپانيالارىن قولداپ كەلدىك. سۋبسيديا بەرەمىز، دوتاتسيا تولەيمىز دەگەن سياقتى. باسپانا باعاسىن ارزانداتسىن دەپ ق ق س-تان بوساتتىق. ءبىراق ءىس جۇزىندە تۇرعىن ءۇي باعاسى 21 ەسە ءوستى. وسى جەڭىلدىكتىڭ ارقاسىندا كوپتەگەن قۇرىلىس كومپانيالارىنىڭ يەلەرى «فوربس» تىزىمىنە كىردى. كەيبىرى كاپيتالىن شەتەلگە جىلىستاتسا، كەيبىرىنە ءتىپتى ق ق س-تان بوساتۋدىڭ ءوزى جەتكىلىكسىز بولدى. ءسويتىپ ۇلەسكەرلەردى سازعا وتىرعىزا باستادى. سالىق كودەكسىنىڭ جاڭا رەداكسياسىندا قۇرىلىس كومپانيالارىنا ق ق س تاعايىنداۋ ۇسىنىلعان. ونىڭ كەسىرىنەن باعا ءوسىپ كەتپەي مە؟ باسپانا باعاسىن قالاي ۇستاپ تۇرماقشىسىزدار، - دەپ سۇرادى دەپۋتات.
بۇل سۇراققا پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين جاۋاپ بەردى.
- ءبىز ونى دۇرىس دەپ سانايمىز. بۇعان دەيىنگى جەڭىلدىكتەر ەشتەڭە بەرمەدى. ءسىز ايتقانداي، باعا ءوسىپ جاتىر. كوبىنەسە قۇرىلىسقا قىزمەت كورسەتۋ جۇمىستارى سالىقتان جالتارۋعا پايدالانىلدى. سالىق كوميتەتى ونداي تاسىلگە بارعاندارعا العاشقى حابارلامالار جىبەردى. وسىلايشا ءىرى قۇرىلىس كومپانيالارى تولەمەي كەلگەن سالىقتارىن تولەي باستادى. ياعني، باقىلاۋ ورناتىلادى. باعا بەلگىلەۋگە كەلسەك، نارىقتا ۇستەمدىك ەتەتىن سۋبەكتىلەر نەمەسە جيىنتىق ۇستەمدىك بار. ولار وسىعان بايلانىستى بەلگىلى ءبىر باعا زاڭدارىنا باعىنۋى كەرەك. جاڭا كودەكستە قۇرىلىس كومپانيالارىنا تاۋارلاردى، جۇمىستار مەن قىزمەتتەردى جەتكىزۋمەن اينالىساتىن سۋبەكتىلەر دە ارنايى سالىق رەجيمىنەن شىعارىلادى. سوندىقتان ءبىز ەلەكتروندى شوت-فاكتۋرالار نەگىزىندە بارلىق تىزبەكتى اشىق كورە الامىز. قۇرىلىس جوبالارىندا جەرگىلىكتى مازمۇن جەتكىلىكتى ەكەنىن مويىنداۋ كەرەك. بۇل ونى باقىلاۋعا مۇمكىندىك بەرەدى. سوندىقتان، مەنىڭ ويىمشا، ءبىز باعا اشىتقىمەن ۇن كوتەرگەندەي كوتەرىلمەۋ ءۇشىن جەتكىلىكتى باقىلاۋدى قامتاماسىز ەتە الامىز، - دەدى ۆيتسە-پرەمەر.
ايتا كەتۋ كەرەك، سالىق كودەكسىنىڭ جاڭا رەداكسياسىندا ق ق س سالىناتىن اينالىمنىڭ تومەنگى شەگىن 40 ميلليون تەڭگە دەپ بەلگىلەۋ ۇسىنىلىپ وتىر.
اۆتور
ەسىمجان ناقتىباي
