باسپا ءسوز كارتاسى ۇعىمىن ايقىنداۋ تاسىلدەرى قايتا قارالادى - ايدا بالايەۆا
باسپا ءسوز كارتاسى ۇعىمىن ايقىنداۋ تاسىلدەرى قايتا قارالادى. بۇل تۋرالى مادەنيەت جانە اقپارات ءمينيسترى ايدا بالايەۆا ايتتى، دەپ حابارلايدى Kazinform.
«مينيسترلىكتىڭ اقپاراتتىق جۇمىسى مەدياسفەرانى دامىتۋ بويىنشا جاعداي جاساۋ، ەل حالقىن مەملەكەتتىك ساياساتتى ىسكە اسىرۋ تۋرالى حاباردار ەتۋ جانە اقپاراتتىق قاۋىپسىزدىكتى قامتاماسىز ەتۋ سياقتى ءۇش نەگىزگى قۇرامداس بولىكتەن تۇرادى. وزدەرىڭىز بىلەتىندەي، وسى جىلدىڭ ناۋرىز ايىندا مەملەكەت باسشىسىنىڭ جارلىعىمەن ءسوز بوستاندىعىن ودان ءارى قامتاماسىز ەتۋگە، وتاندىق مەدياسفەرانىڭ باسەكەگە قابىلەتتىلىگىن ارتتىرۋعا جانە اقپاراتتىق ەگەمەندىكتى نىعايتۋعا باعىتتالعان «اقپاراتتىق دوكترينا» بەكىتىلدى. ال، تامىز ايىندا ۇكىمەتتىڭ قاۋلىسىمەن ونى ىسكە اسىرۋعا باعىتتالعان ءىس جوسپارى قابىلداندى»، - دەدى مينيستر ورتالىق كوممۋنيكاتسيالار قىزمەتىندەگى بريفينگتە.
ايدا بالايەۆانىڭ ايتۋىنشا، دوكترينادان تۋىندايتىن اسا ماڭىزدى زاڭ جوبالارىنىڭ ءبىرى مينيسترلىك باستاماسىمەن جۇزەگە اسقان «ماسس-مەديا تۋرالى» زاڭ جوباسى بولدى.
«وزدەرىڭىزگە بەلگىلى، 30- قاراشادا پارلامەنت ءماجىلىسىنىڭ جالپى وتىرىسى ءوتتى. وندا زاڭ جوباسى ءبىرىنشى وقىلىمدا ماقۇلداندى. قازىرگى ۋاقىتتا جۇمىس توبىنىڭ وتىرىستارى اياسىندا تالقىلاۋ جۇمىستارى جالعاسۋدا. اتاپ ايتقاندا، جۋرناليستەر مەن ءماجىلىس دەپۋتاتتارىنىڭ پىكىرىن ەسكەرە وتىرىپ، باسپا ءسوز كارتاسى ۇعىمىن ايقىنداۋ تاسىلدەرى قايتا قارالاتىن بولادى. باسپا ءسوز كارتالارىن بەرۋ كريتەرييلەرىنە كەلەتىن بولساق، بىردەن ايتا كەتەيىك، بارلىعى ايتىپ جۇرگەن جۇمىس ءوتىلى، جوعارى ءبىلىمى بولۋ كەرەك دەگەن وزگەرىستەر جالپى جۇمىس توپتارىنداعى تالقىلاۋ قورىتىندىلارى بويىنشا الىنىپ تاستالادى»، - دەدى ول.
الايدا، مينيستر قازىرگى ۋاقىتتا اككرەديتتەۋدى وڭايلاتۋ ءتاسىلى ناقتى قانداي فورمادا جۇزەگە اسىرىلاتىنىن ايتۋ ەرتە ەكەندىگىنە نازار اۋدارتتى.
«ول الداعى جۇمىس توبىنىڭ وتىرىسى بارىسىندا ايقىندالاتىن بولادى. جالپى، مەن بۇرىن اتاپ وتكەنىمدەي، زاڭ جوباسى بويىنشا دەپۋتاتتار 114 تۇزەتۋ ەنگىزدى. ونىڭ ىشىندە - 64 ءى قابىلدانىپ، 10 تۇزەتۋ پىسىقتالۋدا. وسى ۇسىنىستار قازىرگى ۋاقىتتا ۇكىمەتتىڭ قورىتىندىسىندا جانە بارلىق مۇددەلى مەملەكەتتىك ورگاندار كەلىسىلگەننەن كەيىن ماجىلىسكە جىبەرىلەتىن بولادى. ەكىنشى تىڭداۋعا دەيىن بارلىق تۇزەتۋلەر بويىنشا شەشىم قابىلدانادى»، - دەدى ول.
