باس پروكۋروردىڭ ورىنباسارى تاعايىندالدى
مەملەكەت باسشىسىنىڭ وكىمىمەن عالىمجان قويگەلديەۆ قازاقستان باس پروكۋرورىنىڭ ورىنباسارى بولىپ تاعايىندالدى، دەپ حابارلايدى Kazinform.
«مەملەكەت باسشىسىنىڭ وكىمدەرىمەن عالىمجان مامبەت ۇلى قويگەلديەۆ قازاقستان رەسپۋبليكاسى باس پروكۋرورىنىڭ ورىنباسارى لاۋازىمىنا تاعايىندالدى»، - دەلىنگەن اقوردانىڭ باسپا ءسوز قىزمەتى جاريالاعان قۇجاتتا.
عالىمجان قويگەلديەۆ 1980 -جىلى 3-قاڭتاردا جامبىل وبلىسىندا دۇنيەگە كەلگەن. ءال-فارابي اتىنداعى قازاق ۇلتتىق ۋنيۆەرسيتەتىن «حالىقارالىق قۇقىق» ماماندىعى بويىنشا بىتىرگەن.
ءال-فارابي اتىنداعى قازاق ۇلتتىق ۋنيۆەرسيتەتى زاڭ فاكۋلتەتىنىڭ ازاماتتىق جانە كاسىپكەرلىك قۇقىق كافەدراسىنىڭ وقىتۋشىسى، سىرتقى ىستەر مينيسترلىگىنىڭ شارۋاشىلىق باسقارماسى كونسۋلدىق قىزمەت دەپارتامەنتىنىڭ مامانى، سىرتقى ىستەر مينيسترلىگى اپپاراتىنىڭ اتتاشەسى، ءۇشىنشى حاتشىسى، قازاقستان رەسپۋبليكاسىنىڭ موڭعولياداعى ەلشىلىگىنىڭ ءۇشىنشى، ەكىنشى حاتشىسى، قازاقستان رەسپۋبليكاسىنىڭ پاكىستان يسلام رەسپۋبليكاسىنداعى ەلشىلىگىنىڭ ەكىنشى حاتشىسى، ق ر باس پروكۋراتۋراسىنىڭ حالىقارالىق ىنتىماقتاستىق دەپارتامەنتى باستىعىنىڭ ورىنباسارى، ق ر باس پروكۋراتۋراسى حالىقارالىق ىنتىماقتاستىق دەپارتامەنتىنىڭ باستىعى قىزمەتتەرىن اتقاردى.
2022 -جىلعى 16-قاراشادان قازىرگە دەيىن باس پروكۋرور اپپاراتىنىڭ باسشىسى قىزمەتىن اتقاردى.
