باس پروكۋروردىڭ ورىنباسارى قايرات ساتىبالدىنىڭ ءوتىنىشى تۋرالى: مىنەزدەمەلەرى ەسكەرىلەدى

باس پروكۋروردىڭ ورىنباسارى اسەت شىنداليەۆ اسا ءىرى كولەمدە قاراجات جىمقىردى دەگەن ايىپپەن 6 جىلعا سوتتالعان قايرات ساتىبالدىنىڭ وزىنە تاعايىندالعان جازانى جەڭىلدەتۋ تۋرالى ءوتىنىش بەرۋىنە بايلانىستى پىكىر ءبىلدىردى، دەپ حابارلايدى Kazinform.

«قازاق تەلەكوم» جانە «كولىكتىك سەرۆيس ورتالىعى» كومپانيالارىنىڭ قاراجاتىن جىمقىردى دەگەن كۇدىكپەن ۇستالىپ، 6 جىلعا سوتتالعان قايرات ساتىبالدى قىلمىستىق-اتقارۋ جۇيەسىنىڭ شىعىس قازاقستانداعى دەپارتامەنتىنە مەرزىمىنەن بۇرىن شارتتى تۇردە بوساتۋ تۋرالى ءوتىنىش جولداعانى تۋرالى مالىمەت تاراعان ەدى.

استاناداعى ادام قۇقىقتارىن قورعاۋ زاڭناماسىن جەتىلدىرۋگە ارنالعان حالىقارالىق كونفەرەنسيا بارىسىندا جۋرناليستەر باس پروكۋروردىڭ ورىنباسارىنان وسى مالىمەت تۋرالى پىكىرىن سۇرادى.

«كەز كەلگەن سوتتالعان ازاماتتىڭ مەرزىمىنەن بۇرىن بوساتۋ نەمەسە جازا ءتۇرىن اۋىستىرۋ تۋرالى ءوتىنىش تۇسىرۋگە قۇقىعى بار. ءبىراق ءبىراز قىلمىستار بويىنشا ونداي قۇقىقتى قولدانۋعا تىيىم سالىنادى. اتاپ ايتساق، تەرروريستىك، ەكسترەميستىك، جەمقورلىق باپتارى بويىنشا سوتتالعاندار جازادان بوساتىلمايدى. بۇل اتالعانداردىڭ بارىنە ەمەس، ءبىراق شەكتەۋلەر بار. قايرات ساتىبالدىعا كەلسەك، ونداي ارىز بەرۋگە قۇقىعى بار. ول ارىز سوتتا قارالادى. سوت شەشىمى قانداي بولاتىنىن قازىر ەشكىم ايتا المايدى. ول ارىز بەرگەن سوڭ بىردەن بوساتادى دەپ تە ەشكىم ايتا المايدى. پروتسەسس ءبىر ايدىڭ ىشىندە قارالۋى مۇمكىن. بۇل جەردە سوت وتىرىسى قاشان بولاتىنىنا بايلانىستى. ال وتىرىستىڭ قاشان وتەتىنىن سوت ورگاندارىنان بىلگەندەرىڭىز دۇرىس»، - دەدى ەلدوس شىنداليەۆ.

جۋرناليست باس پروكۋروردىڭ ورىنباسارىنان سوت قايرات ساتىبالدىنى ايىپتى دەپ تانىعان باپتار ونىڭ مەرزىمىنەن بۇرىن بوساۋىنا قانشالىقتى كەدەرگى بولاتىنىن ناقتىلادى.

«جالپى ول باپتار ونداي مۇمكىندىك بەرەدى. ءبىراق جاڭا دا ايتقانىمداي، بۇل تەك ونىڭ قۇقىعى. ول قۇقىعىن قانشالىقتى قاناعاتتاندىراتىنىن سوت قارايدى. سوت قاراعاندا دا جازانى وتەۋ كەزىندەگى مىنەزدەمەسى قانداي بولعانىن، سوتتالاردىڭ الدىنداعى مىنەزدەمەسى قانداي بولعانىن، سونىڭ ءبارىن تىكەلەي، كەشەندى تۇردە قارايدى. سودان كەيىن بارىپ شەشىم قابىلدايدى. بۇل جەردە ەرەكشە ايتۋ كەرەك، اتالعان ازامات تۇسىرگەن ءوتىنىشتىڭ ءمانى مەرزىمىنەن بۇرىن بوساتۋ ەمەس، سوت بەلگىلەگەن جازانى وزگەرتۋ تۋرالى بولىپ وتىر»، - دەدى باس پروكۋروردىڭ ورىنباسارى.