باس پروكۋرور قىلمىس ءورشىپ تۇرعان وڭىرلەردى اتادى

استانا. KAZINFORM - باس پروكۋرور بەرىك اسىلوۆ شىمكەنت قالاسىندا - 25,8 پايىزعا؛ جامبىل وبلىسىندا - 21 پايىزعا؛ ۇلىتاۋ وبلىسىندا - 13,6 پايىزعا قىلمىس كوبەيگەنىن ايتتى.

بەرىك اسىلوۆتىڭ سوزىنشە، 2025-جىلدىڭ العاشقى 3 ايىندا ەلدەگى قىلمىس دەڭگەيى 5,8 پايىزعا (قۇقىق بۇزۋشىلىق 35320 دان 33279 دەيىن) تومەندەدى.

- مەملەكەت باسشىسى قاسىم-جومارت كەمەل ۇلى توقايەۆ ازاماتتاردىڭ قاۋىپسىزدىگىن قامتاماسىز ەتۋ - ستراتەگيالىق باسىمدىق بولىپ قالا بەرەتىنىن اتاپ ءوتتى. 2025-جىلدىڭ العاشقى 3 ايىندا ەلدەگى قىلمىس دەڭگەيى 5,8 پايىزعا (قۇقىق بۇزۋشىلىق 35320 دان 33279 دەيىن) تومەندەدى. بۇل بارلىق قۇقىق قورعاۋ ورگاندارىنىڭ تەك جازالاۋعا ەمەس، الدىن الۋعا باعىتتالعان جۇيەلى پروفيلاكتيكالىق جۇمىسىنىڭ ناتيجەسى ەكەنىن اتاپ وتەمىن. قىلمىستىڭ جاسالماۋىنىڭ باستى سەبەبى - پروفيلاكتيكالىق شارالاردىڭ تۇراقتى قابىلدانۋى. بۇل - قۇقىقتىق ءتارتىپتىڭ شىنايى ىقپالى، - دەپ جازدى اسىلوۆ X پاراقشاسىندا.

سونىمەن قاتار، باس پروكۋرور مىناداي باعىتتار بويىنشا ايتارلىقتاي تومەندەۋ تىركەلگەنىن ايتتى:

• ۇرلىق - 29,3 پايىزعا؛

• بۇزاقىلىق - 32,6 پايىزعا؛

• مال ۇرلىعى - 27,6 پايىزعا؛

• ونشا اۋىر ەمەس قىلمىستار - 11,9 پايىزعا تومەندەدى.

• اسا اۋىر قىلمىستار - ەكى ەسەگە ازايدى.

ۆەدومستۆو باسشىسى اتاپ وتكەندەي، ازاماتتاردىڭ اۋلالارىندا تىنىشتىق، كوشەدە قاۋىپسىزدىك، بالالار ءۇشىن الاڭسىز ورتا بولۋى ءتيىس. دەگەنمەن كەي وڭىردە قىلمىس دەڭگەيى كەرىسىنشە وسكەن.

- كەيبىر وڭىردە، اتاپ ايتقاندا شىمكەنت قالاسىندا - 25,8 پايىزعا؛ جامبىل وبلىسى - 21 پايىزعا؛ ۇلىتاۋ وبلىسى - 13,6 پايىزعا؛ اقمولا، باتىس قازاقستان جانە قوستاناي وبلىستارىندا - قىلمىستىڭ ورتاشا دەڭگەيدە ءوسۋى بايقالادى. بۇل وڭىرلەردە ۆەدومستۆوارالىق ۇيلەستىرۋدى كۇشەيتىپ، ناقتى باعىتتالعان جۇمىستى جۇرگىزۋ قاجەت. پروكۋراتۋرا قىلمىسپەن كۇرەستى ۇيلەستىرەتىن ورگان رەتىندە ءاربىر ۆەدومستۆونىڭ قول جەتكىزگەن ناتيجەسى ءۇشىن ناقتى جاۋاپتى بولۋىن تالاپ ەتەدى. جەرگىلىكتى جەرلەردەگى پروكۋرورلار مەملەكەتتىك ورگانداردىڭ بىتىراڭقى ارەكەتىنە جول بەرمەي، ولاردىڭ ءوزارا ءىس-قيمىلىن جانە كەلىسىمدىلىگىن قامتاماسىز ەتۋى ءتيىس، - دەدى پروكۋرور.

بەرىك اسىلوۆ ەلدە الاياقتىق 3,9 پايىزعا تومەندەگەنىن العا تارتتى، جالپى كەلتىرىلگەن زالال 41,4 ميلليارد تەڭگەنى قۇرادى - بۇل وتكەن جىلمەن سالىستىرعاندا ەكى ەسەگە ازايدى (2024 ج. - 93,7 ميلليارد ت گ).

- ونىڭ ىشىندە 11,7 ميلليارد تەڭگە وتەلدى، بۇل ءىس جۇزىندە وتكەن جىلدىڭ دەڭگەيىنە سايكەس كەلەدى. زالالدى وتەۋ بويىنشا جۇمىس كۇشەيتىلەدى. ءاربىر قىلمىستىق ءىس - بۇل جابىرلەنۋشىنىڭ تاعدىرى. ماڭىزدىسى - تەك كىنالىنى جازالاۋ ەمەس، ادىلەتتىلىكتى قالپىنا كەلتىرۋ، - دەدى ول.

سونىمەن قاتار اسىلوۆ 2025-جىلدىڭ ءبىرىنشى توقسانىندا ەسىرتكىنىڭ زاڭسىز اينالىمىنا قارسى كۇرەس سالاسىندا جۇيەلى جانە بەلسەندى جۇمىس بايقالاتىنىن ايتىپ ءوتتى.

- قۇقىق قورعاۋ جانە ارنايى مەملەكەتتىك ورگانداردىڭ ۇيلەسىمدى كۇش-جىگەرىنىڭ ارقاسىندا ناقتى ناتيجەلەرگە قول جەتكىزىلدى: ەسىرتكى قىلمىستارىن انىقتاۋ سانى 14 پايىزعا، ونىڭ ىشىندە ساتۋ فاكتىلەرىن انىقتاۋ 13 پايىزعا ارتتى، 1,5 مىڭنان استام ءىس سوتقا جولداندى، زاڭسىز اينالىمنان 3,3 توننادان استام ەسىرتكى قۇرالدارى، ونىڭ ىشىندە گەروين، گاشيش، ماريحۋانا جانە سينتەتيكالىق زاتتار، وتكەن جىلدىڭ وسىنداي كەزەڭىمەن سالىستىرعاندا شامامەن ەكى ەسەگە ارتىق الىندى. ارنايى پروكۋرورلار ءىرى ەسىرتكى دۇكەندەرىنە قاتىستى قىلمىستىق ىستەردى تەرگەپ-تەكسەرۋدە. «اقشانىڭ ىزىنە ءتۇسۋ» قاعيداتىن ىسكە اسىرۋ اياسىندا ولار ايتارلىقتاي تابىستارعا قول جەتكىزدى. تەك ءۇش اي ىشىندە ءۇشىنشى تۇلعالاردىڭ (دروپپەرلەردىڭ) اتىنا راسىمدەلگەن 12 مىڭنان استام بانك شوتى بۇعاتتالىپ، 2,1 ميلليارد تەڭگەدەن استام ەسىرتكى كىرىستەرى انىقتالدى. ولاردىڭ 5 ميلليارد تەڭگەدەن استام مۇلكى مەن 6 ميلليون ا ق ش دوللارىنا تەڭ كريپتوۆاليۋتاسى تاركىلەندى. پروفيلاكتيكا - بۇل جاي عانا فورمالدىلىق ەمەس. بۇل قوعامداعى قۇقىق ءتارتىبىن قامتاماسىز ەتۋگە باعىتتالعان ناقتى شارالار جيىنتىعى، - دەپ تۇيىندەدى باس پروكۋرور.

بۇعان دەيىن باس پروكۋراتۋرا «نەمولچي.kz» قورىنىڭ جەتەكشىسى دينا تاڭ ءسارىنى (دينارا سمايىلوۆانى) قاماۋعا الۋعا قاتىستى تۇسىنىكتەمە بەردى.