باس پروكۋرور جاسوسپىرىمدەر اراسىنداعى قىلمىستى الدىن الۋدىڭ ءتيىمدى جولىن اتادى
استانا. KAZINFORM - باس پروكۋرور بەرىك اسىلوۆ جاسوسپىرىمدەر اراسىنداعى قىلمىستى الدىن الۋدىڭ ماڭىزدىلىعى تۋرالى جازدى.
- زاڭدى قۇرمەتتەيتىن ۇرپاقتى قالاي تاربيەلەۋگە بولادى؟ وعان جاۋاپ - پروفيلاكتيكادا، ءبىلىم بەرۋدە جانە تالىمگەرلىكتە. وكىنىشكە قاراي، كەيبىر جاسوسپىرىمدەر توبەلەس پەن ودان دا اۋىر قىلمىستارعا بارىپ ءجۇر. كوپشىلىگى زاڭدى بۇزىپ جاتقانىن، بۇل ءۇشىن جاۋاپكەرشىلىككە تارتىلاتىنىن بىلمەگەن.
ناعىز قاۋىپ - قۇقىقتىق ساۋاتسىزدىق. سوندىقتان ءبىز ۋاكىلەتتى ورگانعا 7-سىنىپتان باستاپ مەكتەپتەردە «زاڭ جانە ءتارتىپ» اتتى مىندەتتى ءپان ەنگىزۋ تۋرالى ماڭىزدى ۇسىنىس جاسادىق. بۇل ءپاندى قىزمەتتەگى زاڭگەرلەر مەن قۇقىق قورعاۋ ورگاندارىنىڭ ارداگەرلەرى جۇرگىزەدى. ويتكەنى ولار تەك ءبىلىمدى عانا ەمەس، ومىرلىك تاجىريبەسىن دە بولىسە الادى، - دەپ جازدى ول «X» الەۋمەتتىك جەلىسىندەگى پاراقشاسىندا.
بەرىك اسىلوۆ جاسوسپىرىمدەر زاڭدى بىلسە تارتىپسىزدىككە بارمايتىنىن ايتادى.
- جاسءوسپىرىم زاڭنىڭ ءمانىن تۇسىنگەندە تارتىپسىزدىككە بارماۋعا تىرىسادى. ولار العان ءبىلىمىن تەك سىنىپتاستارىمەن عانا ەمەس، وتباسىمەن، كورشىلەرىمەن دە بولىسسە دەيمىز. مۇنداي ساباقتاردىڭ سانالى، جاۋاپتى، زاڭ مەن تارتىپكە قۇرمەتپەن قارايتىن جاس ۇرپاقتى تاربيەلەۋگە كومەكتەسەتىنىنە سەنىمدىمىز.
ۇلتتىق قۇرىلتايدىڭ IV وتىرىسىندا مەملەكەت باسشىسى قاسىم-جومارت كەمەل ۇلى توقايەۆ «ادال ازامات تۇجىرىمداماسىنىڭ يدەالدارىنا ساي پاتريوتتىق رۋحتا تاربيەلەنگەن، ءبىلىمدى، جاسامپاز ۇرپاقتى تاربيەلەۋدىڭ ماڭىزدىلىعىن ەرەكشە اتاپ وتكەن بولاتىن. دەمەك، وتباسىنداعى تاربيە مەن زاڭدى ءبىلۋ، قۇرمەتتەۋ ارقىلى عانا ءبىز ادىلەتتى قوعام قۇرا الامىز، - دەلىنگەن جازبادا.
