باس پروكۋراتۋرادا قىلمىسكەرلەدى ىزدەستىرۋدىڭ جانە ەكستراديتسيالاۋدى ارتتىرۋ ماسەلەلەرى تالقىلاندى
باس پروكۋرور بەرىك اسىلوۆتىڭ توراعالىعىمەن زاڭدىلىقتى، قۇقىقتىق ءتارتىپتى جانە قىلمىسكەرلىككە قارسى كۇرەستى قامتاماسىز ەتۋ جونىندەگى ۇيلەستىرۋ كەڭەسىنىڭ وتىرىسى ءوتىپ، وندا 2021-2022 -جىلدارى جانە 2023 -جىلدىڭ وتكەن مەرزىمىندە انىقتاۋدان، تەرگەپ- تەكسەرۋدەن جانە سوتتان بوي تاسالاعان ادامداردى ىزدەۋ بويىنشا قۇقىق قورعاۋ جانە ارناۋلى مەملەكەتتىك ورگاندار قىزمەتىنىڭ تيىمدىلىگى تالقىلاندى. Kazinform بۇل تۋرالى ق ر باس پروكۋراتۋراسىنىڭ باسپا ءسوز قىزمەتىنە سىلتەمە جاساپ حابارلايدى.
ۇيلەستىرۋ كەڭەسىنىڭ جۇمىسىنا جوعارعى سوتتىڭ وكىلدەرى، قۇقىق قورعاۋ جانە ارناۋلى مەملەكەتتىك ورگانداردىڭ، سيفرلىق دامۋ مينيسترلىگىنىڭ باسشىلىعى مەن باسقا دا جاۋاپتى تۇلعالار، وبلىس پروكۋرورلارى مەن اۋماقتىق قىلمىستىق قۋدالاۋ ورگاندارىنىڭ باسشىلارى قاتىستى.
جيىندى اشقان بەرىك اسىلوۆ «ادىلەتتى مەملەكەتتى قۇرۋدىڭ نەگىزگى بەلگىسى، كەز كەلگەن قۇقىق بۇزۋشىلىق ءۇشىن جازانىڭ بۇلتارتپاستىعى قاعيداتىن جۇزەگە اسىرۋدىڭ نەگىزگى فاكتورلارىنىڭ ءبىرى - قىلمىستىق قۋدالاۋدان بوي تاسالاعان ازاماتتاردى ءتيىمدى ىزدەستىرۋ» ەكەنىن اتاپ ءوتتى.
باس پروكۋرور قىلمىسكەرلەردى ىزدەۋدە بەلگىلى ناتيجەلەرگە قول جەتكىزىلگەنىن دە تىلگە تيەك ەتتى.
جىل باسىنان بەرى 2552 قىلمىسكەر، ونىڭ ىشىندە ادام ولتىرگەنى ءۇشىن 30، توناۋ قىلمىسىن جاساعان 81، قاراقشىلىق جاساعان 15، الاياقتىق جاساعان 384، ەسىرتكى قىلمىستارىن جاساعان 82 ايىپتالۋشى ۇستالدى.
ۇيلەستىرىلگەن ءىس-شارالاردىڭ جانە حالىقارالىق سەرىكتەستەرمەن اراداعى ءوزارا تىعىز بايلانىستىڭ ناتيجەسىندە شەتەلدىك يۋريسديكتسيالاردان اۋىر جانە اسا اۋىر قىلمىستار، ونىڭ ىشىندە ادام ءولتىرۋ، زورلاۋ، قارجى پيراميدالارى مەن ۇيىمداسقان قىلمىستىق توپ قۇرۋ قىلمىستارى بويىنشا 100 دەن اسا كۇدىكتى ەلگە قايتارىلدى.
بۇل رەتتە ەكستراديتسيالاۋ تۋرالى كەلىسىمدەردىڭ جوقتىعىنا قاراماستان، اعىمداعى جىلى گەرمانيادان، كامەرۋننان، پولشادان جانە شۆەتسيادان ىزدەۋدە جۇرگەن 7 ادام ەكستراديتسيالاندى.
قازىرگى تاڭدا ارگەنتينا، برازيليا، گەرمانيا، گرۋزيا، يسپانيا، ب ا ءا، پولشا، رەسەي، سەربيا، تۇركيا، ۋكراينا، فرانسيا، چەحيا جانە تاعى دا باسقا ەلدەردەن ىزدەۋدە جۇرگەندەردى ەكستراديتسيالاۋ جۇمىستارى جۇرگىزىلىپ جاتىر.
ىزدەستىرۋ جۇمىسىنا سيفرلىق تەحنولوگيالاردى كەڭىنەن قولدانۋدىڭ ماڭىزدىلىعى، مەملەكەتتىك ورگاندار مەن ۇكىمەتتىك ەمەس ۇيىمداردىڭ اقپاراتتىق جۇيەلەرىنىڭ بارىنشا ينتەگراتسياسىنىڭ ناتيجەسىندە ىزدەۋدە جۇرگەن ادامداردىڭ مەملەكەتتىك، بانكتىك، مەديتسينالىق، كولىكتىك جانە تاعى دا باسقا قىزمەتتەردى العاندىعى جونىندە ۋاقتىلى حابارلاۋ قاجەتتىلىگى اتاپ ءوتىلدى.
تالقىلاۋ ناتيجەلەرى بويىنشا، ونىڭ ىشىندە «ينتەرپول» ۇلتتىق بيۋروسىنىڭ جەلىسى بويىنشا، ىزدەستىرۋ قىزمەتىنىڭ تيىمدىلىگىن ارتتىرۋعا باعىتتالعان مەتودولوگيالىق جانە زاڭنامالىق كەشەندى شارالار ازىرلەندى.
جالپى، قىلمىسكەرلەردى ىزدەۋ قىزمەتىن جاقسارتۋعا باعىتتالعان باسقا دا شارالار ۇسىنىلدى.
