باس پروكۋراتۋرا ايدوس سادىقوۆتى ولتىرمەك بولعانداردى تابۋ ءۇشىن تەرگەۋ باستادى

استانا. KAZINFORM - قازاقستاننىڭ باس پروكۋراتۋراسى كيەۆتە قاستاندىققا تاپ بولعان قازاقستاندىق جۋرناليست ايدوس سادىقوۆ ءىسىنىڭ ءمان-جايىن ايتىپ بەردى.

بۇگىن مەملەكەت باسشىسىنىڭ تاپسىرماسىمەن 18-ماۋسىم كۇنى كيەۆتە ايدوس سادىقوۆتىڭ ومىرىنە قاستاندىق جاساۋ فاكتىسى بويىنشا ق ر باس پروكۋراتۋراسى سوتقا دەيىنگى تەرگەۋ باستاعان.

«قىلمىستىق ءىس بويىنشا تەرگەۋ-جەدەل توبى قۇرىلدى. ول قىلمىستى اشۋعا جانە كۇدىكتىلەردى ۇستاۋعا باعىتتالعان قاجەتتى جەدەل ىزدەستىرۋ شارالارىن جۇرگىزەدى» دەيدى ۆەدومستۆودان.

ايتا كەتەيىك، كەشە قازاقستاننىڭ باس پروكۋرورى ۋكراينا باس پروكۋرورىنىڭ اتىنا وسى قىلمىستى اشۋعا بارىنشا تاجىريبەلى قازاقستاندىق تەرگەۋشىلەردى تارتا وتىرىپ، بۇكىل كومەك كورسەتۋ جونىندە ۇسىنىس جاساعان بولاتىن.

باس پروكۋراتۋرا قىلمىستىق ءىستى تەرگەۋ بارىسىن ەرەكشە باقىلاۋعا الدى.

ەسكە سالا كەتەيىك، 18-ماۋسىمدا كيەۆتە تۇراتىن جۋرناليست ايدوس سادىقوۆتى ءۇيىنىڭ جانىندا الدەبىرەۋلەر اتىپ كەتتى. ول قازىر اۋرۋحانادا جاتىر.

ۋكراينا پروكۋراتۋراسى ەكى كۇدىكتىنىڭ سول كۇنى-اق شەكارانى كەسىپ ءوتىپ، ەلدەن كەتىپ قالعانىن حابارلادى.

بۇعان دەيىن پرەزيدەنت قاسىم-جومارت توقايەۆ كيەۆتە جاسالعان قاستاندىق جايىندا پىكىر بىلدىرگەن ەدى.

پرەزيدەنت كەڭەسشىسى بەرىك ءۋاليدىڭ ايتۋىنشا، قازاقستاندى ايىپتاۋ كەيبىر كۇشتەرگە ءتيىمدى.

بۇگىن ىشكى ىستەر مينيسترلىگى ايدوس سادىقوۆتى اتتى دەگەن كۇدىكتىنىڭ قازاقستان پوليتسياسىندا جۇمىس ىستەمەيتىنىن حابارلادى.

مەملەكەت باسشىسى قاستاندىقتى تەرگەۋ امالدارىن ءجىتى باقىلاپ وتىر.