باس ءمۇفتي رامازان ايىندا كاسىپكەرلەردى جەڭىلدىك جاساۋعا شاقىردى
استانا. KAZINFORM - قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى بيىلعى رامازان ايىنىڭ باستالۋىنا قاتىستى مالىمدەمە جاسادى.
«قازاقستان مۇسىلماندارى ءدىني باسقارماسىنىڭ شاريعات جانە ءپاتۋا ءبولىمى تۇركيا، ازەربايجان، وزبەكستان، قىرعىزستان ەلدەرىنىڭ عۇلامالار كەڭەسىمەن، ءپاتۋا سالاسىنا جاۋاپتى عالىمدارمەن اقىلداسا كەلە، بيىلعى رامازان ايىنىڭ باستالاتىن كۇنىن بەكىتتى. ورتاق ءپاتۋاعا سايكەس، قاسيەتتى رامازان ايى 11-ناۋرىزدا باستالادى. ال ءساۋىر ايىنىڭ 5 ىنەن 6 سىنا قاراعان ءتۇن - قاسيەتتى قادىر ءتۇنى. 10-ءساۋىر - ورازا ايت مەرەكەسى»، - دەدى ناۋرىزباي قاجى تاعان ۇلى.
وسى رەتتە باس ءمۇفتي حالىقتى قاسيەتتى ايدا جۇزەگە اساتىن قايىرىمدىلىق ءىس- شارالارعا ۇلەس قوسۋعا شاقىردى.
«كاسىپكەرلەردى الەۋمەتتىك ماڭىزى بار ازىق-تۇلىك باعاسىنا مۇمكىندىگىنشە جەڭىلدىك جاساۋعا ۇندەيمىن. قوعامدىق تاماقتانۋ ورىندارىندا اۋىزاشار ءمازىرىن حالىققا ىڭعايلى باعامەن ۇسىنۋ دا ساۋاپتى ءىستىڭ ءبىرى. دۇكەندەردە كۇللى جاماندىقتىڭ باستاۋى بولعان اراق-شاراپ ساتىلماسا دەگەن تىلەگىمىزدى جەتكىزەمىن. سونىمەن قاتار بارشا حالىقتىڭ ورتاق يگىلىگى ءۇشىن سالىنىپ جاتقان جول، كوپىر، مەكتەپ، مەشىت، مەدرەسە، بالاباقشا، سپورت كەشەنى سىندى ماڭىزدى عيماراتتارعا از دا بولسا ۇلەس قوسىپ، بەلسەندىلىك تانىتۋعا شاقىرامىز. وسى قاسيەتتى ايدا شاماسى كەلگەن كىسىلەر مۇنداي ساۋاپتى ءارى حالىققا پايدا تيەتىن ىستەرگە قولعابىس بولىپ، كومەك بەرىپ، قولداۋ بىلدىرسە، نۇر ۇستىنە نۇر بولار ەدى»، - دەدى ول.
ناۋرىزباي قاجى تاعان ۇلى وسى ايدا جاعدايى بار ادامداردى مۇقتاجدارعا كومەكتەسۋگە شاقىردى.
قازاقستان مۇسىلماندارى ءدىني باسقارماسىنىڭ ءتورالقا ماجىلىسىندە ءپىتىر ساداقاسى ەلىمىز بويىنشا ەكى كەلى ۇننىڭ ورتاشا باعاسى نەگىزىندە 640 تەڭگە بولىپ بەكىتىلدى.
ايتا كەتەيىك، جۇكتى، ومىراۋدا بالاسى بار ايەلدەرگە، جولاۋشىلارعا، ناۋقاس جاندارعا ورازا ۇستاۋ -پارىز ەمەس. ساپاردا جۇرگەندەرگە ورازا ۇستاماۋعا بولادى. ءبىراق باسقا كۇندەردە سانىن تولتىرىپ، اۋىز بەكىتەدى. ەگەر ساپار قيىندىق تۋعىزباسا، ابزالى - اۋىز بەكىتۋ.
اۆتور
رۋسلان عابباسوۆ
