باس ءمۇفتي قۇربان ايتقا بايلانىستى كاسىپكەرلەرگە ۇندەۋ جاسادى
استانا. KAZINFORM - بۇگىن استانادا قۇربان ايت مەرەكەسىنە بايلانىستى وتكەن باسپا ءسوز ءماسليحاتىندا باس ءمۇفتي ناۋرىزباي قاجى تاعان ۇلى كاسىپكەرلەرگە ۇندەۋ جاسادى. بۇل تۋرالى قازاقستان مۇسىلماندار ءدىني باسقارماسىنىڭ باسپا ءسوز قىزمەتى ءمالىم ەتتى.
باس ءمۇفتي مال قۇنىن قولدان كوتەرمەي، حالىققا قولجەتىمدى باعاعا ساتۋعا شاقىردى.
- قوجا احمەت ياساۋي بابامىز ءبىر دانالىق سوزىندە حاققا قىزمەت حالىققا قىزمەت ەتۋدەن باستالاتىنىن ايتقان. بۇل - حالىقتىڭ رازىلىعى حاقتىڭ رازىلىعىندا دەگەن ءسوز. وسى رەتتە ەلىمىزدەگى بارشا شارۋا قوجالىعىنىڭ قوجايىندارىن مال قۇنىن قولدان كوتەرمەي، حالىققا وڭتايلى باعانى ۇسىنۋعا شاقىرامىن. ارينە، ەڭبەكتىڭ اقتالعانى جاقسى. دەگەنمەن ءبىز «پايدا ويلاما، ار ويلا» دەگەن قاناتتى سوزگە ءمان بەرگەن حالىقپىز. اللا تاعالا حالىققا جاساعان جاقسىلىقتارىڭىزدى وزدەرىڭىزگە ەسەلەپ بەرەدى. ويتكەنى جاراتۋشى جاببار يەمىز قۇراندا «ءاربىر جاقسى نارسەدەن جاساعان قايىر- ساداقالارىڭ (ساۋابى) وزدەرىڭە تولىق قايتارىلادى، سەندەرگە ادىلەتسىزدىك ىستەلمەيدى» دەپ، مۇسىلمان بالاسىن زور قۋانىشتى حابارمەن سۇيىنشىلەگەن («باقارا» سۇرەسى، 272-ايات) . سونىمەن قاتار بارشا كاسىپكەردى تۇرعىندار كۇندە تۇتىناتىن الەۋمەتتىك ماڭىزى بار ازىق- تۇلىك باعاسىنا مۇمكىندىگىنشە جەڭىلدىك جاساۋعا ۇندەيمىن. اللانىڭ راقىم نۇرى توگىلەتىن قۇربان ايتتا جۇرتىمىزعا جاقسىلىق جاساپ، كوپشىلىكتىڭ العىسىن الايىق، اعايىن! - دەپ اتاپ ءوتتى ناۋرىزباي قاجى تاعان ۇلى.
ايتا كەتەيىك، قۇربان ايت مەرەكەسى 6 -ماۋسىمدا باستالادى.
- بيىل قاسيەتتى قۇربان ايت مەرەكەسى 6-ماۋسىمدا باستالادى. قازاقستان مۇسىلماندارى ءدىني باسقارماسى ءبىرقاتار الىس تا جاقىن مۇسىلمان ەلدەردىڭ عۇلامالارىمەن، ءپاتۋا شىعارۋ ورتالىقتارىمەن كەڭەسىپ، وسىنداي ءپاتۋا قابىلدادى، - دەدى باس ءمۇفتي ق م د ب- دا وتكەن باسپا ءسوز ءماسليحاتىندا.
