بارلىق وڭىردە حالىقارالىق بالالاردى قورعاۋ كۇنىنە ارنالعان اۋقىمدى ءىس-شارالار وتەدى

22- 30-مامىر ارالىعىندا ەلىمىزدىڭ بارلىق وڭىرىندە حالىقارالىق بالالاردى قورعاۋ كۇنىنە ارنالعان كەڭ اۋقىمدى ءىس-شارالار باستالادى، دەپ حابارلايدى ق ر وقۋ-اعارتۋ مينيسترلىگىنىڭ باسپا ءسوز قىزمەتى.

بيىل بۇل باستاما «قازاقستان بالالارى» دەگەن ورتاق ۇرانمەن وتۋدە. بۇل ۇران ءاربىر بالا ءوزىنىڭ ماڭىزدى ەكەنىن سەزىنىپ، داۋىسىنىڭ ەستىلگەنىن، قۇقىعىنىڭ قورعالعانىن ءبىلۋى ءتيىس دەگەن باستى يدەيانى بىلدىرەدى.

ء​ىس-شارالاردىڭ ماقساتى بالالارعا قۋانىش سىيلاۋ عانا ەمەس، سونىمەن قاتار ولاردىڭ بالالىق شاعىنا قامقورلىق كورسەتۋ - مەملەكەتتىك ساياساتتىڭ باستى باسىمدىعى ەكەنىن كورسەتۋ.

​بۇكىل رەسپۋبليكا بويىنشا بارلىق اۋىل، اۋدان جانە قالا بۇل مەرەكەلىك باستاماعا بەلسەنە قاتىسادى. ءىس-شارالار بالالاردى ەلدىڭ مادەني، ءبىلىم بەرۋ جانە قوعامدىق ومىرىنە كەڭىنەن تارتۋعا باعىتتالعان.

اتالعان ءىس-شارالاردى ق ر وقۋ-اعارتۋ مينيسترلىگى ءتيىستى مەملەكەتتىك، جەرگىلىكتى اتقارۋشى ورگاندارمەن جانە قوعامدىق ۇيىمدارمەن بىرلەسىپ ۇيىمداستىرۋدا.

مەرەكە كۇندەرى كەلەسى باعىتتار بويىنشا ءىس-شارالار وتكىزىلەدى. وبلىس، قالا جانە اۋدان اكىمدەرىنىڭ بالالارمەن كەزدەسۋلەرى وتەدى. بۇل كەزدەسۋلەردە بالالار ءوز ۇسىنىستارىمەن، ارمان-ماقساتتارىمەن بولىسە الادى. سونىمەن قاتار وسى كۇندەرى جاڭا ءبىلىم بەرۋ نىساندارىنىڭ اشىلۋى جوسپارلانعان. تەاترلار، مۇراجايلار، ساياباقتار مەن كينوتەاترلارعا تەگىن نەمەسە جەڭىلدىكپەن بارۋ مۇمكىندىگى قاراستىرىلعان. وعان قوسا، بالالارعا قولداۋ كورسەتۋگە باعىتتالعان وڭىرلىك قايىرىمدىلىق اكسيالارى ۇيىمداستىرىلادى.

بۇل -جاي عانا مەرەكە ەمەس. بۇل - بالالاردىڭ ماڭىزدى ەكەنىن كورسەتەتىن قوعامدىق ۇندەۋ. بالالارعا قامقورلىق - ءاربىر ازاماتتىڭ ورتاق مىندەتى، ادامگەرشىلىك بورىشى.

قازاقستاندىق ​بالالاردى وسى ءىس-شارالارعا بەلسەندى قاتىسۋعا، ءوز ويلارى مەن باستامالارىن، ارماندارىن اشىق ايتۋعا شاقىرامىز. ءار بالاعا ءوزىن ەستىلگەن، باعالانعان جانە قامقورلىقتا ەكەنىن سەزىنۋگە تولىق مۇمكىندىك بەرىلەدى.

بۇعان دەيىن جازعى كانيكۋلدا بالالارعا ارنالعان قانداي سپورتتىق ءىس- شارالار وتەتىنى حابارلاندى.