بارلىق جاعداي جاسالعان، ءبىراق قول قۋسىرىپ وتىرا المايمىز - «تەڭىزدە» تۇرىپ جاتقان قۇلسارى تۇرعىندارى
اتىراۋ. KAZINFORM - سۋ باسقان قۇلسارى قالاسىنىڭ 34998 تۇرعىنى قاۋىپسىز ايماققا كوشىرىلدى. ونىڭ ىشىندە 7445 ادام «تەڭىز» كەن ورنىنداعى جاتاقحانالاردا تۇرىپ جاتىر.
«تەڭىزشەۆرويل» ج ش س ۇكىمەتپەن جانە جۇرتشىلىقپەن بايلانىس ءبولىمىنىڭ باس مەنەدجەرى ايبەك قرامبايەۆتىڭ مالىمەتىنە سۇيەنسەك، كومپانيا جىلىوي اۋدانىنداعى سۋ تاسقىنىنىڭ زاردابىن جويۋعا 2 ميلليارد تەڭگە بولگەن.
«2-4-ءساۋىر ارالىعىندا جىلىوي اۋدانىنداعى تاسقىن سۋعا قارسى جۇمىستار ءۇشىن 90 عا جۋىق ارنايى تەحنيكا، اۆتوبۋستار، ازىق-تۇلىك جانە جانار-جاعارماي جىبەردى. تۇرعىن ءۇيىن سۋ باسقان تۇرعىندار ءۇشىن ۆاحتالىق كەنتتەگى جاتاقحانالاردان ورىن دايىندالدى. مۇنداي كومەك ءالى دە جالعاسادى»، - دەيدى ول.
قازىر قۇلسارى قالاسى مەن تۇرعىزبا اۋىلىنىڭ 7445 تۇرعىنى ۆاحتالىق كەنتتەگى جاتاقحانالاردا. تۇرعىندار كومپانيانىڭ اۆتوبۋستارىمەن ەۆاكۋاتسيالاندى. ولاردىڭ دەنى - بالالى ايەلدەر مەن قارتتار. اراسىندا جۇكتى انالار بار.
«ەۆاكۋاتسيالانعان تۇرعىنداردىڭ ءبارى جاتىن ورىنمەن، ىستىق تاعاممەن، قاجەتتى مەديتسينالىق كومەكپەن قامتاماسىز ەتىلىپ وتىر. تۇرعىندار كۇن سايىن مەديتسينالىق تەكسەرۋدەن وتكىزىلەدى. جۇكتى انالاردىڭ دەنساۋلىعىن قاداعالاۋ ءۇشىن ارنايى مامان شاقىرىلدى»، - دەيدى ايبەك قرامبايەۆ.
ونىڭ ايتۋىنا قاراعاندا، مۇندا بالالارعا ەرەكشە كوڭىل ءبولىنىپ وتىر. ويتكەنى، ولار مۇنداي جاعدايعا تەز ۇيرەنە الماۋى مۇمكىن. سول سەبەپتەن، بالالار ءۇشىن ءتۇرلى ويىن ۇيىمداستىرىلادى. ءتىپتى كينوتەاتر اشىلعان. مۇندا بالالارعا قازىر ەلىمىزدىڭ ەڭ ءىرى كينوتەاترلارىندا كورسەتىلىپ جاتقان مۋلتفيلمدەر ۇسىنىلادى.
تۇرعىندارعا ت ش و مەن مەردىگەر مەكەمەلەردىڭ قىزمەتكەرلەرىنەن بولەك، ەرىكتىلەر دە كومەككە كەلگەن. كومپانيا قىزمەتكەرلەرى گۋمانيتارلىق كومەك جيناپ، ۇشاقپەن «تەڭىزدەگى» ۆاحتالىق كەنت پەن قۇلسارى قالاسىنا جەتكىزىپ جاتىر.
«ەشكىمگە دە وڭاي ەمەس. سۋ كەلە سالىسىمەن زاتتارىمىزدى جيناپ، تۇندە ۆاحتالىق قالاشىققا كەلدىك. مۇندا ءومىر سۇرۋگە جاقسى جاعداي جاسالىپ وتىر. ءوزىمىزدى ۇيدەگىدەي سەزىنەمىز. اسحانادا تاعامنىڭ ءتۇر- ءتۇرى بار. مەيرامحاناداعىداي اس ءمازىرىن تاڭداۋعا بولادى. بىزگە جاقسى قىزمەت كورسەتىلەدى»، - دەيدى ماقپال شاحاربايەۆا.
ونىڭ پىكىرىنشە، تۇرعىنداردىڭ، اسىرەسە بالالاردىڭ قاۋىپسىزدىگىنە باسا ءمان بەرىلگەن. بالالار ويناۋعا شىقسا، كۇزەتشىلەر باقىلايدى، ياعني قاۋىپسىزدىك قاتاڭ ساقتالادى.
ايتا كەتسەك، الەۋمەتتىك جەلىدە كىشكەنتاي بالانىڭ سوڭىنان جۇگىرگەن وسىنداعى كۇزەتشىنىڭ سۋرەتى تارادى. بۇل سۋرەت كوپشىلىكتىڭ جۇزىنە كۇلكى ۇيالاتقان ەدى.
«تەڭىزدە» وتە سۇيكىمدى «ماسەلە» پايدا بولدى» دەگەن پىكىر جازعاندار بار.
ۆاحتالىق كەنتتىڭ ۋاقىتشا تۇرعىندارى ءۇشىن بالالار ءبارى قىزىق. ماسەلەن، قوقىس سۇرىپتاۋعا ارنالعان ءتۇرلى-ءتۇستى كونتەينەرلەر تاڭسىق كورىنگەن.
«مۇندا قوقىستىڭ بارلىعىن سۇرىپتايدى ەكەن. تاڭەرتەڭ بالالارىمدى ەرتىپ، قوقىستاردى سۇرىپتاۋ نەلىكتەن ماڭىزدى ەكەنىن ءتۇسىندىردىم. قۇلسارىعا ورالعان سوڭ مەن دە قوقىستاردى سۇرىپتاۋدى باستايمىن. ءتىپتى ءبىر مينۋتتا قانشا ليتر سۋدى ۇنەمدەۋگە بولاتىنى تۋرالى نۇسقاۋلار جازىلىپ قويىلعان. ءبىر قاراعاندا، قاراپايىم عانا نارسە سەكىلدى عوي. ءبىراق، «تەڭىزدەگى» ۆاحتالىق كەنتكە كەلگەنگە دەيىن بۇعان ونشا ءمان بەرمەپپىن. مۇندا «اۋادا كۇكىرتتى سۋتەگى ساسىپ جاتىر» دەگەندى ەستۋشى ەدىم. بۇل شىندىققا جاناسپايتىن سەكىلدى. وسىندا كەلگەلى باسىم اۋىرمايتىن بولدى. اۋا تازا ەكەن. ال، تازا اۋا كۇش-قۋات بەرەدى. ءوندىرىس ورنى بولعانىمەن، مۇندا كولىكتەر دە از»، - دەيدى بەس بالانىڭ اناسى ايناگۇل.
قۇلسارى قالاسىن سۋ باسقاندا الدىمەن «اspar Kashagan» سەرىكتەستىگى كومەككە ۇمتىلىپتى. ول - «تەڭىزشيەۆرويل» مەردىگەرلەرىنىڭ ءبىرى. سەرىكتەستىك باسشىلىعى تەحنيكالىق قولداۋ مەن گۋمانيتارلىق كومەكتەن بولەك، ۆاحتالىق كەنتتەگى جاتاقحانالارعا 700 دەن استام ادامدى جايعاستىرۋعا شەشىم قابىلدادى.
«ءبىز جىلىوي اۋدانىندا جۇمىس ىستەيمىز. وسىنداي قيىن كۇندەردە جىلىويلىقتارعا قالاي كومەكتەسپەيمىز؟ ەۆاكۋاتسيالانعان تۇرعىندار ازىق- تۇلىكپەن جانە مەديتسينالىق كومەكپەن قامتاماسىز ەتىلدى. قازىر بالالار جالىقپاۋى ءۇشىن ءتۇرلى تۋرنير ۇيىمداستىرىپ جاتىرمىز»، - دەيدى سەرىكتەستىكتىڭ وندىرىستىك مەنەدجەرى سالتانات سۇلەيمەنوۆا.
ال، «Caspian Offshore Construction Realty» سەرىكتەستىگى يەلىگىندەگى «بولاشاق» ۆاحتالىق قالاشىعىندا 3000 ادام ورنالاسقان. بۇل - «تەڭىز» كەنىشىندەگى ۇلكەن جاتاقحانالاردىڭ ءبىرى. قالاشىق مەڭگەرۋشىسى عالىمجان ءابىردىڭ ايتۋىنشا، ولار ءتورت ساعاتتا قاجەتتى بولمەلەردى دايىنداپ، 2 مىڭنان استام ادامدى قابىلداعان. قازىر مۇندا ورنالاسقان تۇرعىندار سانى 3 مىڭعا جەتتى.
«ءارقاشان قانشا بولمە جانە تاماق قاجەت ەكەنىن الدىن الا جوسپارلايتىن ەدىك. ءبىراق، بۇل جولى ءبارى باسقاشا بولىپ، قۇلسارى تۇرعىندارىن تەز قابىلدادىق. ولاردىڭ سۋ تاسقىنىنان كەيىن ۇرەيگە بوي الدىرعانىن، ءتىپتى ۋايىمداعانىن بىلەمىز. سوندىقتان ءبىزدىڭ ۇجىم تۇرعىندار ءۇشىن قولدان كەلگەننىڭ ءبارىن جاساۋعا تىرىستى. قازىر تۇرعىندار ۇرەيدەن ارىلىپ، وزدەرىن ۇيدەگىدەي سەزىنەدى»، - دەيدى عالىمجان ءابىر.
قۇلسارى قالاسىنان ەۆاكۋاتسيالانعان ايەلدەر مۇندا بوس جۇرگەن جوق. ولاردىڭ كەيبىرى ۆاحتالىق قالاشىقتاعى اسپازدارعا، ەندى بىرەۋلەرى تەحنيكالىق قىزمەتكەرلەرگە كومەكتەسىپ ءجۇر. ولار وسىنداي قيىن ساتتەردە ءبىر-بىرىنە قولداۋ كورسەتۋ ماڭىزدى ەكەنىن تۇسىنەدى.
«ءيا، ءبىز - مۇندا ۋاقىتشا قوناقپىز. ونى ءوزىمىز دە سەزىنىپ ءجۇرمىز. ءبىراق، تاڭەرتەڭنەن كەشكە دەيىن قول قۋسىرىپ وتىرعىمىز كەلمەيدى. سوندىقتان ءبىز قىزمەتكەرلەرگە كومەكتەسەمىز. كومەكتەسكەننىڭ ەش ايىبى جوق»، - دەيدى قۇلسارىدان ەۆاكۋاتسيالانعان ايەلدەردىڭ ءبىرى.
سونداي-اق، «نەفتەسترويسەرۆيس» سەرىكتەستىگى قىزمەتكەرلەرى بالالارمەن جاقسى قارىم- قاتىناس ورناتقان. كومپانيا جاتاقحانالارىندا 100 دەن استام ادام تۇرادى. ولاردىڭ كوپشىلىگى - كىشكەنتاي بالالار مەن ايەلدەر. كومپانيا بالالاردى كينوتەاترعا اپارعان.
«ەندى بالالارعا كۇنىنە بىرنەشە رەت مۋلتفيلمدەر كورسەتەتىن بولامىز. كينوتەاترعا باسقا جاتاقحانالارعا ورنالاسقان بالالار دا كەلەدى. بالالاردىڭ ۆاحتالىق قالاشىقتان جاقسى اسەر العانىن قالايمىز. كەيىن ەستەلىك رەتىندە ايتىپ جۇرەتىن بولادى»، - دەيدى سەرىكتەستىكتىڭ ەڭبەك قاتىناستارى جونىندەگى مەنەدجەرى ازامات وتەمىسوۆ.
تاعى ءبىر مەردىگەر - «سەنىمدى قۇرىلىس» سەرىكتەستىگى قۇلسارى قالاسى مەن تۇرعىزبا اۋىلىنان ەۆاكۋاتسيالانعان 800 گە جۋىق تۇرعىندى قابىلداپتى. كاسىپورىن تۇرعىنداردى كۇندەلىكتى مەديتسينالىق تەكسەرۋدەن وتكىزىپ، تۇرمىسقا قاجەتتى تاۋارلاردىڭ بارلىعىن قامتاماسىز ەتىپ وتىر.
«سۋ تاسقىنىنان زارداپ شەككەن تۇرعىنداردىڭ كوپشىلىگى - قارتتار، بالالار مەن جۇكتى انالار. سوندىقتان تۇرعىنداردىڭ دەنساۋلىعىن قاداعالاۋعا ارنايى مەديتسينا ماماندارىن شاقىردىق. ءبىزدىڭ قاۋىپسىزدىك قىزمەتكەرلەرى كۇن سايىن تۇرعىندارعا نۇسقاۋلار وتكىزەدى. ويتكەنى، ۇيلەرىن سۋ باسقان تۇرعىندارعا پسيحولوگيالىق قولداۋ كورسەتۋ وتە ماڭىزدى. وسىعان بايلانىستى ءاربىر ادامعا جايلى جاعداي جاساپ، قولداۋ كورسەتۋدى كوزدەدىك. كەز كەلگەن ماسەلە بويىنشا قولىمىزدان كەلگەندى جاساۋعا بار كۇشىمىزدى سالىپ وتىرمىز»، - دەيدى كومپانيا ديرەكتورىنىڭ ورىنباسارى جازيرا انەس قىزى.
اۆتور
جولداسبەك شوپەعۇل
