بارلىق بالاباقشانى نە ءۇشىن ليتسەنزيالاۋ كەرەك بولىپ جاتىر
استانا. KAZINFORM — وقۋ-اعارتۋ ۆيتسە-ءمينيسترى ەدىل وسپان ەلىمىزدەگى مەكتەپكە دەيىنگى ءبىلىم بەرۋ ۇيىمدارىن باقىلاۋ ءىس-شارالارىنا قاتىستى تۇسىنىك بەردى.
- بۇگىن سەناتتا ماقۇلدانعان زاڭ نورماسىنا سايكەس، مەنشىك نىسانىنا قاراماستان بارلىق مەكتەپكە دەيىنگى ءبىلىم بەرۋى ۇيىمدارىن ليتسەنزيالاۋ ەنگىزىلەدى. 2011-جىلعا دەيىن جالپى ەلىمىزدەگى بالاباقشالارعا ليتسەنزيالاۋ بولعان. ەندى 2027-جىلدان باستاپ ليتسەنزيالاۋ ءتارتىبى قايتارىلادى، - دەدى ە. وسپان سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
ونىڭ ايتۋىنشا، بۇل شەشىم بالالاردىڭ قۇقىعىن قامتاماسىز ەتۋدى كۇشەيتۋگە، مەكتەپكە دەيىنگى ءبىلىم ساپاسىن ارتتىرۋعا باعىتتالعان.
- ليتسەنزيالاۋ كەزىندە قاۋىپسىزدىكپەن قاتار، بالاباقشالاردىڭ ماتەريالدىق-تەحنيكالىق جابدىقتالۋىنا قاتىستى تالاپتار قويىلادى، - دەدى ۆيتسە-مينيستر.
2011-جىلدان بەرى بالاباقشالار جۇمىسىن باستاۋ ءۇشىن ليتسەنزيا المايدى، تەك قانا جۇمىسىن باستاعانى تۋرالى حابارلاما بەرەدى.
بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك ناگرادالار، ءبىلىم بەرۋ جانە بالانىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ەكى وقىلىمدا قارالىپ، ماقۇلداندى.
زاڭ اياسىندا 2027-جىلعى 1-قاڭتاردان باستاپ مەكتەپكە دەيىنگى تاربيە بەرۋ مەن وقىتۋ سالاسىندا قىزمەت كورسەتەتىن ۇيىمداردى ليتسەنزيالاۋ ءتارتىبى ەنگىزىلدى.
ەسكە سالساق، بيىل قاراشا ايىندا ءماجىلىس دەپۋتاتى ەدىل جاڭبىرشين بالاباقشالاردى ليتسەنزيا ارقىلى باقىلاۋ تەتىگىن تەزىرەك ەنگىزۋدى ۇسىندى.
