باقىتتى ادامدار كىشىپەيىل كەلەدى - زەرتتەۋ
تۇركيادا جۇرگىزىلگەن زەرتتەۋ كىشىپەيىلدىلىكتى حالىقتىڭ ەرەكشە پسيحولوگيالىق قاسيەتى رەتىندە قاراستىرۋعا بولاتىنىن كورسەتتى. زەرتتەۋ ناتيجەسىندە كىشىپەيىلدىلىك دەپرەسسيا سيمپتومدارىمەن كەرى بايلانىستا، ال سۋبەكتيۆتى باقىتپەن وڭ بايلانىستا ەكەنى انىقتالدى. ياعني، كىشىپەيىل ادامدار ادەتتە باقىتتىراق بولادى. زەرتتەۋ Psychological Reports جۋرنالىندا جاريالاندى.
كىشىپەيىلدىك - پروسوتسيالدىق مىنەز-قۇلىقتىڭ ءبىر ءتۇرى. مىسالى، جىلى سويلەسۋ، كۇلىمدەۋ، العىس ايتۋ نەمەسە جىلى سوزدەر ايتۋ - وسى قاراپايىم ارەكەتتەر باسقا ادامنىڭ ءومىرىن جاقسارتىپ، ءوزىڭىزدى دە باقىتتىراق ەتە الادى.
پروسوتسيالدىق مىنەز- قۇلىقتىڭ ەۆوليۋتسيالىق تامىرى بار، ويتكەنى ول توپتىڭ ءومىر ءسۇرۋىن جانە بىرلىگىن نىعايتادى. ول سەنىمدى ارتتىرىپ، جانجالداردى ازايتادى جانە ادامدار اراسىنداعى ۇيلەسىمدى قارىم-قاتىناستاردى جاقسارتادى. سونىمەن قاتار، باسقالارعا كومەكتەسۋ ادامنىڭ ەموتسيونالدىق ءال-اۋقاتىن ارتتىرىپ، باقىت، ومىرگە قاناعاتتانۋ سەزىمىن كۇشەيتەدى.
تۇركيا عالىمى سينان وكۋر جانە ونىڭ ارىپتەستەرى جۇرگىزگەن زەرتتەۋ ەكى كەزەڭدە ءوتتى:
ءبىرىنشى كەزەڭگە 18-71 جاس ارالىعىنداعى 404 ادام قاتىستى، ولاردىڭ ورتاشا جاسى - 32 جاس. قاتىسۋشىلار كىشىپەيىلدىلىك شكالاسىن جانە تۇلعالىق قاسيەتتەر مەن ومىرلىك قۋات دەڭگەيىن باعالايتىن تەستتەردى تولتىردى.
ەكىنشى كەزەڭدە 372 قاتىسۋشى كىشىپەيىلدىلىك شكالاسىن، دەپرەسسيا، سترەسس جانە سۋبەكتيۆتى باقىت دەڭگەيىن باعالاۋ تەستتەرىن تولتىردى.
ناتيجەسىندە، كىشىپەيىلدىلىك شكالاسى تۇرىك قوعامىندا سەنىمدى جانە ءتيىمدى ەكەنى انىقتالدى. زەرتتەۋ كىشىپەيىلدىلىك دەڭگەيىن ارتتىرۋ دەپرەسسيانى ازايتىپ، سۋبەكتيۆتى باقىتتى ارتتىراتىنىن كورسەتتى.
