باقىتجان بازاربەك جول اپاتى تۋرالى: اسىعىس قورىتىندى جاساماڭىزدار
استانا. KAZINFORM - بۇرىنعى ءماجىلىس دەپۋتاتتى باقىتجان بازاربەك Facebook الەۋمەتتىك جەلىسىندە جازبا جاريالاپ، قالىڭ كوپشىلىكتى ءوزى تۇسكەن جول اپاتىنا قاتىستى تاراپ جاتقان اقپاراتتار بويىنشا اسىعىس بايلام جاساماۋعا شاقىردى.
- مەنىڭ قاتىسۋىممەن بولعان جول-كولىك وقيعاسىنا قاتىستى كوپتەگەن بولجامدار مەن ءتۇرلى اڭگىمەلەرگە جاۋاپ بەرە المايمىن جانە كوپ نارسەنى جازۋعا دا مۇمكىندىگىم جوق. قوزعالعان سوتقا دەيىنگى تەرگەپ-تەكسەرۋ اياسىندا مەن جانە جۇبايىم سوتقا دەيىنگى تەرگەپ-تەكسەرۋ دەرەكتەرىن جاريا ەتپەۋ تۋرالى قولحات بەردىك، - دەپ جازدى ول.
سونداي-اق ەكس-دەپۋتات وسى ۋاقىتتا جول اپاتىنا قاتىستى تەرگەۋ امالدارى ءجۇرىپ جاتقانىن ايتتى. قازىر قاجەتتى ساراپتامالار جۇرگىزىلەدى دەپ كۇتىپ وتىرمىز. تەرگەپ-تەكسەرۋ ورگاندارى زاڭ تالاپتارىنا سايكەس، بولعان وقيعانىڭ ءمان-جايىنا وبەكتيۆتى ءارى ءادىل باعا بەرەدى دەپ سەنەمىن.
- قازىر مەن ءۇشىن ەڭ باستىسى - زارداپ شەككەن ازاماتتىڭ، ونىڭ جاقىندارى مەن تۋىستارىنىڭ قاسىندا بولىپ، ولارعا قاجەتتى كومەك كورسەتۋ. ءبىز بىرنەشە كۇن بويى ۇيىقتاماي، ونىڭ تۋعان-تۋىستارىمەن بىرگە ونىڭ ساۋىعىپ كەتۋىن تىلەپ، دۇعا جاساپ وتىرمىز. كورسەتىلگەن شۇعىل مەديتسينالىق كومەك ءۇشىن اۋداندىق اۋرۋحانانىڭ بارلىق دارىگەرلەرىنە، سونداي-اق دەنساۋلىق ساقتاۋ مينيسترلىگى مەن وبلىستىق دەنساۋلىق ساقتاۋ باسقارماسىنا ەرەكشە العىسىمدى بىلدىرەمىن، - دەدى ول.
سونداي-اق ول الەۋمەتتىك جەلىلەردە قازىردىڭ وزىندە ءتۇرلى نۇسقالار مەن الىپ-قاشپا اڭگىمەلەر تاراپ جاتقانىن، وسىعان قاراي قالىڭ كوپشىلىكتى اسىعىس قورىتىندى جاساماي، تەك رەسمي اقپارات پەن تەرگەۋ ناتيجەلەرىنە سەنۋگە شاقىردى.
- وسى قيىن كۇندەردە الاڭداپ، قولداۋ كورسەتىپ جاتقان بارشاڭىزعا راحمەت!، - دەدى باقىتجان بازاربەك.
