باقتاشى ءوزى جۇمىس ىستەگەن قوجالىقتىڭ 20 عا جۋىق جىلقىسىن ۇرلاعان

وسكەمەن. KAZINFORM - شىعىس قازاقستان وبلىسى زايسان اۋدانىندا ەر ادام ءوزى جۇمىس ىستەگەن قوجالىقتىڭ 20 عا جۋىق جىلقىسىن ۇرلاعان.

ش ق و پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، ءتارتىپ ساقشىلارى ءىرى كولەمدە مال ۇرلاعان 50 جاستاعى ەر ادامدى ۇستادى.

- بەلگىلى بولعانداي، ول ءوزى جۇمىس ىستەگەن شارۋا قوجالىعىنىڭ 17 باس جىلقىسىن ۇرلاعان. ولاردى باسقا قوراعا ايداپ اپارىپ، 200 مىڭنان 800 مىڭ تەڭگەگە دەيىن ساتىپ كەلگەن. الدىن الا دەرەك بويىنشا وسىنىڭ سالدارىنان مال يەسىنە كەلتىرىلگەن جالپى شىعىن مولشەرى 5 ميلليون تەڭگەدەن اسادى، - دەلىنگەن اقپاراتتا.

قازىرگى تاڭدا كۇدىكتىگە قاتىستى قىلمىستىق ءىس قوزعالدى. پوليتسيا ۇرلانعان مالدىڭ ءبىر بولىگىن تاۋىپ، يەسىنە قايتاردى.

- تەرگەۋ امالدارى جالعاسىپ جاتىر. قالعان مالدى تابۋ ءۇشىن ىزدەۋ جۇمىستارى جۇرگىزىلىپ جاتىر. وسى رەتتە، شارۋا قوجالىق يەلەرىنە مالدى ۇنەمى تەكسەرىپ وتىرۋدى، باقىلاۋدى كۇشەيتىپ، جۇمىسشى تاڭداۋدا مۇقيات بولۋ قاجەتتىگىن ەسكەرتەمىز، - دەلىنگەن حابارلامادا.

ەسكە سالساق، وسىعان دەيىن الماتىدا ەكى ەر ادامنان 190 sim-كارتا مەن sim-box قۇرىلعىسى تاركىلەنگەنى حابارلانعان.