بانگكوكتا 14 جاسار بالا ەلگە وق جاۋدىردى: ءۇش ادام قازا تاپتى
تايلاند استاناسى بانگكوكتاعى «سيام پاراگون» ساۋدا ورتالىعىندا اتىس بولىپ، ءۇش ادام قازا تاپتى.

قازاقپارات بۇل تۋرالى BBC اقپارات اگەنتتىگىنە سىلتەمە جاساپ حابارلايدى.
وقيعا سالدارىنان تاعى ءتورت ادام زارداپ شەكتى. ولاردىڭ اراسىندا شەتەل ازاماتى بار.
شابۋىل جاسادى دەگەن كۇدىكپەن 14 جاسار جاس ءوسپىرىم ۇستالىپ، پوليتسياعا تاپسىرىلدى.
ول تاپانشادان وق جاۋدىرعان دەپ شامالانىپ وتىر.
شابۋىلعا نە سەبەپ بولعانى ازىرگە حابارلانعان جوق.
ەل پرەمەر-ءمينيسترى جاعدايدىڭ باقىلاۋعا الىنعانىن ايتتى.
بۇعان دەيىن الەۋمەتتىك جەلىلەردە كەلۋشىلەردىڭ ساۋدا ورتالىعىنان جۇگىرىپ شىققانى كورىنىپ تۇرعان كادرلار تارادى.
ساۋدا ورتالىعى شۇعىل ەۆاكۋاتسيالانىپ، جاقىن ماڭداعى «سيام» مەتروسىنىڭ ستانتسياسى سياقتى جابىلدى.
جەلىدە ساۋدا ورتالىعىنىڭ ىشىندە تۇسىرىلگەن بەينەجازبالار پايدا بولدى. ونىڭ بىرىندە ادامعا تولى كەشەندە ءتورت رەت وق اتىلعانعا ۇقساس قاتتى دىبىس شىققانى انىق ەستىلىپ تۇر.
پرەمەر-مينيستر سرەتتا تاۆيسين قازا بولعاندار مەن ولاردىڭ وتباسىلارىنا قايعىرىپ كوڭىل ايتتى.
تايلاندتا باسقا ەلدەرمەن سالىستىرعاندا حالىقتىڭ قولىندا اتىس قارۋى كوپ بولعانىمەن، جاپپاي اتىس وقيعالارى - سيرەك جاعداي.
وتكەن جىلدىڭ قازان ايىندا ەلدىڭ سولتۇستىك-شىعىسىنداعى نونگ بۋا لامپحۋ پروۆينتسياسىنداعى بالالار ورتالىعىندا بۇرىنعى پوليتسەي قولىنان كەم دەگەندە 37 ادام قازا تاپتى، ولاردىڭ كوبى بالالار.
2020-جىلى ناكحونراتچاسيما قالاسىندا اسكەري قىزمەتكەر 29 ادامدى ءولتىرىپ، ونداعان ادامدى جاراقاتتادى.