بانكتەر موبيلدى اۋدارىمدار كوميسسياسىن قاشان تۇسىرەدى - ۇلتتىق بانك جاۋابى
استانا. KAZINFORM - ۇلتتىق بانك ءتوراعاسىنىڭ ورىنباسارى بەرىك شولپانقۇلوۆ سەناتتاعى دوڭگەلەك ۇستەلدە بانكتەر اراسىنداعى موبيلدى اۋدارىم كوميسسياسى قاشان تۇسەتىنىن ايتتى.
- بانكتەر اراسىنداعى اۋدارىمدارمەن بايلانىستى كوميسسيا تاريفتەرىن بىرىزدەندىرۋدى ويلاستىرىپ جاتىرسىزدار ما؟ وتكەندە ايتتىم، «حالىق بانكتەن» 200 تەڭگە اۋدارىلىپ كەتكەن اقشانى Kaspi bank قايتارىپ بەرۋ ءۇشىن 3600 تەڭگە كوميسسيا الادى ەكەن. مەن بۇل ادىلەتسىز دەپ ويلايمىن. كوميسسيالاردىڭ ماسەلەسى وتە سالماقتى، - دەپ سۇرادى سەناتور بەكبولات ورىنبەكوۆ.
بەرىك شولپانقۇلوۆ بۇل Mastercard ،Visa حالىقارالىق جۇيەلەرىنىڭ تالابى ەكەنىن ايتادى.
- قازىر بانكتەر اراسىنداعى اۋدارىم ترانزاكتسيالارى Mastercard حالىقارالىق تولەم جۇيەسىنىڭ كارتالارى ارقىلى جاسالادى. سولاردىڭ تاريف ساياساتى قولدانىلىپ وتىر. ءوزىمىز دايىنداعان موبيلدى اۋدارىمداردىڭ Open API جۇيەسى تۋرالى نەگە ايتىپ وتىرمىن؟ ءوز بانكتەرىمىزدىڭ اراسىندا وسى جۇيە ارقىلى اۋدارىم جاساۋعا مۇمكىندىك تۋادى. وسىنداي جاعدايدا كوميسسيا تاريفى جۇيەگە قاتىساتىن بانكتەرگە بايلانىستى بولادى. وسى تۇرعىدا تاريفتەر كوميتەتىن قۇردىق. وسىلايشا بانكتەردىڭ تاريفتەرىن تومەندەتۋ باعىتىندا شەشىمدەر قابىلدايمىز. ويتكەنى ارادا ءۇشىنشى ويىنشى بولمايدى، - دەدى ول.
ۇلتتىق بانك وكىلى بۇل جۇيە موبيلدى اۋدارىمدار بويىنشا دا، QR تولەمدەر بويىنشا دا جۇمىس ىستەيتىنىن ايتادى.
- قازىر بانكتەر اراسىنداعى بۇكىل اۋدارىمدار Mastercard ،Visa حالىقارالىق جۇيەلەرى ارقىلى ءوتىپ جاتىر. ولاردىڭ ءوز تاريف ساياساتى بار. دەگەنمەن ولار دا بيىل كوميسسيا تاريفىن 3 پايىزدان 1 پايىزعا دەيىن ءتۇسىرىپ وتىر. ءوز بانكتەرىمىز اراسىنداعى اۋدارىم جۇيەسىن ىسكە قوسقان ساتتە-اق، ول كوميسسيا تاريفتەرى قۇلايدى، - دەدى بەرىك شولپانقۇلوۆ.
بۇعان دەيىن ۇلتتىق بانك مامىر ايىندا ۇلتتىق قوردان 1 ميلليارد دوللار ساتۋى مۇمكىن ەكەنىن جازعان ەدىك.
