بانكتەر مەرزىمى وتكەن نەسيەنى كوللەكتورعا ساتۋىنا شەكتەۋ ەنگىزىلەدى

بانكتەر مەن ميكروقارجى ۇيىمدارىنا جەكە ادامداردىڭ پروبلەمالى نەسيەلەرىن كوللەكتورلىق اگەنتتىكتەرگە ساتۋىنا شەكتەۋ ەنگىزىلەدى.

بۇل تۋرالى پارلامەنت ماجىلىسىندە كرەديت بەرۋ كەزىندە تاۋەكەلدەردى ازايتۋعا ارنالعان زاڭ جوباسىنىڭ تانىستىرىلىمىندا دەپۋتات ءمادي تاكيەۆ ايتتى، دەپ حابارلايدى Kazinform.

ونىڭ ايتۋىنشا، كەيىنگى جىلدارى بانكتەر مەن ميكروقارجى ۇيىمدارى ءوز بالانستارىن تازارتۋ ءۇشىن جەكە تۇلعالاردىڭ پروبلەمالى نەسيەلەرىن ۇلكەن جەڭىلدىكپەن كوللەكتورلىق اگەنتتىكتەرگە بەرۋ تاجىريبەسى قالىپتاستى. سوندىقتان بانكتەر مەن ميكروقارجى ۇيىمدارىنىڭ كوللەكتورلىق اگەنتتىكتەرگە ازاماتتاردىڭ نەسيەلەرىن ساتۋىنا شەكتەۋ ەنگىزۋ قاراستىرىلعان.

«اتاپ ايتقاندا، پروبلەمالى نەسيەلەر بويىنشا ءتيىستى پروتسەدۋرالار بانكتىڭ وزىندە بولۋى كەرەك. باستاپقىدا 24 اي بەرىلەدى، ياعني قارىزدىڭ قۇرىلىمىن قايتا قاراۋ، كرەديتىن ازايتۋ مەن پايىزىن تومەندەتۋ ءىس-شارالارى قاراستىرىلۋى ءتيىس. بۇل جۇمىستار ەسكەرىلىپ، ەكى جىلدان كەيىن عانا بورىشتى كوللەكتورلارعا ساتا الادى. ال قازىرگى جاعداي قالاي؟ بانكتەر ءوز پورتفەلىن جاقسارتۋ ءۇشىن وسىنداي نەسيەلەردى جيناپ الىپ، كوللەكتورلارعا تومەن سوماعا ساتىپ جىبەرەدى. ماسەلەن، بانكتە 500 ميلليون تەڭگە سوماسىندا نەسيەسىن وتەمەي جۇرگەن ادامداردىڭ قارىزىن 300 ميلليون تەڭگەگە كوللەكتورلارعا بەرە سالادى»، - دەدى ءمادي تاكيەۆ Kazinform تىلشىسىنە بەرگەن سۇحباتىندا.

دەپۋتاتتىڭ سوزىنە قاراعاندا، ءوز كەزەگىندە كوللەكتورلار اتالعان 500 ميلليون تەڭگەنى تۇگەل ءوندىرىپ الۋعا تىرىسادى.

«وسى جاعدايدا كوللەكتورلار قارىزدى ءوندىرىپ الۋ كەزىندە دورەكى ارەكەتتەرگە بارىپ جاتاتىنى قوعامدا ءجيى كوتەرىلىپ ءجۇر. سوندىقتان وسىعان جەتكىزبەس ءۇشىن بانكتەر الدىمەن ءوز جۇمىسىندا ءتيىستى ءىس-قيمىلداردى جۇزەگە اسىرۋى ءتيىس. مۇنداي قادامدار بۇگىن ماجىلىستە تانىستىرىلعان زاڭ جوباسىندا پىسىقتالادى»، - دەدى م. تاكيەۆ.

ايتا كەتەيىك، بۇگىن ماجىلىستە پارلامەنتتىڭ ءبىر توپ دەپۋتاتى باستاماشى بولعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كرەديت بەرۋ كەزىندە تاۋەكەلدەردى ازايتۋ جانە قارىز الۋشىلاردىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تانىستىرىلدى.