بانكتەر بيزنەسكە قولداۋ جاساۋ جۇمىسىن جانداندىرۋى ءتيىس - ساراپشى
استانا. قازاقپارات - بانكتەرگە قاتىستى سالىق مولشەرىن قايتا قاراۋ كەرەك. بۇل تۋرالى بەلگىلى ساياساتتانۋشى، ساراپشى تالعات قاليەۆ ايتتى.
«ساياسي رەفورمالار تۇرعىسىنان الىپ قاراساق، اۋدان جانە وبلىستىق دەڭگەيدەگى قالالاردىڭ اكىمدەرىن سايلاۋدى ەنگىزۋ ماڭىزدى سانالادى. بۇل باستاما ۇلتتىق قوعامدىق سەنىم كەڭەسى وتىرىسىندا ايتىلعان ەدى. اتاپ ايتقاندا، بۇل باعىتتاعى قادامدارعا تالداۋ جاسالىپ، ونىڭ ناتيجەسى وڭتايلى دەپ تانىلدى. سوندىقتان وسى ينستيتۋتتى جەرگىلىكتى جەرلەردە ەنگىزۋ شەشىمى جاسالدى. جالپى، بۇل شەشىمدى وتە ماڭىزدى سانايمىن، سەبەبى ازاماتتاردىڭ ءومىر ءسۇرۋ ساپاسىنا تىكەلەي اسەر ەتەدى»، - دەدى ت. قاليەۆ
بۇدان بولەك ساراپشى پرەزيدەنت جولداۋىندا بانك سەكتورىنا قاتىستى ايتىلعان ۇسىنىستارعا توقتالدى.
«ەلىمىزدەگى بانكتەر ەكونوميكانىڭ ناقتى سەكتورىنا نەسيە ءبولۋ باعىتىندا بيزنەسپەن بەلسەندى جۇمىسىن جانداندىرۋى ءتيىس. ماسەلەن، شەتەلدەگى ءىرى بانكتەر بيزنەستىڭ دامۋىنا ەرەكشە ءمان بەرىپ جاتىر، ياعني ولاردىڭ تابىستى ينۆەستيتسيا سالۋىنا قولداۋ جاساپ، بيزنەس جوسپاردى دايارلاۋعا اتسالىسىپ وتىر. ولارعا وزدەرىنىڭ كليەنتتەرىنىڭ داۋلەتى ارتقانى ءتيىمدى. بۇل تۇرعىدا ءبىزدىڭ دە بانكتەر وسى جاعىنان بەلسەندى بولۋى كەرەك»، - دەدى ساياساتتانۋشى.
ونىڭ پايىمىنشا، بانكتەرگە قاتىستى سالىق مولشەرىن قايتا قاراۋ كەرەك.
«ولاردىڭ قوماقتى ديۆيدەند الىپ وتىرعان كورىپ وتىرمىز. دەگەنمەن، تولەپ جاتقان سالىعى سونشالىقتى ەلەۋلى ەمەس»، - دەدى ساياساتتانۋشى.
ايتا كەتەيىك، بۇگىن قازاقستان حالقىنا جولداۋىندا پرەزيدەنت قاسىم-جومارت توقايەۆ بانكتەردىڭ اكسيونەرلەرى ديۆيدەندىنە سايكەس سالىق تولەۋى كەرەك ەكەنىن ايتتى.
وسى ورايدا «بانكتەر تۋرالى» جاڭا زاڭ قاجەت ەكەنى اتاپ ءوتىلدى.
سونىمەن قاتار مەملەكەت باسشىسى بۇدان بىلاي اۋدان جانە وبلىستىق ماڭىزى بار قالالاردىڭ اكىمدەرى تىكەلەي سايلاۋ ارقىلى عانا قىزمەتكە كەلەتىنىن جەتكىزدى.
