بانكتەر اراسىنداعى ورتاق QR كودقا ەكى بانك قانا قوسىلعان

استانا. KAZINFORM - ۇلتتىق بانك ءتوراعاسىنىڭ كەڭەسشىسى - سيفرلىق ترانزاكتسيالار جونىندەگى جەتەكشى بينۇر جالەنوۆ بانكتەر اراسىنداعى ءبىرىڭعاي موبيلدى اۋدارىم جۇيەسى قاشان جۇمىس ىستەي باستايتىنىن ايتتى.

- جۇيە بىلتىر ازىرلەنىپ، قاناتقاقتى رەجيمدە ىسكە قوسىلعان بولاتىن. بۇگىنگى تاڭدا بانكتەر كەزەڭ-كەزەڭمەن وسى جۇيەگە قوسىلىپ جاتىر. ۇلتتىق تولەم كورپوراتسياسى 9 بانكپەن كەلىسىمشارت بەكىتتى. ول توعىز بانك -حالىق بانك، بانك سەنتر كرەديت، Freedom bank، ر ب ك، التىن بانك، بەرەكە بانك، Forte bank, HomeCredit bank جانە Nurbank.

كەلىسىمشارتتىڭ بەكىتىلۋى اتالعان بانكتەر جۇيەگە قوسىلاۋ باعىتىندا بەلسەندى جۇمىس ىستەپ جاتىر دەگەن ءسوز. ءبىز ماۋسىم ايىندا كليەنتتەر العاشقى بەس بانكتىڭ اراسىندا تەلەفون ءنومىرى بويىنشا اۋدارىم جاساي باستايدى دەپ كۇتىپ وتىرمىز. تىزىمدەگى بەس بانك -حالىق بانك، Freedom،RBK، التىن بانك جانە Home Credit. كەيىن وزگەلەرى دە قوسىلادى، - دەدى بينۇر جالەنوۆ ۇلتتىن بانكتە ءوتىپ جاتقان باسپا ءسوز ءماسليحاتىندا. سونداي-اق، ول بانكتەر اراسىنداعى QR تولەمدەر قۇرالى قولدانىسقا دايىن ەكەنىن ءمالىم ەتتى.

- Freedom bank پەن RBK جۇمىستى اياقتادى. ونىڭ سىرتىندا تاعى 4 ەكىنشى دەڭگەيلى بانكپەن بەلسەندى جۇمىس ءجۇرىپ جاتىر. جىل اياعىنا دەيىن بىرنەشە بانك وسى قۇرالدى ىسكە قوسادى دەپ كۇتىپ وتىرمىز، - دەدى ۇلتتىق بانك باسشىسىنىڭ كەڭەسشىسى.

بۇعان دەيىن ۇلتتىق بانك ءتوراعاسىنىڭ ورىنباسارى بەرىك شولپانقۇلوۆ بانكتەر موبيلدى اۋدارىمدار كوميسسياسىن قاشان تۇسىرەتىنىن ايتقان ەدى.