بانكتەر الاياق قۇرباندارىنىڭ شىعىنىن وتەۋگە مىندەتتى بولۋى مۇمكىن

استانا. KAZINFORM - بانكتەر مەن ۇيالى بايلانىس وپەراتورلارى الاياق قۇرباندارىنىڭ شىعىندارىن وتەۋگە مىندەتتى بولۋى مۇمكىن. مۇنداي مۇمكىندىكتى ىشكى ىستەر مينيسترلىگى قاراستىرىپ جاتىر.

— ەكىنشى دەڭگەيلى بانكتەر مەن ۇيالى بايلانىس وپەراتورلارىنا ولاردىڭ ينفراقۇرىلىمىن پايدالانا وتىرىپ جاسالاتىن الاياقتىق ءىس- قيمىلدار ءۇشىن زارداپ شەككەن ازاماتتىڭ شىعىندارىن وتەۋ مىندەتتەمەسى بار ىنتىماقتى جاۋاپكەرشىلىك جۇكتەۋ باستاماسى قاراستىرىپ جاتىر، - دەلىنگەن ۆەدومستۆونىڭ اگەنتتىك ساۋالىنا بەرگەن جاۋابىندا.

ەلىمىزدە قۇقىق قورعاۋ ورگاندارى، ەكىنشى دەڭگەيلى بانكتەر جانە قارجىلىق مونيتورينگ اگەنتتىگى ازاماتتار مەن قارجى جۇيەسىن الاياقتاردان قورعاۋعا باعىتتالعان كەشەندى ءىس-شارالاردى جۇزەگە اسىرىپ جاتىر.

ىشكى ىستەر مينيسترلىگىنىڭ اقپاراتىنا قاراعاندا، مۇنداي ءىس- شارانىڭ ءبىرى — ەكىنشى دەڭگەيلى بانكتەر جۇيەسىن قۇقىق قورعاۋ ورگاندارىنىڭ دەرەكتەر بازاسىمەن قوسۋدى كوزدەيتىن دەرەكتەر بازاسىن ىقپالداستىرۋ جوباسى. بۇل بانكتەر پەن پوليتسيا اراسىنداعى بارىنشا ءتيىمدى ىنتىماقتاستىقتى قامتاماسىز ەتە وتىرىپ، الاياقتىق ءىس-ارەكەتتى جەدەل انىقتاۋعا جانە الدىن الۋعا مۇمكىندىك بەرەدى. مۇنان بولەك، قۇقىق قورعاۋ ورگاندارىنىڭ، ۇيالى بايلانىس وپەراتورلارىنىڭ، تولەم جاساۋ ۇيىمدارىنىڭ، ەكىنشى دەڭگەيلى بانكتەردىڭ، ميكروقارجى ۇيىمدارىنىڭ، ۇلتتىق بانك پەن قارجى نارىعىن رەتتەۋ جانە دامىتۋ اگەنتتىگىنىڭ بىرلەسكەن جۇمىسىنا ارنالعان پلاتفورما — انتيفرود ورتالىعى قۇرىلعان. ونىڭ ماقساتى — قارجى سالاسىنداعى الاياقتىق ارەكەتتەردى انىقتاۋ جانە الدىن الۋ.

— ەكىنشى دەڭگەيلى بانكتەر سايكەستەندىرۋ پروتسەدۋرالارىن كۇشەيتتى: ونلاين نەسيە الۋ بارىسىندا كليەنتتىڭ موبيلدى قۇرىلعىسىنا بىررەتىك كودتى مىندەتتى تۇردە جىبەرۋ ەنگىزىلدى. بۇل كرەديتتىك ونىمگە سانكتسيالانباعان قولجەتىمدىلىك تاۋەكەلىن تومەندەتەدى، - دەدى مينيسترلىكتەن.

انتيفرود ورتالىعى كۇدىكتى بەلسەندىلىكتى انىقتاۋ ءۇشىن ترانزاكتسيالاردى مونيتورينگىلەۋ جانە سارالاۋ جۇيەسىن بەلسەندى تۇردە قولدانادى. وسى جۇمىس اياسىندا اۋدارىم سوماسى، وپەراتسيا جيىلىگى سىندى ءتۇرلى پارامەترلەردىڭ شەكتى ءمانى قولدانىلىپ، ترانزاكتسيالاردى وڭدەۋ بارىسىندا اۆتوماتتى تۇردە سالىستىرۋ جۇرگىزۋ ءۇشىن الاياقتىققا كۇدىكتىلەردىڭ ءتىزىلىمى جاسالىپ جاتىر.

قارجىلىق مونيتورينگ اگەنتتىگى كۇدىكتى وپەراتسيالاردىڭ تۇرپاتتاماسىن ازىرلەدى. الاياقتىق بەلگىلەرى بار وپەراتسيالاردى انىقتاۋ قارجىلىق مەكەمەلەرگە كۇدىكتى ترانزاكتسيالاردى ءتيىمدى انىقتاۋعا جانە الدىن الۋعا مۇمكىندىك بەرەدى. سونداي- اق، بەلگىلى الاياقتاردىڭ ءتىزىمى قالىپتاستىرىلىپ، جاڭارتىلىپ وتىرادى. بۇل دا قارجى ينستيتۋتتارىنا كۇدىكتى وپەراتسيالاردى دەر كەزىندە بۇعاتتاۋعا نەمەسە توقتاتۋعا مۇمكىندىك بەرەدى.

— بۇل شارالار مەملەكەتتىك ورگاندار مەن قارجىلىق مەكەمەلەر اراسىنداعى بارىنشا تىعىز ىنتىماقتاستىقتى قامتاماسىز ەتە وتىرىپ، ازاماتتاردىڭ قارجىلىق قاۋىپسىزدىگىن نىعايتۋعا ءارى الاياقتىق ءىس-ارەكەتتەردەن قورعاۋعا باعىتتالعان، - دەپ اتاپ وتەدى ۆەدومستۆودان.