بانكروتتىق بويىنشا 86 مىڭ ءوتىنىم كەلىپ ءتۇستى - قارجى مينيسترلىگى
استانا. KAZINFORM -سوتتان تىس بانكروتتىقتى قولدانۋ ءۇشىن 84 مىڭعا جۋىق ادام جۇگىندى. بۇل تۋرالى سەناتتا وتكەن جيىندا دەپۋتات سۇلتانبەك ماكەجانوۆ ايتتى.
دەپۋتات زاڭدا سوتتان تىس جانە سوت ارقىلى بانكروتتىق، سونداي-اق تولەم قابىلەتتىگىن قالپىنا كەلتىرۋ ءراسىمى قامتىلعانىن ەسكە سالدى.
«بۇل ءۇش ءراسىم بورىشكەرلەردەن ءوتىنىش بولعاندا عانا باستالاتىنى بەلگىلى. قازىر سوتتان تىس بانكروتتىقتى قولدانۋ ءۇشىن 84 مىڭعا جۋىق ادام جۇگىنسە، سوت بانكروتتىعى راسىمىنە 2 مىڭعا جۋىق ادام ءوتىنىش بەرگەن. ال تولەم قابىلەتتىگىن قالپىنا كەلتىرۋ ءراسىمى 4 ادامعا عانا قولدانىلىپ جاتىر»، - دەدى س. ماكەجانوۆ.
ونىڭ ايتۋىنشا، ءتيىستى تالداۋ جۇمىستارى اياسىندا ازاماتتارعا بانكروتتىق نەمەسە تولەم قابىلەتتىگىن قالپىنا كەلتىرۋ راسىمدەرىن پايدالانۋعا كەدەرگى جاسايتىن ءبىرقاتار پروبلەما مەن زاڭنامالىق كەمشىلىكتەر انىقتالدى. بىرىنشىدەن، كرەديتورلار مەن كوللەكتورلار كرەديتتىك بيۋروعا بورىشكەرلەر تۋرالى قيسىنسىز دەرەكتەر ۇسىنعان. ەكىنشىدەن، قارجى نارىعىن رەتتەۋ جانە دامىتۋ اگەنتتىگىنىڭ قالىپتاستىرعان كرەديتورلار تىزىمىندە كەيبىر قارجى ۇيىمدارى قامتىلماعان.
ءوز كەزەگىندە قارجى مينيسترلىگى مەملەكەتتىك كىرىستەر كوميتەتى ءتوراعاسىنىڭ ورىنباسارى قايرات مياتوۆ جالپى 86 مىڭ ءوتىنىم كەلىپ تۇسكەنىن راستادى.
«سونىڭ اراسىندا 67 مىڭ وتىنىشكە قولداۋ جاسالمادى. ازاماتتاردىڭ 60 پايىزعا جۋىعىندا قارىز سوماسى بويىنشا سايكەستىك بولماعان جانە قارىزدى تولەمەۋ مەرزىمى 12 ايدان اسپاعان. ەكىنشى سەبەبى - بانك مەكەمەلەرىمەن نەمەسە ميكروقارجى ۇيىمدارىمەن ارادا قارىزدى رەتتەۋ تۋرالى قۇجاتتار بولمادى، ياعني مۇنداي جاعدايلار شامامەن 30 پايىزعا جۋىقتادى. سونىمەن قاتار، قالعان جەكە تۇلعالاردا نەمەسە ولاردىڭ ايەلدەرىنىڭ مەنشىگىندە مۇلكى بار ەكەنى انىقتالدى، بۇل ءوز كەزەگىندە وتىنىشتەرىن قابىلماۋعا نەگىز بولدى»، - دەدى ق. مياتوۆ.
ونىڭ سوزىنە قاراعاندا، قازىر 9841 ادام بانكروت دەپ تانىلعان، قارىز سوماسى 20 ميلليارد تەڭگەگە جۋىقتادى.
اتاپ ايتقاندا، 2023 -جىلى 3-ناۋرىزدان بانكروتتىققا ءوتىنىم قابىلداۋ باستالادى.
