بانان، مانگو، اۆوكادو: تۇركىستاندىق شارۋالار ەكزوتيكالىق جەمىستەردى ءوسىرۋدى قولعا الا باستادى
تۇركىستاندىق شارۋالار تروپيكالىق جەمىستەردى ءوسىرۋدى قولعا الا باستادى، دەپ حابارلايجى قازاقپارات ءتىلشىسى.

ەلىمىزدەگى مول كولەمدە بانان وندىرەتىن العاشقى كاسىپورىن سايرام اۋدانىندا ورنالاسقان. مۇندا تۇركيالىق «Gen group Qazaqstan» كومپانياسى 5,3 گەكتار جەرگە جىلىجاي كەشەنىن سالىپ، بانان وتىرعىزعان. وسىرىلەتىن بانان سورتى ارنايى قازاقستاننىڭ كليماتتىق جاعدايلارىنا بەيىمدەلگەن. العاشقى ءونىمدى 6 ايدان كەيىن جيناۋ جوسپارلانىپ وتىر.
كاسىپورىن باسشىسى تيمۋر ۋتەشوۆ الداعى ۋاقىتتا مانگو، اۆوكادو سىندى جەمىس تۇرلەرىن ءوندىرۋدى جوسپارلاپ وتىرعاندىعىن جەتكىزدى.

«اۆوكادو جەمىسىنىڭ سالماعى 2 كەلىگە جەتەدى. ونىڭ بويىنداعى قورەكتىك زاتتاردىڭ كوپتىگىنە بايلانىستى ادام دەنساۋلىعى ءۇشىن وتە پايدالى. ديەتولوگتار بۇل ءونىمدى جۇرەك- قانتامىر، اسقازان- ىشەك اۋرۋلارىمەن اۋىراتىن ادامدارعا جەۋدى ۇسىنادى. اۆوكادو اعزانى تولىعىمەن تازالايتىن قاسيەتكە يە. ال، مانگو كالييگە باي، سونىڭ ارقاسىندا جۇرەك پەن قان تامىرلارى ءۇشىن پايدالى. سونىمەن قاتار، مانگو اۋرۋدان ايىقتىرا الاتىن قاسيەتكە يە، باس اۋرۋىن دا جازا الادى، قاتەرلى ىسىكتىڭ الدىن الۋ ءۇشىن دە تۇتىنىلادى» - دەيدى كاسىپكەر.
ەكزوتيكالىق جەمىستەردەن باسقا، جىلىجايدا قىزاناق پەن قۇلپىناي وسىرىلەدى. جوبانىڭ ءبىرىنشى كەزەڭدەگى قۇنى 4 ميلليون ا ق ش دوللارىن قۇرايدى. قۇرىلىس ساپاسى جوعارى جىلىجايلار كليماتتىق باقىلاۋ مەن بەيىمدەلگىش قورەكتەندىرۋ جۇيەسىمەن جابدىقتالعان.
قازاقستاندا بالاماسى جوق كاسىپورىن قايناربۇلاق اۋىلدىق وكرۋگىندە ورنالاسقان. كاسىپكەر جاقىن ارادا جىلىجاي جەرىن 5 گەكتارعا كەڭەيتپەك. سوندا شامامەن جىلىنا 1000 توننا بانان وندىرۋگە مۇمكىندىك تۋادى.