بالي ارالىندا قوناقۇيلەر مەن مەيرامحانالاردىڭ جاڭا قۇرىلىسىنا تىيىم سالىندى
استانا. KAZINFORM - يندونەزيا بيلىگى بالي ارالىندا جۋىرداعى جويقىن سۋ تاسقىنىنان كەيىن جاڭا قوناقۇيلەر مەن مەيرامحانالاردىڭ سالىنۋىنا تىيىم سالدى، دەپ حابارلايدى The Guardian.
سۋ تاسقىنى سالدارىنان 18 دەن استام ادام قازا تاپتى، مىڭداعان تۇرعىن دەنپاسار مەن كورشىلەس اۋدانداردا زارداپ شەكتى. جويقىن اپات ۇيلەرگە، ينفراقۇرىلىم مەن قوعامدىق نىساندارعا ۇلكەن شىعىن كەلتىردى.
گۋبەرناتور ۆايان كوستەردىڭ مالىمدەۋىنشە، بيىلدان باستاپ اۋىل شارۋاشىلىعى جانە ەگىستىك جەرلەردى كوممەرسيالىق ماقساتتا يگەرۋ توقتاتىلادى.
«2025 -جىلدان باستاپ بىردە- ءبىر ءونىمدى جەر قوناقۇي نەمەسە وزگە دە نىسان سالۋعا بەرىلمەيدى. بۇل شەشىم بالي ارالىنىڭ 100 -جىلدىق دامۋ جوسپارىنا ەنگىزىلدى»، - دەدى ول.
ەكولوگتار كوپتەن بەرى ارالداعى شامادان تىس ءتۋريزمنىڭ قاۋپى تۋرالى دابىل قاعىپ كەلگەن. ولار جەردى باقىلاۋسىز يگەرۋدى شەكتەۋ تابيعي اپاتتار قاۋپىن ازايتۋعا ىقپال ەتەتىنىن اتاپ ءوتتى.
بالي كۇرىش القاپتارى مەن اسەم جاعاجايلارىمەن ايگىلى بولعانىمەن، سوڭعى ونجىلدىقتاردا ارالدا قوناقۇي جانە تۋريستىك نىساندار شامادان تىس كوبەيىپ، جەرگىلىكتى حالىق پەن قوناقتاردىڭ نارازىلىعىن تۋعىزعان.
بىلتىر دا يندونەزيا بيلىگى جاڭا قوناقۇيلەردىڭ قۇرىلىسىنا موراتوري ەنگىزەتىنىن حابارلاعانىمەن، ول جوسپار جۇزەگە اسپاعان. ەندى جاڭا نورماتيۆتىك قۇجاتتار 2025 -جىلدىڭ سوڭىنا دەيىن كۇشىنە ەنۋى ءتيىس.
بۇل شەشىم يندونەزيا مەتەورولوگيالىق اگەنتتىگىنىڭ بيىلعى ماۋسىمدا ەكسترەمالدى جاۋىن- شاشىن كۇتىلەتىنى تۋرالى ەسكەرتۋىنەن كەيىن قابىلدانىپ وتىر. عالىمداردىڭ پىكىرىنشە، كليماتتىڭ وزگەرۋى سالدارىنان نوسەرلەر جيىلەپ، كەنەتتەن بولاتىن سۋ تاسقىندارىنىڭ قاۋپى كۇشەيگەن.
بۇعان دەيىن بالي ارالىندا سوڭعى ون جىلداعى ەڭ كۇشتى سۋ تاسقىنى تىركەلىپ، اپاتقا بايلانىستى ءبىر اپتالىق توتەنشە جاعداي رەجيمى جاريالانعان بولاتىن.
