بالقاش كولىنە وتكەن جىلمەن سالىستىرعاندا 4 ميلليارد تەكشە مەتر ارتىق سۋ جىبەرىلدى
استانا. KAZINFORM - بيىل ەلىمىزدىڭ سۋ قويمالارىنا رەكوردتى - 75 ميلليارد تەكشە مەتردەن استام سۋ جينالدى. ونىڭ 12 ميلليارد تەكشە مەتردەن استامى تاسقىن سۋى.
تاسقىن سۋىن دۇرىس ءبولۋ سۋ قويمالارىن تولتىرىپ قانا قويماي، سوڭعى جىلدارى قۇرعاۋعا اينالعان وزەندەر مەن كولدەرگە، شابىندىقتارعا، تابيعي جايىلىمدارعا جانە باسقا دا ايدىندارعا سۋ جىبەرۋگە مۇمكىندىك بەردى.
جىل باسىنان بەرى بالقاش كولىنە 15,4 ميلليارد تەكشە مەتر سۋ كەلدى، بۇل وتكەن جىلعى كورسەتكىشتەن 4 ميلليارد تەكشە مەترگە ارتىق. ونىڭ ىشىندە تاسقىن كەزىندە 3,3 ميلليارد تەكشە مەتر سۋ ءتۇستى. جىل باسىنان بەرى كاسپي تەڭىزىنە 17 ميلليارد تەكشە مەتر سۋ كەلدى. الماتى وبلىسىنداعى قاپشاعاي سۋ قويماسى سوڭعى 10 جىلدا العاش رەت %100 عا تولىپ، 18 ميلليارد تەكشە مەتردەن استام سۋ جينادى.
سۋ تاسقىنى كەزىندە باتىس قازاقستان وبلىسىنىڭ قامىس- سامار كولدەرىنە 80 ميلليون تەكشە مەتر سۋ جىبەرىلدى. ۇلىتاۋ وبلىسىنان قىزىلوردا وبلىسىنا 839 ميلليون تەكشە مەتر سۋ كەلدى. وسىنىڭ ارقاسىندا، باقىلاۋ تاريحىندا العاش رەت بۇل سۋ سارىسۋ وزەنى ارقىلى قىزىلوردا وبلىسىنىڭ كولدەر جۇيەسىنە جەتتى.
سۋ ديپلوماتياسى، سۋدى ءدال ءبولۋ جانە سۋ ۇنەمدەۋ تەحنولوگيالارىن ەنگىزۋ ارقىلى ەلىمىزدىڭ وڭتۇستىگىندە سۋ بالانسىن جاقسارتۋعا قول جەتكىزىلدى.
ماسەلەن، بيىل سولتۇستىك ارالعا شامامەن 2,5 ميلليارد تەكشە مەتر سۋ جىبەرىلدى، بۇل 2023 -جىلمەن سالىستىرعاندا 400 ميلليون تەكشە مەترگە ارتىق. بۇل رەتتە، قىزىلوردا وبلىسىنىڭ شارۋالارى سۋ ۇنەمدەۋ تەحنولوگيالارىن پايدالانعاندىقتان 200 ميلليون تەكشە مەترگە دەيىن سۋ ۇنەمدەپ، ول سۋ سولتۇستىك ارالعا جىبەرىلگەنىن دە ايتا كەتكەن ءجون.
جىل باسىنان بەرى قىزىلوردا وبلىسىنىڭ كولدەر جۇيەسىنە 4,7 ميلليارد تەكشە مەتردەن استام سۋ جىبەرىلدى. سالىستىرۋ ءۇشىن، وتكەن جىلى بۇل كورسەتكىش شامامەن 4,3 ميلليارد تەكشە مەتر ەدى.
«ءبىز ءارقاشان سۋ رەسۋرستارىن بولۋدە ەكونوميكانىڭ قاجەتتىلىكتەرى مەن سۋ نىساندارىنىڭ ەكوجۇيەسىن قولداۋ اراسىنداعى دۇرىس تەپە- تەڭدىكتى ىزدەيمىز. بيىل شارۋالار مەن باسقا دا سۋ پايدالانۋشىلارعا كەرى اسەرىن تيگىزبەستەن ۇلكەن جانە شاعىن سۋ ايدىندارىن ساقتاۋ جانە قالپىنا كەلتىرۋ بويىنشا ۇلكەن جۇمىس اتقارىلدى. مىسالى، وتكەن سۋارۋ كەزەڭىندە ەلىمىزدىڭ شارۋا قوجالىقتارىنا شامامەن 11 ميلليارد تەكشە مەتر سۋ بەرىلدى. بولاشاقتا بۇل باعىتتاعى جۇمىس جاقسارادى. ونىڭ ىشىندە سۋدى ساۋاتتى باسقارۋ جانە تۇتىنۋعا باسىمدىق بەرەتىن جاڭا نورماتيۆتىك-قۇقىقتىق بازا قۇرۋ ەسەبىنەن دە ناتيجەگە جەتۋگە نيەتتىمىز»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
