بالامدى قاندالا شاعىپ تاستادى: ورالدا اتا-انا لاگەردىڭ ۇستىنەن شاعىمداندى
ورال. KAZINFORM - ورالدا «اتامەكەن» قالالىق بالالار-جاسوسپىرىمدەر تۋريزمى جانە ەكولوگيا ورتالىعىندا بولعان بالانى قاندالا شاققانى جونىندە مالىمەت تارادى.
بالانىڭ اناسى Instagram الەۋمەتتىك جەلىسىندە ءمالىم ەتكەندەي، ۇلى № 42 «اق نيەت» گيمنازياسىنىڭ 7-سىنىبىندا وقيدى.
ونىڭ جازۋىنا قاراعاندا، بيىل وقۋشىلاردى «اتامەكەن» بالالار لاگەرىنە 5 كۇنگە تەگىن دەمالۋعا جىبەرگەن.
بالالار 15-19-شىلدەدە لاگەردە بولعان. ۇلى 19-شىلدەدە لاگەردەن كەلگەندە، ءۇستى-باسىن قاندالا شاعىپ تاستاعانىن كورگەن. مۇنداي جاعداي ونىمەن بىرگە دەمالعان باسقا دا بالالاردا بولعان.
ب ق و ءبىلىم باسقارماسىنىڭ باسپا ءسوز قىزمەتىنەن تۇسكەن مالىمەتكە قاراعاندا، 15-19-شىلدە ارالىعىندا «اتامەكەن» ورتالىعىندا № 42- «اق نيەت» گيمنازياسىنىڭ وقۋشىلارى ءۇشىن ەكى كۇندىك جاياۋ جورىق ۇيىمداستىرىلعان.
«اتامەكەن» ورتالىعى باسشىلىعىنىڭ تۇسىندىرۋىنشە، جازعى دەمالىس، جاياۋ تۋريستىك جورىقتار جانە پراكتيكالىق ساباقتار كەزىندە جاندىكتەردىڭ شاعۋىنا بايلانىستى وقۋشىلاردان، مەكتەپ باسشىلارى مەن لاگەر قىزمەتكەرلەرىنەن شاعىم تۇسپەگەن. ورتالىق مەديتسينالىق قىزمەتكەرمەن قامتاماسىز ەتىلگەن. دەمالىس بولمەلەرى سانيتارلىق تالاپتارعا سايكەس كۇن سايىن جينالادى. اۋىسىمدار اراسىندا 2 سانيتارلىق دەمالىس كۇنى بەلگىلەنگەن. قازىرگى تاڭدا تۋريستىك داعدىلارعا وقىتۋ بويىنشا پراكتيكالىق ساباقتار توقتاتىلدى. اتالعان كورپۋستى دەزينفەكتسيالىق وڭدەۋ جۇمىستارى جۇرگىزىلدى. وقيعا پراكتيكالىق ساباققا قاتىسقان بالاعا بايلانىستى بولعاندىقتان، وسى جورىقتار توقتاتىلدى. سانيتاريالىق-ەپيدەميولوگيالىق باقىلاۋ باسقارماسى پراكتيكالىق ساباقتار وتەتىن عيماراتتا جۇمىس ىستەۋگە رۇقسات بەرسە، وسى باعىتتاعى جۇمىستار جالعاسادى»، دەپ حابارلادى ۆەدومستۆودان.
ب ق و سانيتاريالىق- ەپيدەميولوگيالىق باقىلاۋ دەپارتامەنتىنىڭ باسپا ءسوز قىزمەتى وسى ماسەلە بويىنشا قالالىق باسقارماعا 22-شىلدە كۇنى شاعىم تۇسكەنىن جەتكىزدى.
قازىر قارالۋ ۇستىندە، سونىڭ قورىتىندىسىنا سايكەس قوسىمشا مالىمەت بەرىلەدى.
ەسكە سالا كەتەيىك، بۇدان بۇرىن ورالدا لاگەردە بالانىڭ سوققىعا جىعىلۋىنا بايلانىستى تالىمگەر قىزمەتىنەن بوساتىلعانىن جازعان بولاتىنبىز.
اۆتور
عايساعالي سەيتاق
