بالاما سالماق سالعىم كەلمەدى - قارتتار ءۇيىنىڭ تۇرعىنى
اقتوبە. KAZINFORM - ءومىر بويى تەمىرجول سالاسىندا ەڭبەك ەتىپ، نەمەرە، شوبەرە كورگەنىمەن، قارتتار ءۇيىن ءجون كوردى. اۋىلدان قالاعا ءبىر سومكەمەن كەلىپ، زامانداستارىنىڭ قاتارىنا قوسىلعان سەيسەنعالي اۋەزوۆ الدىمەن گۇل ءوسىرۋشى بولدى.
قازىر ليفت جۇرگىزۋشىسى قىزمەتىن اتقارىپ ءجۇر. بۇل ونىڭ ءوز تاڭداۋى. Kazinform ءتىلشىسى حالىقارالىق قارتتار كۇنى 1-الەۋمەتتىك قىزمەت كورسەتۋ ورتالىعىنا بارىپ، ونداعى تۇرعىندارمەن كەزدەستى.
اقتوبەدەگى 1-الەۋمەتتىك قىزمەت كورسەتۋ ورتالىعى بۇگىن كۇنى بويى قۇتتىقتاۋشىلاردىڭ قابىلدادى. ولاردىڭ قاتارىندا اكىمدىك قىزمەتكەرلەرىمەن قاتار وقۋشىلار، ستۋدەنتتەر، ءتۇرلى كاسىپكەرلەر مەن ونەر ۇجىمدارى بار. ولار وزدەرى قولدان ازىرلەگەن سىيلىعىن ۇسىنىپ، كەيبىرى كونسەرت قويدى. ورتالىق تۇرعىندارى ءارقايسىسىنا ءوز ريزاشىلىعىن ءبىلدىرىپ، كوڭىلىن اۋلاعان جاندارعا العىسىن ءبىلدىردى. كەيبىرى بۇل كۇنى دە قىزمەت ەتىپ، جۇمىسىن اقساتپادى. Kazinform ءتىلشىسى ليفت جۇرگىزىپ، ادامداردى ءۇش قاباتقا الما-كەزەك تاسىپ جۇرگەن سەيسەنعالي اۋەزوۆپەن تىلدەستى. ول مۇندا شالقار اۋدانىنان ءبىر سومكەمەن كەلىپ، ورنالاستى.
- اعاممەن بىرگە، سونىڭ وتباسىندا تۇردىم. ول كوز جۇمعان سوڭ بالالارىنا اۋىرتپالىق سالعىم كەلمەدى. ءومىر بويى تەمىرجول سالاسىندا ەڭبەك ەتكەن اداممىن. 40 جىلداي ەڭبەك ءوتىلىم بار. ءبىر دەپو بولعانىمەن، بىرنەشە قارا جۇمىستى اتقارعان جايىم بار. نەگىزى ءوزىمنىڭ جالعىز بالام بار. ءوزىنىڭ وتباسى، 7 بالاسى بار. جىبەرگىسى كەلمەي، «بەتىمىزگە باسادى، جالعىز اكەڭدى باعا المايسىڭ با دەپ ايتادى» دەپ قارسى بولعانىمەن، سوڭىندا كەلىستى. ءوزىم كوندىردىم. مۇندا ءبىر عانا سومكەمەن كەلدى. كەلگەن كۇنى 14 كۇن كارانتيندە بولدىم. ادامدارمەن تانىسىپ، باسشىلارمەن دە سويلەستىم. دەنساۋلىعىم جاقسى بولعان سوڭ جۇمىس سۇرادىم، - دەدى سەيسەنعالي اۋەزوۆ.
ءسويتىپ ول ورتالىقتا الدىمەن اۋلا تازارتىپ، گۇل ءوسىردى. قازىر ليفت جۇرگىزۋشىسى بولىپ جۇمىس ىستەپ ءجۇر. جۇمىس تاڭعى 6:00 دە باستالىپ، كەشكى 20:00 گە دەيىن جالعاسادى. ءۇش كۇن جۇمىس ىستەپ، ءۇش كۇن دەمالامىپ، ەڭبەگى ءۇشىن 90 مىڭ تەڭگە جالاقى الادى.
- جۇمىسقا تۇرماس بۇرىن ەكى ايلىق كۋرستا وقىدىم. وندا ەسىكتى اشىپ، جابۋ، تۇرىپ قالعانداعى قاۋىپسىزدىك ەرەجەسى، سىيىمدىلىعىنا ساي ادام تاسىمالداۋدى ۇيرەتتى. بۇل جەر وزىمە ۇنايدى. العاش كەلگەن اداممەن تانىسىپ، ءمان-جايىن سۇراپ الامىز. كەيىن ارالاسىپ كەتەمىز. تىنىش، جايلى جەردە تەلەديدار قارايسىڭ، كونسەرت قويۋعا كەلگەن ونەرپازداردى تاماشالايسىڭ. وقۋشىلار، ستۋدەنتتەر كەلگەندە ءماز بولامىز. قالادان عانا ەمەس، اۋدانداردان دا كەلەدى، - دەدى سەيسەنعالي اۋەزوۆ.
ايتا كەتەيىك، اقتوبەدەگى 1-الەۋمەتتىك قىزمەت كورسەتۋ ورتالىعىندا قازىر 223 ادام بار. ونىڭ 155 ءى ەر ادام بولسا، وزگەسى ايەل. مۇندا زەينەتكەرلەر مەن 1-جانە 2-توپتاعى مۇگەدەكتىگى بار ازاماتتار قابىلدانادى. مۇگەدەكتىگى بار ادامنىڭ جاسى 18 دەن اسۋى ءتيىس. 1-الەۋمەتتىك قىزمەت كورسەتۋ ورتالىعى ديرەكتوردىڭ ورىنباسارى ساۋلەحان كۇنتىلەۋوۆانىڭ ايتۋىنشا، مۇنداعى قىزمەت الۋشىلاردىڭ 137 ءى قارت، 86 ى مۇگەدەكتىگى بار جان. ەڭ ۇلكەنى 93 جاستا بولسا، ەڭ كىشكەنتايى 22 جاستاعى ويىل اۋدانىنىڭ تۇرعىنى. ول اتا-اناسىز جەتىم وسكەن. كوللەدج بىتىرگەن سوڭ 1-الەۋمەتتىك قىزمەت كورسەتۋ ورتالىعىنا قونىستاندى. ءبارىنىڭ بوس ۋاقىتىن ءتيىمدى وتكىزۋ ءۇشىن ءتۇرلى مۇمكىندىك قاراستىرىلعان.
- مۇندا اتا-اجەلەر ءوزىنىڭ سۇيىكتى ىسىمەن اينالىسادى، توقىما توقىپ، ءىس تىگەدى. كوزى كورمەسە دە قاعازدان ءتۇرلى بۇيىم جاساپ بەرەدى. توقىعان بۇيىمدارىن بالالار ۇيىنە بەرەمىز، كەيدە مۋزەي ءتۇنى شاراسىنا قاتىسىپ، تۇرعىندارعا كورسەتەمىز. كىتاپحاناعا كەلىپ، شاحمات، دويبى وينايدى. كىتاپ، گازەت-جۋرنال وقيدى. مۇندا 7 مىڭنان استام كىتاپ قورى بار، - دەدى ساۋلەحان كۇنتىلەۋوۆا.
ونىڭ ايتۋىنشا، مۇندا كەلگەندەر اراسىندا وتباسىنا قايتا ورالاتىندار دا بار. ءبىراق كوبى باسپاناسىز قالعان ادامداردى الەۋمەتتىك بەيىمدەۋ ورتالىعىن پانالاپ، قۇجاتى راسىمدەلگەن سوڭ قارتتار ۇيىنە اۋىسادى. مۇندا تەك قۇجاتى تۇگەل ادامدار قابىلدانادى.
ەسكە سالساق، ەلىمىزدىڭ ەڭ قارت تۇرعىنى 114 جاستا. ول ۇلىتاۋ وبلىسىندا تۇرادى.
