بالالارىمىزدىڭ ارمانى بيىك بولسا، بولاشاقتا ەلىمىزدىڭ دە ەڭسەسى بيىك بولارى حاق - مينيستر
استانا. KAZINFORM - وقۋ-اعارتۋ ءمينيسترى عاني بەيسەمبايەۆ حالىقارالىق بالالاردى قورعاۋ كۇنى قارساڭىندا «قازاقستان بالالارى» ونكۇندىگى اياسىندا ەلىمىزدىڭ جاس ازاماتتارىنا ۇندەۋ جاسادى.
وقۋ-اعارتۋ مينيسترلىگى مۇددەلى مەملەكەتتىك ورگاندارمەن بىرلەسىپ، «قازاقستان بالالارى» ونكۇندىگىن وتكىزىپ جاتىر.
ءار كۇن بالانىڭ قۇقىعىن، قاۋىپسىزدىگىن، ءبىلىم مەن تاربيە الۋىن، دەنساۋلىعىن جانە دامۋىن ارقاۋ ەتكەن تاقىرىپتىق باعىتتارعا ارنالدى.
بۇگىنگى كۇندى ءبىز «بالالار ءۇنى» دەپ جاريالاپ، ءار بالانىڭ ۇنىنە، ارمان- ماقساتىنا قۇلاق تۇردىك.
- بالانى ءاربىر اتا-انا، ءاربىر ۇستاز، ءاربىر ازامات ەستۋى ءتيىس. وعان شىنايى كوڭىل ءبولىپ، جەكە تۇلعا رەتىندە قابىلداۋ - سانالى ۇرپاق تاربيەلەۋدىڭ باستاۋى. بالالارىمىزدىڭ ارمانى بيىك بولسا، بولاشاقتا ەلىمىزدىڭ دە ەڭسەسى بيىك بولارى حاق. ولاردىڭ ءار تىلەگىندە ءۇمىت، ءار سوزىندە سەنىم بار. ونى ەستۋ - ءبىزدىڭ ازاماتتىق ءارى ادامي پارىزىمىز، - دەدى مينيستر.
