بالالاردى ۇلتتىق كيىم تىگۋگە باۋليدى: ش ق و-داعى قولونەر ۇيىرمەسىنە قىزىعاتىندار كوپ
وسكەمەن. KAZINFORM - شىعىس قازاقستان وبلىسى ۇلان اۋدانىنداعى بالالار شىعارماشىلىق ۇيىندە قازاقتىڭ ۇلتتىق سالت-ءداستۇرىن، ادەت- عۇرپىن دارىپتەيتىن ءتۇرلى ۇيىرمەلەر بار. سونىڭ ءبىرى - قولونەر ۇيىرمەسىندە بالالار حالقىمىزدىڭ كونەدەن كەلە جاتقان كيىم-كەشەكتەرىن، سان الۋان بۇيىمدارىن زاماناۋي ۇلگىدە تىگۋگە ۇيرەنۋدە. 18-ناۋرىز - ۇلتتىق كيىم كۇنىنە وراي Kazinform ءتىلشىسى وسى بالالار شىعارماشىلىق ءۇيىنىڭ ديرەكتورى ءلايلا ۋالشايەۆامەن سۇحبات قۇرعان ەدى.
- بالالاردى ۇلتتىق كيىم تىگۋگە باۋليتىن قولونەر ۇيىرمەسىنىڭ جۇمىسى جايلى ايتا كەتسەڭىز؟
- بۇگىنگى تاڭدا بىزدە بارلىعى 24 ۇيىرمە بار. تۇگەلدەي تەگىن. سونىڭ ىشىندە «التىن ساۋساق»، «شەبەر قولدار»، «قولونەر» ۇيىرمەلەرى بالالاردىڭ قول موتوريكاسىن دامىتادى. بالالار ينە-جىپپەن، تىگىن ماشيناسىمەن قازاقتىڭ ۇلتتىق كيىمدەرىن تىگۋدى ۇيرەنۋدە. سوڭعى ۋاقىتتا ترەند بولىپ جاتقان تاقيانى تۇرلىشە قىلىپ تىگىپ، ءوز تالعامدارىنا قاراي زاماناۋي ۇلگىدە ساندەيدى. قابىرعاعا ءىلىپ قويۋعا بولاتىن، ىشىندەگى سۋى توگىلمەيتىن قازاقتىڭ بايىرعى ىدىس سالعىشىن دا جاسايدى. كويلەكتەر مەن قۇراق كورپەلەر تىگىپ، قامشى دا ورەدى.
- ۇيىرمەگە قانشا بالا قاتىسىپ ءجۇر؟
- «قولونەر» ۇيىرمەسىنە 30 عا جۋىق بالا قاتىسادى. وقۋشىلاردىڭ قىزىعۋشىلىعى وتە جوعارى. كۇن وتكەن سايىن ۇيىرمەگە كەلەتىندەر كوبەيۋدە.
- وزدەرىڭىز جۇمىستا ۇلتتىق كيىمدى قانشالىقتى ءجيى كيەسىزدەر؟
- جۇمىستاعى فورمامىزدىڭ ءوزى ۇلتتىق ويۋمەن ورنەكتەلگەن. ونى تىككەن - «التىن ساۋساق» ۇيىرمەسىنىڭ جەتەكشىسى كۇلايسا الپامىس قىزى. كلاسسيكالىق ستيلدەگى جەلەتكەگە ويۋ سالىپ وسىنداي ەرەكشە ديزاينمەن جاساپ شىعاردى. جالپى بالالار شىعارماشىلىق ءۇيىنىڭ تابالدىرىعىن اتتاي سالىسىمەن- اق قازاقتىڭ سالت- ءداستۇرىنىڭ، مادەني مۇراسىنىڭ ءيىسى اڭقىپ تۇرادى.
- بالالار شىعارماشىلىق ۇيىندە تاعى قانداي ۇيىرمەلەر بار؟
- سپورتتان «توعىزقۇمالاق» ، قازاقتىڭ ۇمىتىلىپ بارا جاتقان ويىنى - «بەستەمشە» ، شاڭعى، فۋتبول سىندى ۇيىرمەلەر جۇمىس ىستەيدى. ودان كەيىن سۋرەت سالۋ، اقىندىق، تۋريستىك ولكەتانۋ، ريتوريكا جانە جۋرناليستيكا، اعاش شەبەرى ۇيىرمەلەرى بار. سولاردىڭ ءارقايسىسىنا بىلىكتى ماماندار جەتەكشىلىك ەتۋدە.
- اۋدان جاستارىنىڭ ىشىنەن سىزدەردەن ءتالىم الىپ، بيىكتى باعىندىرىپ جاتقاندار بار ما؟
- ءوز قولدارىمەن تىككەن كيىمدەردى، بۇيىمداردى اۋداندىق، وبلىستىق، رەسپۋبليكالىق سايىستارعا ۇسىنىپ جەڭىمپاز اتانىپ جاتقان شاكىرتتەرىمىز بارشىلىق. قايدا بارسا دا قانجىعالارى بوس قايتپاي، جۇلدەلى ورىنداردى الىپ كەلەدى. ءبىزدىڭ بالالاردىڭ تىككەن كيىمدەرىنە، جاساعان بۇيىمدارىنا سۇرانىس كوپ.
ءبىر ايتا كەتەرلىگى، قازىر اتا-انالار تۇگەلدەي باۋىر ەتى بالالارىنا ۇلتتىق ءداستۇرىمىزدى ءسىڭىرىپ، قازاقى تاربيە بەرگىسى كەلەدى. وقۋشىلاردىڭ وزدەرى دە قىزىعىپ، زور قۇلشىنىس بىلدىرۋدە. بۇل قۋانتارلىق جايت.
- ناۋرىز مەيرامىندا ەلگە ايتار تىلەگىڭىز قانداي؟
- جاقسىلىقتىڭ جارشىسى، جاڭا جىلدىڭ باستاۋى، كۇن مەن ءتۇننىڭ تەڭەلگەن كۇنى - ناۋرىز مەيرامى بارشاڭىزعا قۇت- بەرەكە اكەلسىن! ەلىمىزگە ىرگەسى سوگىلمەگەن بىرلىك، حالقىمىزعا ىرىسى توگىلمەگەن تىرلىك تىلەيمىن. باستارىڭىزدان باق كەتپەسىن. ەلىمىز دامي بەرسىن!
اۆتور
تالعاتجان مۇحامەتبەك ۇلى
