بالالاردى 1-سىنىپقا قابىلداۋ قۇجات مەرزىمى 31- تامىزعا دەيىن ۇزارتىلدى
استانا. KAZINFORM - وقۋ-اعارتۋ مينيسترلىگى اتا-انالاردىڭ ءوتىنىشى بويىنشا ءبىلىم بەرۋ ۇيىمدارىنا قابىلداۋ قاعيدالارىنا وزگەرىس ەنگىزگەنىن حابارلادى.
ەگەر بۇرىن ءبىرىنشى سىنىپقا قابىلداۋ مەرزىمى 1- ساۋىردەن تامىزدىڭ 1 نە دەيىن جۇزەگە اسىرىلسا، ەندى بالانىڭ اتا-اناسىنان نەمەسە وزگە دە زاڭدى وكىلدەرىنەن ءبىرىنشى سىنىپقا قۇجاتتاردى قابىلداۋ وسى جىلى 1- ءساۋىر مەن 31- تامىزدىڭ ارالىعىندا وتەدى.
تەك دەمالىس كەزىندە عانا مەكتەپتەن مەكتەپكە اۋىسۋعا شەكتەۋ الىندى. وسىلايشا، جاڭا ەرەجەلەرگە سايكەس، بالالاردى تۇرعىلىقتى جەرى بويىنشا وقۋ جىلى ىشىندە مەكتەپتەن-مەكتەپكە اۋىستىرۋ مۇمكىندىگى بار.
«تەحنيكالىق جانە كاسىپتىك ءبىلىم بەرۋ ۇيىمدارىنا قابىلداۋ كەزەڭى تامىزدىڭ 25 ءى اياقتالۋىنا بايلانىستى ءبىلىم الۋشىلاردىڭ وتىنىشتەرىن ونىنشى سىنىپقا قابىلداۋ مەرزىمى تامىزدىڭ 15 نەن تامىزدىڭ 31 نە وزگەرتىلدى. كوللەدجگە قابىلدانباعان ءبىلىم الۋشىلار مەكتەپتىڭ 10-11- سىنىپتارىندا وقۋىن كەدەرگىسىز جالعاستىرا الادى»، - دەلىنگەن مينيسترلىك حابارلاماسىندا.
