بالالاردان جىن شىعاراتىن ەمشى بۇرىن اتىراۋداعى مەشىتتىڭ كۇزەتشىسى بولعان
اتىراۋ. KAZINFORM - الەۋمەتتىك جەلىدە يسلام مەديتسيناسىمەن جىن شىعارعان ەمشى كەيقۋات وسپانوۆتىڭ ارەكەتى تالقىعا ءتۇسىپ جاتىر.
اتىراۋداعى «يمانعالي» مەشىتىنىڭ باسپا ءسوز قىزمەتى ەمشىنىڭ بۇرىن مەشىتتە كۇزەتشى بولعانى تۋرالى مالىمەت بەردى.
- كەيقۋات وسپانوۆ 2009 -جىلى اتىراۋ قالاسىنىڭ ورتالىق مەشىتىندە ءبىر-ەكى اي كۇزەتشىلىك قىزمەتتى جاساعان. ق م د ب-عا ەشبىر قاتىسى جوق. بۇيرىق مۇلدەم الماعان، - دەپ ءمالىم ەتتى مەشىتتىڭ باسپا ءسوز قىزمەتى.
بالا قۇقىقتارى جونىندەگى اتىراۋ وڭىرلىك ۋاكىلى ايجان سارسەمبايەۆانىڭ ايتۋىنشا، جەلىدەگى اقپاراتقا سايكەس انىقتاۋ باستالعان.
- ارينە، ومبۋدسمەن رەتىندە جەلىگە اقپارات شىققان بويدا اتالعان دەرەكتى انىقتاۋ باستالدى. بالانىڭ ءۇيىن، اتا-اناسىن تاۋىپ، سويلەسۋدى ماقسات ەتتىك. اتىراۋ وبلىستىق پوليتسيا دەپارتامەنتىمەن بىرلەسە ەمشىنىڭ ينستاگرام پاراعىنان بايلانىس ءنومىرىن، قايدا تۇراتىنىن ىزدەدىك. ال ەمدەلگەن قىز بالانىڭ الماتى وبلىسىندا تۇراتىنى انىقتالدى. ويتكەنى ەمشى ءار وڭىرگە بارىپ، ەمدەۋ سەانسىن جۇرگىزگەن، - دەدى ايجان سارسەمبايەۆا.
ونىڭ ايتۋىنشا، بۇرىن اتىراۋدا وسىنداي ءبىر وقيعا بولعان.
- التى بالاسى بار وتباسى 6-سىنىپتا وقيتىن بالاسىن مەكتەپكە جىبەرمەي قويعان. سەبەپ - بالانىڭ بويىنا جىن كىرگەن-ءمىس. ءتيىستى ورگاندارمەن بىرگە ءتۇسىندىرۋ جۇمىسىن قولعا الدىق. اتا-اناسىنىڭ قۇقىعىن بەلگىلى ءبىر مەرزىمگە شەكتەپ، بالالارىن بەيىمدەۋ ورتالىعىنا ورنالاستىردىق. پسيحولوگتار بالالارعا كەڭەس بەردى. سول كەزدە بالالاردا جىن كىرۋ دەرەگى انىقتالمادى، - دەيدى ايجان سارسەمبايەۆا.
ال كەيقۋات وسپانوۆتىڭ ءوزى الەۋمەتتىك جەلىدەگى پاراقشاسىندا يسلام مەديتسيناسىمەن ەمدەيتىنىن اشىق كورسەتكەن. ەمشى ەمدەۋ سەانستارىن دا پاراقشاسىنا جۇكتەگەن.
- رۋحيا (جىن شىعارۋ)، ءتىل-كوز تيۋ، تاعى باسقا اۋرۋلاردى قۇران دۇعالارىمەن دەم سالۋ ارقىلى ەمدەيتىنىن جازعان. سيقىر، دۋا، ىشىمدىككە سالىنىپ، قۇساعا ءتۇسۋ، ەرىكسىز اشۋلانۋ، ۇيقىسىزدىق، قۇمار ويىننان ارىلۋ… قۇران حاديستەرىنەن دەم سالىپ، تامىر باسىپ، دياگنوز انىقتاپ، ەمدەيمىز، - دەيدى كەيقۋات وسپانوۆ.
اتىراۋ وبلىستىق پوليتسيا دەپارتامەنتىنىڭ باسپا ءسوز قىزمەتى الەۋمەتتىك جەلىدە تاراعان ۆيدەو تەكسەرىلىپ جاتقانىن حابارلادى.
ەسكە سالا كەتەيىك، بۇدان بۇرىن اتىراۋ وبلىسىندا جرۆي جۇقتىرعانداردىڭ 64 پايىزى - 14 جاسقا تولماعان بالالار ەكەنىن جازعان ەدىك.
اۆتور
جولداسبەك شوپەعۇل
