بالالارعا «تيك-توك»-تىڭ تەرىس اسەرى كوپ

سەناتور اليشەر ساتۆالديەۆ «تيك-توك» الاڭىندا جاعىمسىز كورىنىستەردىڭ تارالىپ جاتقانى تۋرالى ماسەلە كوتەردى.

دەپۋتاتتىڭ ايتۋىنشا، 13-تەن باستاپ 24 جاسقا دەيىنگى جاستاردىڭ %75 ى وسى پلاتفورمانى پايدالانادى ەكەن. 4-5 جاستاعى بالالار تيك-توكتا كۇنىنە ورتا ەسەپپەن 75 مينۋتىن وتكىزەتىن بولىپ شىقتى. ونداعى مازمۇن دا ءارتۇرلى، ونىڭ ىشىندە تولىق قالىپتاسىپ ۇلگەرمەگەن بالالار مەن جاسوسپىرىمدەردىڭ سانا-سەزىمىنە زيان تيگىزۋى مۇمكىن.

سەناتور ءار ەل بۇل قۇبىلىسپەن ءارقيلى كۇرەسىپ جاتقانىن اتاپ ءوتتى. كەيبىر مەملەكەتتەردىڭ تالابى بويىنشا 18 جاسقا دەيىنگى جاسوسپىرىمدەرگە كۇنىنە 1 ساعات ليميت قوياتىن جاڭا فۋنكتسيا ەنگىزىلۋدە، Tik-Tok-تا كامەلەتكە تولماعانداردىڭ دەرەكتەرى ساقتالعانى ءۇشىن ايىپپۇل سالىنادى. 13 جاسقا دەيىنگى بالالارعا كۇنىنە 30 مينۋتقا دەيىن مەجە قويىلعان، ونى اتا-اناسىنىڭ رۇقساتىمەن 1 ساعاتقا دەيىن ارتتىرۋعا بولادى. كەيبىر ەلدەر بۇل پلاتفورمانى ءوز اۋماعىندا تولىعىمەن جاۋىپ تاستادى.

«كوتەرىلىپ وتىرعان ماسەلە وسكەلەڭ ۇرپاقتىڭ تاعدىرىنا تەرىس اسەر ەتەنىنىن ەسكەرە وتىرىپ، شۇعىل شارالار قابىلداۋ كەرەك دەپ ەسەپتەيمىز. وسى ورايدا TikTok جانە وزگە دە الەۋمەتتىك جەلى اكىمشىلىگى تاراپىنان ۇلتتىق زاڭنامامىزدىڭ تالاپتارىن ورىنداۋى جانە كامەلەتكە تولماعانداردىڭ قاۋىپسىزدىگىن قامتاماسىز ەتۋ بارىسىنا مونيتورينگ جۇرگىزۋ كەرەك. انىقتالعان كەمشىلىكتەر بويىنشا حالىقارالىق تاجىريبەگە سۇيەنىپ، ءتيىستى شارالار قابىلدانۋى ءتيىس»، - دەپ اتاپ ءوتتى سەناتور.